سىيلىق تۇركى الەمىنىڭ بىرلىگى مەن مادەني بايلانىسىن نىعايتۋ ماقساتىندا بەرىلەدى. بۇل تۋرالى كۇيشى قايرات حاميت ۇلى الەۋمەتتىك جەلىدەگى پاراقشاسىندا جازدى.
«كۇيشى جانعالي ءجۇزبايدىڭ الەمنىڭ 41 مەملەكەتىنەن 310 مەديا سالاسىنىڭ ماماندارى قاتىسۋىمەن وتكەن حالىقارالىق كەڭەستە ىسمايىل گاسپرالى سىيلىعىمەن ماراپاتتالۋىن «دومبىرا اسپابىنىڭ بەدەلىن حالىقارالىق دەڭگەيگە كوتەرۋ» دەپ قابىلداساق تا بولادى. بۇل كەزگە دەيىن وسى سىيلىق «تۇركى ءدۇنياسىنا سىڭىرگەن ەڭبەگى ءۇشىن» دەپ اتالاتىن. ساياساتكەرلەر, عالىمدار, ونەرپازدار مەن باق وكىلدەرىنە بەرىلىپ كەلە جاتقان ماراپات وسى جىلدان باستاپ عالىمدار مەن ونەرپازدار ءۇشىن «ىسمايىل گاسپرالى سىيلىعى» دەپ بەرىلە باستادى. بەدەلدى سىيلىقپەن ماراپاتتالعانداردىڭ اراسىندا دۇنيەجۇزىنە تانىمال تۇلعالار دا بولدى. مىسالى: تۇركيانىڭ ەكس سىرتقى ىستەر ءمينيسترى, سولتۇستىك ماكەدونيا پارلامەنتىنىڭ توراعاسى, حالىقارالىق تۇركسوي ۇيىمىنىڭ باس حاتشىسى, بەلگىلى باق وكىلدەرى, تۇركى ءدۇنياسىنا ەڭبەك ءسىڭىرىپ جۇرگەن عالىمدار مەن ونەرپازدار بار», دەپ جازادى.
