جاڭا زاڭ جوباسىنىڭ باستى ماقساتى – باسقارۋ جۇيەسىنىڭ اشىقتىعى مەن ەسەپتىلىگىن قامتاماسىز ەتە وتىرىپ, جەرگىلىكتى بيلىك ورگاندارىنىڭ دەربەستىگىن كۇشەيتۋ. بۇل تۇرعىنداردىڭ كۇندەلىكتى ومىرىنە تىكەلەي اسەر ەتەتىن ماسەلەلەردىڭ جەدەل ءارى ءادىل شەشىلۋىنە جول اشادى. سونىمەن قاتار وسى رەفورما وڭىرلىك دامۋ جوسپارلارىن حالىقپەن بىرلەسىپ تالقىلاۋ, بيۋدجەتتى باسقارۋ ىسىنە قوعام وكىلدەرىن تارتۋ سىندى تەتىكتەردى جەتىلدىرۋگە مۇمكىندىك بەرمەك.
الەمدىك تاجىريبە كورسەتكەندەي, دامىعان ەلدەردە ءوزىن-ءوزى باسقارۋ ورگاندارىنىڭ قۇزىرەتى كەڭەيىپ, اكىمشىلىك-اۋماقتىق بىرلىكتەردە حالىقتىڭ سۇرانىسىنا ساي شەشىم قابىلداۋ مۇمكىندىگى ارتىپ كەلەدى. قازاقستان بۇل باعىتتا ىلگەرى جىلجۋعا نيەتتى. جاڭا زاڭ جوباسىندا اۋىل, اۋدان, قالا دەڭگەيىندە ءماسليحاتتاردىڭ ءرولى مەن جاۋاپكەرشىلىگى ناقتى بەلگىلەنىپ وتىر. دەپۋتاتتار زاڭ جوباسى جەرگىلىكتى ءوزىن-ءوزى باسقارۋدى دامىتۋ تۇجىرىمداماسىن ىسكە اسىرۋ, سونداي-اق مەملەكەت باسشىسىنىڭ قازاقستان حالقىنا جولداۋىندا كوزدەلگەن ازاماتتاردىڭ جەرگىلىكتى ماڭىزى بار ماسەلەلەردى شەشۋگە قاتىسۋ تەتىكتەرىن ينستيتۋتسيونالدى تۇرعىدان نىعايتۋ جونىندەگى ساياسي رەفورمانى جۇزەگە اسىرۋ شەڭبەرىندە ازىرلەنگەنىن ايتادى.
ۇسىنىلىپ وتىرعان وزگەرىستەر ءوزىن-ءوزى باسقارۋ ينستيتۋتتارىن دامىتۋعا, بيلىكتىڭ اشىقتىعى مەن ەسەپتىلىگىن ارتتىرۋعا باعىتتالعان.
«كەيىنگى ەكى-ءۇش جىلدا اۋىل, اۋدان اكىمدەرىن, ۇلكەن شاھار اكىمدەرىن سايلاي باستادىق. ولار ساياسي ومىرمەن قاتار بيۋدجەتتىك ومىرگە اياق باسىپ جاتىر. سايلانعان دەپۋتاتتار مەن سايلانعان اكىم ءبىر-بىرىمەن قالاي جۇمىس ىستەۋى كەرەك؟ ولاردىڭ حالىققا بەرگەن ۋادەسى, سايلاۋالدى باعدارلاماسى بار. باسقوسۋعا بىرقاتار سايلانعان اۋىل, اۋدان اكىمدەرىن ارنايى شاقىرىپ وتىرمىز. ولاردىڭ دا ءۇنىن تىڭداعىمىز كەلەدى. ەلىمىزدەگى ءماسليحاتتاردىڭ ءرولىن كوتەرۋ دە – ماڭىزدى ماسەلە. ايماقتارداعى ارىپتەستەرىمىز قازىرگى ماجىلىستە بار دۇنيەنى وزدەرىنە الىپ كەلۋدى, باسقارمالار وزدەرىنە كەلىپ ەسەپ بەرەتىندەي جاعداي تۋسا دەگەن تىلەكتەرىن ءبىلدىرىپ جاتادى. مەنىڭشە, وسى زاڭ ەندى وسىنداي قارىم-قاتىناستاردىڭ نەگىزىن جاسايدى. ماسەلەن, اۋداندىق, قالالىق, وبلىستىق بيۋدجەت قوعامنىڭ نازارىنداعى ۇلكەن ماسەلە بولۋى كەرەك. سول كەزدە جەمقورلىق ازايادى, تالاپ وزگەرەدى, سوندا عانا ءبىز وسى قازىر رەسپۋبليكالىق دارەجەدە بولىپ جاتقان ۇلكەن وزگەرىستەردى ايماققا جەتكىزە الامىز», دەيدى ا.سارىم.
ەلىمىزدە اكىمدەردى سايلاۋ رەفورماسى جۇزەگە اسقالى بەرى كۇنى بۇگىنگە دەيىن 3 500 اكىم سايلانعان. ولاردىڭ 48-ءى – اۋدان اكىمدەرى. باسقوسۋدا ءسوز العان ۇلتتىق ەكونوميكا ۆيتسە-ءمينيسترى باۋىرجان وماربەكوۆ اكىمدەردىڭ سايلاۋالدى باعدارلاماسى مەن بەرگەن ۋادەلەرىنە قاتىستى ناقتى تەتىكتەر مەن جاۋاپكەرشىلىكتىڭ بولماۋى ماسەلە تۋىنداتىپ وتىرعانىن ايتىپ بىرقاتار ۇسىنىسىن جەتكىزدى.
جيىندا سونداي-اق زاڭ جوباسىنىڭ باستاماشىلارىنىڭ ءبىرى, ءماجىلىس دەپۋتاتى ەكاتەرينا سمىشلياەۆا, الماتى وبلىسى رايىمبەك اۋدانىنىڭ اكىمى داستان قۇداباەۆ, الماتى وبلىسى ەڭبەكشىقازاق اۋدانى بالتاباي اۋىلىنىڭ اكىمى ساۋلە اليپوۆا جانە باسقا دا ساراپشىلار ءوز پىكىرلەرى مەن ۇسىنىستارىن ورتاعا سالدى.
الماتى
