ونى انىقتاۋدىڭ جولى – تاجىريبەلى قۇسبەگى ءتۇز بۇركىتتىڭ قوناقتايتىن جەرىن جانە ۇشىپ-قونۋىن باقىلايدى. ودان كەيىن قوناقتاعان جەرىنە تاستاعان ساڭعىرىعى مەن تۇلەگەن قاۋىرسىنىنا قاراپ ءتۇز بۇركىتتىڭ جاسىن شامالايدى.
كەلەسى كەزەكتى بۇركىت قوناعى ماڭىندا ونىڭ اكەلگەن جەمىنە ورتاقتاسۋ ءۇشىن دالانىڭ ۇساق قۇستارى قوسا جۇرەدى. ولار بۇركىتتى كورگەندە ۋلاپ-شۋلاپ دىبىس بەرەدى.
وسىنداي شارت-جاعدايلارعا قانىققان سوڭ بۇركىت قوناقتايتىن ورىن (بۇتاق, توبەشىك, تاس) ايقىن بولعاننان كەيىن قۇسبەگى ءدال سول جەرگە شاپپا تۇزاق قۇرادى.
تۇزاقتىڭ بۇل ءتۇرى جىڭىشكە كەندىردەن ەكى قۇلاش ۇزىندىقتا شيراتىلىپ جاسالادى. ادام ەكى قولىمەن قۇلاشتاي تارتقاندا ۇزە المايتىن بەرىك بولۋى شارت.
بۇل تۇزاقتى قۇرعاندا ۇزىندىعى ءبىر قۇلاشتاي اعاش قىرتىسىنان سولقىلداق ەتىپ جاساعان تاقتايشانىڭ ءبىر باسىن بۇتاقتىڭ ۇشىنا تامان بايلايدى. ەكىنشى ۇشىن بۇتاقتىڭ ءتۇپ جاعىنا تامان جەرگە شوت تەمىر قاعىپ, شوتىنا شەرتە ىلىندىرەدى. بۇعان تيەكتەيتىن ءجىپتىڭ ۇزىندىعى ءۇش قۇلاش مولشەرىندە بولعانى ءتيىمدى. ءجىپتىڭ ەكىنشى ۇشىنا اعاش توقپاق ىلىنەدى.
تۇزاقتىڭ ەكىنشى ۇشىنداعى بۋالدىرىعىن سولقىلداق تاقتايدىڭ ۇستىنە جايادى. بۋالدىرىقتىڭ تۇبىنە تاعى ءبىر تيەك بايلاپ, شوت اعاشپەن سولقىلداق تاقتايدىڭ ءىلىنىپ شەرتىپ تۇرعان ۇشىنىڭ اراسىنا ىلەكەرلەپ تۇزاق قۇرادى. تۇزاقتىڭ باۋىن جوعارىداعى اشا اعاشتىڭ اراسىنان ءتۇسىرىپ ەكىنشى توقپاق بايلانعان ۇشىن سالاقتاتىپ قويادى.
بۇركىت كەلىپ قونعاندا سولقىلداق تاقتاي تومەن ءتۇسىپ, تيەك شىعىپ كەتەدى دە, تۇزاق بۇركىتتىڭ اياعىنا قارماپ, ونى جوعارى تارتىپ اكەتەدى. توقپاق بولسا ءجىپتى تومەن تارتىپ بۇركىت اسپاقتالىپ قالادى. بۇل ءادىس بۇركىتتىڭ قانات-قۇيرىعىنىڭ سىنىپ, جاراقاتتانۋىنا ءبىراز قاۋپى بار. سوندىقتان قۇسبەگى تۇزاق قۇرعاننان كەيىن الىستاپ كەتپەي اۋىق-اۋىق بايقاپ تۇرۋى كەرەك.
