سىرتقى ىستەر مينيسترلىگىنىڭ مالىمەتىنشە, قۇجاتتار ونەركاسىپ, ەنەرگەتيكا, تسيفرلاندىرۋ, ءبىلىم بەرۋ جانە يننوۆاتسيالار سياقتى نەگىزگى سالالاردى قامتيدى. بۇل كەلىسىمدەر قازاقستان مەن اقش اراسىنداعى ستراتەگيالىق سەرىكتەستىكتى جاڭا دەڭگەيگە كوتەرىپ, ءوزارا سەنىمدى نىعايتۋعا باعىتتالدى.
John Deere قازاقستاندا اۋىل شارۋاشىلىعى تەحنيكاسىن شىعارادى
ساپاردىڭ باستى ناتيجەلەرىنىڭ ءبىرى – قر يندۋستريا جانە قۇرىلىس مينيسترلىگى, «بايتەرەك» ۇبح» اق, «اگروماشحولدينگ KZ» اق, «Eurasia Group AG» جانە «John Deere» كومپانياسى اراسىندا جالپى قۇنى 2,5 ملرد اقش دوللارىن قۇرايتىن ستراتەگيالىق كەلىسىمگە قول قويىلۋى بولدى. قۇجاتقا سايكەس قوستاناي جانە تۇركىستان قالالارىندا «John Deere» ماركالى 3000-عا دەيىن اۋىل شارۋاشىلىعى تەحنيكاسىن شىعارۋ, ءۇش سەرۆيس ورتالىعىن سالۋ, كادرلاردى دايارلاۋ جۇيەسىن دامىتۋ جانە قازاقستاندى تمد ەلدەرىنە ارنالعان قوسالقى بولشەكتەرمەن قامتاماسىز ەتەتىن وڭىرلىك حاب رەتىندە قالىپتاستىرۋ كوزدەلگەن.
قازاقستان مەن اقش بىرلەسىپ ۆولفرام كەن ورىندارىن يگەرەدى
تاۋ-كەن ونەركاسىبى سالاسىندا «تاۋ-كەن سامۇرىق» ۇلتتىق تاۋ-كەن كومپانياسى مەن «Cove Capital» كومپانياسى جالپى قۇنى 1,1 ملرد اقش دوللارىن قۇرايتىن كەلىسىمگە قول قويدى. جوبا قاراعاندى وبلىسىنداعى الەمدەگى ەڭ ءىرى سولتۇستىك كاتپار جانە جوعارعى قايراقتى ۆولفرام كەن ورىندارىن بىرلەسىپ يگەرۋدى كوزدەيدى. بۇل باستاما تەرەڭ وڭدەۋ قۋاتتارىن قۇرىپ, قوسىلعان قۇنى جوعارى ءونىم وندىرۋگە مۇمكىندىك بەرەدى.
Air Astana مەن Boeing جاڭا ۇشاقتار جەتكىزۋ تۋرالى كەلىسىم جاساستى
«Air Astana» اق جانە «Boeing» كورپوراتسياسى 18 جاڭا كەڭ فيۋزەلياجدى «Boeing 787-9 Dreamliner» ۇشاعىن جەتكىزۋ جونىندەگى ءوزارا تۇسىنىستىك تۋرالى كەلىسىمگە قول قويدى. بۇل كومپانياعا نەگىزگى باعىتتار بويىنشا جولاۋشىلار تاسىمالداۋ الەۋەتىن ارتتىرۋعا جانە مارشرۋتتىق جەلىنى يكەمدى دامىتۋعا مۇمكىندىك بەرىپ, 2026 جىلدان باستاپ قازاقستاندى ەۋروپا, ازيا, اقش جانە تاياۋ شىعىستىڭ ءىرى ىسكەرلىك جانە تۋريستىك ورتالىقتارىمەن بايلانىستىرۋعا جول اشادى.
Starlink جانە Beeline شالعاي وڭىرلەردى سپۋتنيكتىك بايلانىسپەن قامتاماسىز ەتەدى
سونىمەن قاتار قر جاساندى ينتەللەكت جانە تسيفرلىق دامۋ مينيسترلىگى, «Beeline قازاقستان» جانە «Starlink» كومپانيالارىنىڭ قاتىسۋىمەن ۇشجاقتى كەزدەسۋ ءوتتى. كەزدەسۋ بارىسىندا «Direct-to-Cell» تەحنولوگياسىن ەنگىزۋگە باعىتتالعان ءوزارا تۇسىنىستىك تۋرالى مەموراندۋمعا قول قويىلدى. بۇل سەرىكتەستىك قازاقستاننىڭ بۇكىل اۋماعىندا, سونىڭ ىشىندە جەرۇستى بايلانىسى جوق شالعاي وڭىرلەردە دە قولجەتىمدى سپۋتنيكتىك بايلانىستى قامتاماسىز ەتۋگە مۇمكىندىك بەرەدى.
قازاقستان ەلەكتر اۆياتسياسى مەن اەروتاكسي جوبالارىن ىسكە اسىرادى
زياتكەرلىك موبيلدىلىك جانە ەكولوگيالىق تازا تەحنولوگيالار سالاسىندا قازاقستان «BETA Technologies» جانە «Joby Aero Inc.» كومپانيالارىمەن جالپى قۇنى شامامەن 300 ملن اقش دوللارىن قۇرايتىن مەموراندۋمدارعا قول قويدى. جوبالار ەلەكتر اۆياتسياسىن, اەروتاكسي جانە ينتەللەكتۋالدى كولىك جۇيەلەرىن دامىتۋعا باعىتتالعان.
قارجى سالاسىندا الەمدىك قورلارمەن بىرلەسكەن جوبالار ىسكە اسادى
قارجى جانە ينۆەستيتسيا سالاسىندا قازاقستان ۇلتتىق بانكىنىڭ ۇلتتىق ينۆەستيتسيالىق كورپوراتسياسى (NIC NBK) الەمنىڭ جەتەكشى ينۆەستيتسيالىق قورلارىمەن – «Brookfield Asset Management», «Cerberus Capital Management» جانە «Ashmore Investment Advisors Corporation» – شامامەن 1 ملرد اقش دوللارىنا تەڭ ءۇش كەلىسىم جاساستى. بۇل جوبالار ينفراقۇرىلىمدى, جەكە كاپيتال مەن قارىز نارىعىن دامىتۋعا باعىتتالعان. سونىمەن بىرگە ۇلتتىق بانك پەن «Visa» كومپانياسى تسيفرلىق تولەمدەر, كيبەرقاۋىپسىزدىك جانە شاعىن جانە ورتا بيزنەستى قولداۋ سالالارىندا ىنتىماقتاستىق تۋرالى مەموراندۋمعا قول قويدى. قۇجات «ۇلتتىق تولەم كارتالارى» اق بازاسىندا قۇزىرەتتەر ورتالىعىن قۇرۋدى كوزدەيدى.
ChatGPT Education جانە ETS: ءبىلىم بەرۋ جۇيەسى جاڭا تەحنولوگيالارمەن تۇرلەنەدى
ءبىلىم جانە عىلىم سالاسىندا «Arizona State University», «Colorado School of Mines», «Coursera, OpenAI», «Freedom Group Inc.» جانە باسقا سەرىكتەستەرمەن جالپى قۇنى شامامەن 50 ملن اقش دوللارىن قۇرايتىن كەلىسىمدەرگە قول قويىلدى. بۇل باستامالار جەزقازعاندا ۇلىتاۋ تەحنيكالىق ۋنيۆەرسيتەتىن قۇرۋدى, قوس ديپلومدىق باعدارلامالاردى دامىتۋدى, وقۋ ۇدەرىسىن تسيفرلاندىرۋدى جانە «ChatGPT Education» نەگىزىندە يننوۆاتسيالىق شەشىمدەردى ەنگىزۋدى قامتيدى.
قر عىلىم جانە جوعارى ءبىلىم مينيسترلىگى مەن اقش-تىڭ «Educational Testing Service» (ETS) حالىقارالىق ۇيىمى ۇلتتىق تەستىلەۋ جۇيەسىن جاساندى ينتەللەكت پەن ءاداپتيۆتى وقىتۋ تەحنولوگيالارىن قولدانۋ ارقىلى جاڭعىرتۋعا باعىتتالعان جول كارتاسىنا قول قويدى.
قازاقستاندا حالىقارالىق كوپسالالى كلينيكا سالىنادى
ونەركاسىپ جانە مەديتسينا سالالارىندا «سامۇرىق-قازىنا» اق جانە «Ashmore Investment Advisors» كومپانياسى جالپى قۇنى 150 ملن اقش دوللارىن قۇرايتىن جوبانى ىسكە اسىراتىنىن حابارلادى. بۇل جوبا قازاقستانداعى العاشقى حالىقارالىق برەندتى كوپسالالى كلينيكانى قۇرۋدى كوزدەيدى, ول وڭىرلىك زاماناۋي مەديتسينا حابىنا اينالماق.
قازاقستان اقش-تا العاشقى ونەركاسىپتىك ينۆەستيتسيالىق جوباسىن ىسكە اسىرادى
سونىمەن قاتار «1Thirty Holding» (AsiaColor) جانە «Business Council for International Understanding» (BCIU) اراسىندا 130 ملن اقش دوللارىنا تەڭ مەموراندۋمعا قول قويىلدى. جوبا اقش-تا ۇنتاق جابىندارى مەن پوليەفيرلى شايىرلار وندىرەتىن ۆەرتيكالدى ينتەگراتسيالانعان حيميا كەشەنىن سالۋدى كوزدەيدى. بۇل – قازاقستاننىڭ اقش-تاعى العاشقى ونەركاسىپتىك ينۆەستيتسيالىق جوباسى.
جالپى, ساپار اياسىندا قول قويىلعان قۇجاتتار قازاقستان مەن اقش اراسىنداعى جوعارى دەڭگەيدەگى سەنىمدى جانە ستراتەگيالىق سەرىكتەستىكتىڭ يننوۆاتسيالار, ينۆەستيتسيالار جانە ورنىقتى دامۋ باعىتىنداعى تەرەڭدەۋىن ايقىن كورسەتتى.
