– كريپتوۆاليۋتامەن اينالىسپاس بۇرىن ەڭ ءبىرىنشى قادام – ءبىلىم الۋ. سەبەبى كريپتونارىق باسقا قارجى قۇرالدارىنا ۇقسامايدى. بۇل جەردە ەموتسيامەن ەمەس, اقىلمەن ارەكەت ەتۋ كەرەك. كريپتوۆاليۋتا, بلوكچەين, توكەن, ءاميان دەگەن ۇعىمداردى انىق تۇسىنبەي اقشا سالۋ سان سوقتىرۋى مۇمكىن. نارىقتىڭ لوگيكاسىن, مۇمكىندىگىن, تاۋەكەلىن بىلمەي, دۇرىس شەشىم قابىلداۋ – اقىلعا سىيمايتىن تۇسىنىك. ال ءبىلىم العان ادام ءوزىن سەنىمدى سەزىنەدى ءارى الاياقتارعا الدانبايدى.
ەكىنشىدەن, ءاردايىم رەسمي, ليتسەنزياسى بار پلاتفورمالاردى تاڭداۋعا كەڭەس بەرەمىن. ەلىمىزدە كريپتواكتيۆتەرمەن زاڭدى تۇردە تەك استانا حالىقارالىق قارجى ورتالىعىنىڭ (احقو) ليتسەنزياسى بار بيرجالار ارقىلى ساۋدا جاساۋعا بولادى. سەبەبى رۇقساتسىز سايتتار مەن ءالسىز سەرۆيستەردە تاۋەكەل جوعارى. ۇزاق مەرزىمگە ينۆەستيتسيا جاسايتىن ادامعا جەكە ءاميان قولدانۋدى ءجون كورەمىن. ال قىسقامەرزىمدىك وپەراتسيالارعا بيرجا ءاميانى دا جارايدى. ءامياننىڭ قۇپيا سوزدەرىن جانە قالپىنا كەلتىرۋ سوزدەرىن ەشكىمگە بەرۋگە بولمايدى.
ۇشىنشىدەن, كريپتوعا اقشا سالا باستاعاندا بىردەن كوپ قارجى سالۋدىڭ قاجەتى جوق. مەن ارقاشان ادامدارعا از سومامەن باستاۋعا كەڭەس بەرەمىن. مىسالى, 20 نەمەسە 50 دوللارمەن باستاپ كورۋگە بولادى. وسىلايشا ادام نارىقتىڭ قالاي جۇمىس ىستەيتىنىن ءوز كوزىمەن كورىپ, العاشقى تاجىريبەسىن جينايدى. جۇيەنى تۇسىنگەن سايىن ستراتەگيا قالىپتاسادى. ەڭ باستىسى, ەموتسياعا بەرىلمەۋ. كوپشىلىك كريپتونى جىلدام پايدا الاتىن قۇرال دەپ ويلايدى, بىراق شىندىعىندا بۇل ۇزاق ويلانۋدى, سابىردى, تالداۋدى تالاپ ەتەدى.
تورتىنشىدەن, قاۋپسىزدىك ماسەلەسىن دە ۇمىتپاۋ كەرەك. ارقاشان ەكى فاكتورلى قورعاۋدى قوسۋ قاجەت. سونىمەن قاتار ينتەرنەتتە كەزدەسەتىن كۇماندى ۇسىنىستاردان ساق بولعان ءجون. «تەز بايىپ كەتەسىڭ», «جوباعا قاتىسساڭ اقشاڭ وسەدى» دەگەن سوزدەرگە سەنبەۋ كەرەك. كريپتو الەمىندە الاياقتار وتە كوپ. سوندىقتان تەك سەنىمدى اقپاراتقا جۇگىنگەن ءجون. ەگەر ءسىز رەسمي پلاتفورما ارقىلى تابىس تاپساڭىز, سالىق تولەۋ مىندەتتى ەكەنىن دە ەستە ۇستاعان ءجون.
بۇل سالاعا قىزىعىپ جۇرسەڭىز, اۋەلى وسى قاراپايىم ساتىلاردان وتە بەرىڭىز. قازىردەن باستاعان دۇرىس. سەبەبى ەلىمىز كريپتوۆاليۋتا سالاسىندا ايماقتىق ورتالىققا اينالادى. بىراق تەك رەتتەلەتىن, زاڭعا باعىناتىن, مەملەكەتتىك باقىلاۋ اياسىندا جۇمىس ىستەيتىن ەكوجۇيە ارقىلى عانا ىسكە اسادى. ءبىز ەركىن كريپتونارىق قۇرۋعا تىرىسىپ جاتقان جوقپىز. ءبىزدىڭ باعىتىمىز تۇراقتى, قاۋىپسىز قارجى كەڭىستىگىن جاساۋعا باعىتتالعان. كەيىنگى جىلدارى مەملەكەت كريپتويندۋستريانى زاڭداستىرۋ مەن باقىلاۋدى كۇشەيتۋ بويىنشا ناقتى قادام جاساپ كەلەدى. احقو بازاسىندا رەتتەلگەن الاڭ جۇمىس ىستەيدى. ۇلتتىق بانك تسيفرلىق اكتيۆتەر مەن توكەنيزاتسيا جوبالارىن سىناقتان وتكىزىپ جاتىر. بۇل شەتەلدىك كاپيتالدى, تەحنولوگيا مەن مامانداردى تارتۋعا مۇمكىندىك بەرەدى.
جالپى, ەلىمىزدە كريپتوۆاليۋتامەن تولەم جاساۋ بىردەن ەمەس, بىرتىندەپ جۇزەگە اسادى. ۇزاق ۇدەرىس. بۇگىندە QR ارقىلى كريپتوۆاليۋتامەن تولەم جاساۋ بويىنشا العاشقى پيلوتتار ءوتتى. بۇل تەحنولوگيا تۇرعىسىنان دايىن ەكەنىمىزدى كورسەتتى. بىراق زاڭ جۇزىندە تەك ارنايى رۇقسات ەتىلگەن ايماقتاردا عانا قولدانۋعا مۇمكىندىك بار. حالىقتىڭ كريپتو تۋرالى حابارى ءالى دە از. سوندىقتان جاپپاي قولدانۋ ءۇشىن بىرنەشە شارت قاجەت. بىرىنشىدەن, ستەيبلكوين تۇراقتى بولۋى كەرەك. ەكىنشىدەن, كريپتو مەن تەڭگە اراسىندا ىڭعايلى جانە جىلدام كونۆەرتاتسيا مۇمكىندىگى قاجەت. ۇشىنشىدەن, بانكتەر مەن بيزنەس تاراپىنان قولداۋ بولسا عانا جۇيە تولىق ىسكە اسادى.
بۇگىندە ەڭ ۇلكەن تاۋەكەل باعانىڭ قۇبىلمالىلىعى ەمەس. ەڭ باستى قاۋىپ رەتتەۋشىلىك تالاپتاردىڭ وزگەرۋى جانە سەنىمسىز پلاتفورمالار. كەيىنگى ۋاقىتتا زاڭسىز كريپتوبيرجالار مەن رۇقساتسىز P2P الاڭدار جابىلىپ جاتىر. قاراجاتتارى بۇعاتتالعان كەي ازاماتتار بار. بۇل بىزگە تەك زاڭدى, ليتسەنزياسى بار پلاتفورمالارمەن جۇمىس ىستەۋ كەرەكتىگىن كورسەتەدى. سونداي-اق ماينينگكە قاتىستى تالاپتار, ەلەكتر ەنەرگياسى باعاسى جانە سالىق نورمالارى ءجيى وزگەردى. بۇل دا نارىققا اسەر ەتەدى. سوندىقتان كەز كەلگەن ينۆەستور ءبىرىنشى كەزەكتە قاۋىپسىز ينفراقۇرىلىمعا نازار اۋدارۋى كەرەك.
قورىتىندىلاساق, كريپتو سالاسىنا قىزىعاتىن وتانداستارىمىزعا ءاردايىم ءبىر كەڭەس بەرەمىن. تەك زاڭدى الاڭدا جۇمىس ىستەڭىز. اقشانى بەلگىسىز پلاتفورمالارعا سەنىپ بەرمەڭىز. قارجىلىق شەشىمدى ەموتسيامەن ەمەس, اقپاراتقا سۇيەنىپ قابىلداڭىز.
