اقش مەملەكەتتىك دەپارتامەنتىنىڭ حابارلاۋىنشا, فورۋم ۆاشينگتون مەن ورتالىق ازيا ەلدەرى اراسىنداعى ءادىل جانە ءوزارا ەكونوميكالىق سەرىكتەستىكتەر, ەنەرگەتيكالىق قاۋىپسىزدىكتى ارتتىرۋ جانە بەيبىتشىلىكتى نىعايتۋ ارقىلى جاھاندىق سىن-قاتەرلەردىڭ ايماقتىق شەشىمدەرىن ىلگەرىلەتۋ بويىنشا ىنتىماقتاستىقتى ارتتىرۋعا باعىتتالعان.
ترامپتىڭ ەكىنشى پرەزيدەنتتىك مەرزىمىنىڭ العاشقى التى ايىندا اقش ورتالىق ازيامەن جالپى سوماسى 12,4 ملرد دوللاردى قۇرايتىن ساۋدا كەلىسىمدەرىنە قول قويدى. سونىڭ ىشىندە قازاقستاندى ايتار بولساق, امەريكالىق لوكوموتيۆ بولشەكتەرىن ءوندىرۋشى «Wabtec» كومپانياسىمەن 4,2 ملرد دوللارلىق كەلىسىمگە قول قويدى. اقش ساۋدا مينيسترلىگىنىڭ مالىمەتىنشە, كەلىسىم بويىنشا قازاقستانعا «قازاقستان تەمىر جولى» ۇلتتىق تەمىرجول كومپانياسى ءۇشىن لوكوموتيۆتەر جاساۋعا 300 لوكوموتيۆ جيىنتىعى بەرىلەدى.
وا پرەزيدەنتتەرىن اق ۇيدە قارسى الدى
اقش پرەزيدەنتى دونالد ترامپ بەيسەنبىدە اق ۇيدە ورتالىق ازيانىڭ بەس ەلىنىڭ باسشىلارىمەن كەزدەسىپ, سمارتفون, ەلەكتروموبيلدەر مەن جويعىش ۇشاقتاردى قوسا العاندا, جوعارى تەحنولوگيالىق قۇرىلعىلارعا قاجەتتى سيرەك كەزدەسەتىن مەتالدار تۋرالى ءسوز قوزعادى.
ترامپ قازاقستان, قىرعىزستان, تاجىكستان, تۇرىكمەنستان, وزبەكستان باسشىلارىمەن كەشكى اس الدىندا Oval كەڭسەسىندە ەكىجاقتى كەزدەسۋلەر وتكىزدى. ء«بىزدىڭ كۇن تارتىبىمىزدەگى نەگىزگى ماسەلەلەردىڭ ءبىرى – ماڭىزدى مينەرالدار», دەدى ترامپ. سودان سوڭ: ء«بىز ەكونوميكالىق سەرىكتەستىكتەرىمىزدى نىعايتامىز, قاۋىپسىزدىك سالاسىنداعى ىنتىماقتاستىعىمىزدى جاقسارتامىز, جالپى بايلانىستارىمىزدى كەڭەيتەمىز», دەپ سەندىردى.
ءوزارا سىيلاستىقتى قۋاتتايتىن مالىمدەمە
دونالد ترامپ قازاقستان يزرايل مەن مۇسىلمان كوپشىلىگى بار ەلدەر اراسىنداعى قارىم-قاتىناستى قالىپقا كەلتىرۋ ءۇشىن يبراھيم كەلىسىمدەرىنە قوسىلاتىنىن ايتتى.
بۇل مالىمدەمە اقش پرەزيدەنتى دونالد ترامپ پەن قازاقستان پرەزيدەنتى قاسىم-جومارت توقاەۆ تەلەفون ارقىلى يزرايل پرەمەر-ءمينيسترى بەنيامين نەتانياحۋمەن سويلەسكەننەن كەيىن جاسالدى.
«جاقىندا ءبىز رەسمي تۇردە قول قويۋ ءراسىمىن جاريالايمىز, جالپى بۇعان قوسىلۋعا تىرىساتىن ەلدەر كوپ», دەپ جازدى ترامپ «Truth Social» جەلىسىندە.
ال قازاقستان ۇكىمەتىنىڭ مالىمدەمەسىندە بۇل ماسەلە كەلىسسوزدەردىڭ سوڭعى ساتىسىندا تۇرعانى ايتىلعان. ء«بىزدىڭ يبراھيم كەلىسىمدەرىنە قوسىلۋىمىز – ديالوگكە, ءوزارا سىيلاستىققا جانە ايماقتىق تۇراقتىلىققا نەگىزدەلگەن قازاقستاننىڭ سىرتقى ساياسي باعىتىنىڭ ءبىرى», دەلىنگەن حابارلامادا.
