وبلىستىق مادەنيەت باسقارماسى باسشىسىنىڭ ورىنباسارى سايات ءجۇسىپوۆتىڭ ايتۋىنشا, وسىمەن بەسىنشى رەت ءوتىپ جاتقان ءداستۇرلى بايقاۋ ءاۋ باستان-اق بالالار تاقىرىبىنا قالام تارتىپ جۇرگەن جاس جازۋشىلاردىڭ شىعارمالارىن ناسيحاتتاۋدى, ولاردىڭ ۇزدىك تۋىندىلارىن جەكە جيناققا توپتاستىرۋ ارقىلى وڭىردەگى بالالار كىتاپحانالارىنىڭ كىتاپ قورىن تولىقتىرىپ, بايىتىپ وتىرۋدى كوزدەيدى.
«ىبىراي اتىنداعى ادەبي بايقاۋدىڭ بەدەلى جىل وتكەن سايىن ارتىپ, جاعرافياسى كەڭەيىپ كەلەدى. مىسالى, بيىل الماتى, استانا قالالارىنان, قىزىلوردا, پاۆلودار, وسكەمەن, قاراعاندى, جامبىل, قوستاناي وبلىستارىنان شىعارمالار كەلىپ ءتۇستى. بايقاۋ بارىسىندا ەلىمىزدىڭ شالعاي, شاعىن ەلدى مەكەندەرىندە تۇراتىن كوپتەگەن جاڭا ەسىمدەردىڭ تانىلۋىنا جول اشىلدى. ماسەلەن, بەس جىل ىشىندە ىبىراي بايقاۋىنا 103 جازۋشى قاتىسىپتى. ولاردىڭ شىعارمالارىن الدىمەن ساراپشىلار كەڭەسى وقىپ شىعادى. ودان ىرىكتەلىپ الىنعان تۋىندىلار قازىلار القاسىنىڭ قاراۋىنا جىبەرىلەدى. كەلەسى جىلى ىبىراي ءالتىنساريننىڭ 185 جىلدىعىن اتاپ وتكەلى وتىرمىز. وسىعان وراي, بايقاۋدىڭ تاقىرىپتىق اياسىن كەڭەيتىپ, جۇلدە قورىن مولايتۋ جاعىن قاراستىرامىز», دەدى سايات ءجۇسىپوۆ.
بايقاۋ قورىتىندىسى بويىنشا, جاس قالامگەر نۇربەك نۇرجان ۇلىنىڭ «قاناتتى شاباندوز» پوۆەسى «قازاق تىلىندەگى بالالار مەن جاسوسپىرىمدەرگە ارنالعان ەڭ ۇزدىك شىعارما» جانە «جاس وقىرمانداردىڭ تاڭداۋى» اتتى ەكى اتالىمنىڭ جەڭىمپازى اتانىپ, اقشالاي سىيلىق يەلەندى.
«ورىس تىلىندەگى بالالار مەن جاسوسپىرىمدەرگە ارنالعان ەڭ ۇزدىك شىعارما» اتالىمىنىڭ جۇلدەسىنە جازۋشى ەلەنا كلەپيكوۆا مەن اقىن كسەنيا زەمسكوۆا بىرلەسىپ جازعان «قىزىل كىتاپتىڭ عاجايىپ الەمى» شىعارماسى لايىق دەپ تانىلدى.
ماراپاتتاۋ راسىمىنەن كەيىن بايقاۋعا قاتىسقان تۋىندىلار ەنگەن «تازا بۇلاق» جيناعىنىڭ تۇساۋكەسەر ءراسىمى ءوتتى. مۇقاباسى جي كومەگىمەن بەزەندىرىلگەن جاڭا جيناق وڭىردەگى بالالار كىتاپحانالارىنا تاراتىلادى.
قوستاناي وبلىسى
