اۋقىمدى شاراعا پوليتسيا قىزمەتكەرلەرىمەن قاتار, ۇلتتىق ۇلان مەن قورعانىس مينيسترلىگىنىڭ وكىلدەرى دە تارتىلدى. ىزدەۋ جانە باقىلاۋ جۇمىستارىنا تىكۇشاقتار, دروندار جانە سپۋتنيكتىك كوورديناتالار پايدالانىلعان.
وپەراتسيا قورىتىندىسى بويىنشا:
- 3,5 مىڭنان استام ەسىرتكىگە قاتىستى قۇقىق بۇزۋشىلىق تىركەلدى;
- 27 توننادان استام ءتۇرلى ەسىرتكى زاتى تاركىلەندى;
- قۇرامىندا ەسىرتكى بار 110 مىڭنان استام بۇتا جويىلدى;
- 4 ۇيىمداسقان قىلمىستىق توپ, ونىڭ ىشىندە ءبىر ترانسۇلتتىق توپ اشكەرەلەندى;
- 6 ەسىرتكى زەرتحاناسى جويىلدى;
- ەسىرتكى جەتكىزۋدىڭ 50 ىشكى ارناسى جابىلدى.
وڭىرلەر بويىنشا دا بىرقاتار دەرەكتەر انىقتالدى. ماسەلەن, جامبىل وبلىسىندا 200 كەلىدەن استام ماريحۋانا تاركىلەنسە, جەزقازعاندا 100 كەلىگە جۋىق ەسىرتكى زاتى تابىلدى. الماتى اۋەجايىندا ءۇندىستان ازاماتى ۇستالىپ, ونىڭ ەلگە 3 كەلى ماريحۋانانى زاڭسىز اكەلمەك بولعانى بەلگىلى بولدى. ال قىزىلوردا وبلىسىندا سالماعى 300 كەلىنى قۇرايتىن 928 ءتۇپ قاراسورا انىقتالدى.
مينيسترلىك اتاپ وتكەندەي, «قاراسورا-2025» وپەراتسياسى – «زاڭ مەن ءتارتىپ» قاعيداتى اياسىندا جۇزەگە اسقان جۇيەلى جۇمىستىڭ ءبىر بولىگى. ەسىرتكى قىلمىسىنا قارسى ءىس-قيمىل كوميتەتى الداعى ۋاقىتتا دا ازاماتتاردىڭ دەنساۋلىعىن قورعاۋ مەن قوعامدىق قاۋىپسىزدىكتى قامتاماسىز ەتۋ باعىتىنداعى شارالاردى كۇشەيتۋدى جالعاستىرادى.
ءىىم وكىلدەرى ەسىرتكى جولىنا تۇسكەن ءاربىر ادام زاڭ الدىندا جاۋاپ بەرۋدەن قاشىپ قۇتىلا المايتىنىن ەسكەرتەدى.
