جالپى قۇنى 1,2 ملرد تەڭگە بولاتىن جەدەل جاردەم كولىكتەرى وبلىس اكىمدىگىنىڭ قولداۋىمەن ليزينگ بويىنشا ساتىلىپ الىنعان. زاۋىتتان جاڭا شىققان اۆتوكولىكتەردىڭ ءبارى حالىقارالىق تالاپتارعا ساي زاماناۋي مەديتسينالىق قۇرىلعىلارمەن جابدىقتالعان.
جەدەل مەديتسينالىق كومەك قىزمەتى جىل باسىنان بەرى وبلىس كولەمىندە 285 مىڭنان استام شاقىرتۋعا شىققان. ناتيجەسىندە ءساتتى رەانيماتسيالار 30,5% -دان 53,1% - عا دەيىن وسكەن.
«بۇگىندە ءاربىر ەكىنشى رەانيماتسيا ادام ءومىرىن قۇتقارۋمەن اياقتالادى. سوندىقتان بۇل ساندار – جاي قۇرعاق ستاتيستيكا ەمەس. ونىڭ ارتىندا سىزدەردىڭ ەرەن ەڭبەكتەرىڭىز, جاۋاپكەرشىلىكتەرىڭىز بەن وزدەرىڭىزگە جۇكتەلگەن ماڭىزدى مىندەتكە دەگەن ادالدىقتارىڭىز جاتىر. سىزدەر كۇن سايىن ينفاركت, ينسۋلت, جاراقات جانە باسقا دا اۋىر جاعدايلاردا جەدەل كومەككە جەتىپ, تالاي ناۋقاستى اجالدان اراشالاپ قالدىڭىزدار. حالىققا ساپالى, قولجەتىمدى ءارى ۋاقتىلى مەديتسينالىق كومەك كورسەتۋ – مەملەكەتتىڭ باستى مىندەتتەرىنىڭ ءبىرى. مەملەكەت باسشىسى بۇگىندە دەنساۋلىق ساقتاۋ جۇيەسىن دامىتۋدى, دارىگەرلەرگە قولداۋ كورسەتۋدى جۇكتەپ وتىر. كەيىنگى جىلدارى اۋىلدىق جەرلەردە 600-دەن استام مەديتسينالىق نىسان سالىنىپ, پايدالانۋعا بەرىلدى. جىل سوڭىنا دەيىن قالعان 55 نىساندى تاپسىرىپ, پرەزيدەنتتىڭ تاپسىرماسىن تولىق ورىندايمىز. سونىڭ ىشىندە قوستاناي وبلىسىندا 25 نىساننىڭ قۇرىلىسى ءجۇرىپ جاتىر», دەدى مينيستر.
جاڭا كولىكتەر وسى اپتانىڭ سوڭىنا دەيىن وبلىسقا قاراستى قالالار مەن اۋداندارعا جەتكىزىلەتىن بولادى.
وبلىس اكىمى بۇگىندە مەملەكەت تاراپىنان دەنساۋلىق ساقتاۋ سالاسىن دامىتۋعا ەرەكشە كوڭىل ءبولىنىپ وتىرعانىن اتاپ ءوتتى.
«مەملەكەت باسشىسى دەنساۋلىق ساقتاۋ سالاسىن دامىتۋعا, ونىڭ ىشىندە ماتەريالدىق-تەحنيكالىق بازانى نىعايتۋعا ەرەكشە نازار اۋدارىپ وتىر. وسى تاپسىرمالاردى ورىنداۋ ءۇشىن وڭىردە اۋقىمدى جۇمىس اتقارىلىپ جاتىر. اۋىلدىق جەرلەردە مەديتسينالىق نىسانداردىڭ قۇرىلىسى بەلسەندى ءجۇرىپ جاتىر. بىلتىر 28 نىسان سالىنسا, جىل سوڭىنا دەيىن تاعى 4 مەديتسينالىق ورتالىق پايدالانۋعا بەرىلەدى. ناتيجەسىندە اۋىلداردا 32 جاڭا مەديتسينالىق مەكەمە جۇمىس ىستەيتىن بولادى. بۇل نىساندار زاماناۋي جابدىقتارمەن قامتاماسىز ەتىلگەن. مۇنىڭ ءبارى اۋىل تۇرعىندارى ءۇشىن ۇلكەن كومەك», دەدى ق.اقساقالوۆ.
وبلىس اكىمىنىڭ ايتۋىنشا, بۇعان دەيىن جەدەل جاردەم قىزمەتىنە تيەسىلى ءجۇز ماشينانىڭ 76 پايىزى ەسكى بولعان. جاڭا كولىكتەر بەرىلگەن سوڭ, اتالعان قىزمەت پايدالاناتىن اۆتوكولىكتەردىڭ 90 پايىزى جاڭارىپ وتىر.
اقمارال ءالنازاروۆا قوستانايدا جاڭا زاماناۋي جەدەل جاردەم عيماراتى سالىنۋ قاجەت ەكەنىن اتاپ ءوتتى. بۇگىندە وبلىس اكىمدىگى مۇنداي عيماراتتىڭ ورنىن بەلگىلەپ قويعان. قازىر قۇرىلىس جۇمىستارىنىڭ جوبالىق-سمەتالىق قۇجاتى ازىرلەنىپ جاتىر.
قوستاناي وبلىسى
