اۋديت ناتيجەسىندە قازاقستاننىڭ يكاو حالىقارالىق ستاندارتتارىنا سايكەستىك دەڭگەيى 95,7% بولدى. بۇل كورسەتكىش الەمدىك ورتاشا دەڭگەيدەن (72,01%) جانە ەۋروپا ەلدەرىنىڭ ورتاشا كورسەتكىشىنەن (87,92%) ايتارلىقتاي جوعارى.
قازاقستاننىڭ ناتيجەسى تمد ەلدەرى مەن يكاو-نىڭ ەۋرو-ازياتتىق (EUR/NAT) ايماعى بويىنشا ەڭ ۇزدىك كورسەتكىشتەردىڭ ءبىرى سانالادى. سالىستىرمالى تۇردە:
-
ازەربايجان – 74,66%;
-
وزبەكستان – 85,47%;
-
قىرعىزستان – 85,76%;
-
گرۋزيا – 89,75%;
-
بەلارۋس – 91,85%;
-
رەسەي – 94,14%.
تاياۋ شىعىس وڭىرىندەگى كەيبىر ەلدەردىڭ كورسەتكىشتەرى دە جوعارى: ءباا – 98,4%, قاتار – 96,72%, ساۋد ارابياسى – 94,41%.
قازاقستاننىڭ اۆياتسيالىق قاۋىپسىزدىك بويىنشا الدىڭعى كورسەتكىشى 83% بولعان ەدى.
جاڭا ناتيجەلەر ەلىمىزدىڭ اۆياتسيالىق قاۋىپسىزدىك سالاسىنداعى نەگىزگى زاڭناماسى مەن باعدارلامالارىنىڭ, كادرلىق دايارلىق پەن تەحنيكالىق باقىلاۋدىڭ, ساپانى باسقارۋ جانە سەرتيفيكاتتاۋ جۇيەلەرىنىڭ تيىمدىلىگىن ايقىندايدى. بۇل كورسەتكىش اۋەجايلارداعى قاۋىپسىزدىكتىڭ جوعارى دەڭگەيىن, حالىقارالىق تاسىمالداۋشىلاردىڭ سەنىمىن جانە اقش باعىتىنداعى تىكەلەي رەيستەردى اشۋعا مۇمكىندىك بەرەتىن ءبىرىنشى ساناتتى الۋ الەۋەتىن كورسەتەدى.
يكاو باعاسى 2019 جىلدان بەرى جۇزەگە اسىرىلىپ كەلە جاتقان كەشەندى رەفورمالاردىڭ ناتيجەسى بولىپ وتىر. بۇل كەزەڭدە قازاقستاننىڭ اۆياتسيالىق اكىمشىلىگى قۇرىلىپ, اۆياتسيا قىزمەتكەرلەرىنىڭ بىلىكتىلىگى ارتتىرىلدى, تاۋەكەلگە باعدارلانعان باقىلاۋ تەتىكتەرى ەنگىزىلدى.
اۋديت قورىتىندىسى – قازاقستاننىڭ جولاۋشىلار مەن اۆياتسيا يندۋسترياسى ءۇشىن قاۋىپسىز ءارى سەنىمدى اۋە قاتىناسىن قامتاماسىز ەتۋگە باعىتتالعان حالىقارالىق ستاندارتتارعا ادالدىعىنىڭ ناقتى دالەلى.
