ديريجەر دجۋزەپپە اكۋاۆيۆانىڭ باسقارۋىنداعى گەنۋياداعى كارلو فەليچە تەاترى وركەسترىنىڭ سۇيەمەلدەۋىمەن باعدات ءابىلحانوۆ نەمىس ءرومانتيزمى سكريپكا مۋزىكاسىنىڭ جاۋھارى – ماكس برۋحتىڭ وركەستر مەن سكريپكاعا ارنالعان №1 كونتسەرتتى, سول مينور, op. 26 ورىندادى.
«اۋەننىڭ اسەمدىگى, ەموتسيالىق ايقىندىلىق پەن مۋزىكالىق ورىنداۋشىلىقتاعى مانەرلىلىك قاتتى باعالاناتىن يتاليا جەرىندە وسىناۋ كەرەمەت تۋىندىمەن ونەر كورسەتۋ مەن ءۇشىن زور مارتەبە. برۋحتىڭ تۋىندىسى رومانتيكا رۋحىنا تولى, ول بارلىق قاتىسۋشىنىڭ – ارتىستەردىڭ دە, تىڭدارمانداردىڭ دا جۇرەگىنەن ورىن الدى. وسى ءساتتى پايدالانا وتىرىپ, مەنى شاقىرعاندارى ءۇشىن جانە ناتيجەلى ارىپتەستىك ءۇشىن ماەسترو اكۋاۆيۆا مەن كامولي تەاترىنا شىنايى العىسىمدى بىلدىرەمىن», دەپ اتاپ ءوتتى باعدات ءابىلحانوۆ.
الەمدەگى ەڭ تانىمال ءارى سۇيىكتى سكريپكالىق كونتسەرتتەردىڭ ءبىرى تالعامپاز يتاليالىق كورەرمەندەردى تاڭعالدىردى. كوپشىلىك ءبىزدىڭ ارتىسكە تولاسسىز قوشەمەت جاۋدىردى. كەش اياقتالعاننان كەيىن كلاسسيكانى باعالايتىن جاندار الەۋمەتتىك جەلىلەردەگى پاراقشالاردا وڭ پىكىرلەر قالدىرىپ, ورىنداۋشىنىڭ شەبەرلىگىنە جانە قازاق سكريپكا مەكتەبىنىڭ جوعارى دەڭگەيىنە تاڭدانىستارىن جەتكىزدى.
«ماكس برۋحتىڭ كونتسەرتى سوليسكە ءوز دارىنىنىڭ بارلىق قىرىن تولىق اشۋعا جانە تەحنيكالىق قۋات پەن ەموتسيالىق وتكىرلىكتىڭ ەرەكشە ۇيلەسىمىن پاش ەتۋگە مۇمكىندىك بەردى. تانىمال اداجيو باۋراپ الدى, ال فينالدىڭ درامالىق قۋاتى ناعىز تاڭدانىستى تۋعىزدى. بۇل ءبىزدىڭ تەڭىز جاعاسىنداعى قالامىزدىڭ رومانتيكالىق اتموسفەراسى مەن سكريپكا ءۇنى اراسىنداعى تاماشا مۋزىكالىق ديالوگ بولدى», دەپ پىكىر ءبولىستى كورەرمەن ميكەلە برۋتستسونە.
تىڭدارمان لۋيزا گاللو دا اسەرىن جەتكىزدى: «باعدات ءابىلحانوۆتىڭ ورىنداۋى تەحنيكالىق جاعىنان ءمىنسىز بولىپ قانا قويعان جوق, سونىمەن قاتار ول جىگەرلى ەستىلدى. پايىمداۋ شىنايىلىق پەن تاڭعالارلىق جىلىلىققا ۇلاستى. سوندىقتان ءبىز وسىناۋ ءشۇباسىز جەتىستىكتىڭ كۋاسى بولعانىمىزعا شىن جۇرەكتەن قۋانىشتىمىز».
