فوتو: دەنساۋلىق ساقتاۋ مينيسترلىگى
جاڭا كولىكتەر قوستانايداعى «Allur» زاۋىتىندا قۇراستىرىلعان. 40 اۆتوكولىك شۇعىل كومەك كورسەتۋگە ارنالعان. قالعانى – رەانيموبيلدەر. جالپى قۇنى 1,2 ملرد تەڭگە بولاتىن جەدەل جاردەم كولىكتەرى وبلىس اكىمدىگىنىڭ قولداۋىمەن 5 جىلدىق مەرزىمگە ليزينگ باعدارلاماسى بويىنشا ساتىلىپ الىنعان.
زاۋىتتان جاڭا شىققان اۆتوكولىكتەر حالىقارالىق تالاپتارعا ساي زاماناۋي مەديتسينالىق قۇرىلعىلارمەن جابدىقتالعان.
«حالىققا ساپالى, قولجەتىمدى ءارى ۋاقتىلى مەديتسينالىق كومەك كورسەتۋ – مەملەكەتتىڭ باستى مىندەتتەرىنىڭ ءبىرى. مەملەكەت باسشىسى بۇگىندە دەنساۋلىق ساقتاۋ جۇيەسىن دامىتۋدى, دارىگەرلەرگە قولداۋ كورسەتۋدى جۇكتەپ وتىر. سوڭعى جىلدارى اۋىلدىق جەرلەردە 600-دەن استام مەديتسينالىق نىسان سالىنىپ, پايدالانۋعا بەرىلدى. جىل سوڭىنا دەيىن قالعان 55 نىساندى تاپسىرىپ, پرەزيدەنتتىڭ تاپسىرماسىن تولىق ورىندايمىز. سونىڭ ىشىندە قوستاناي وبلىسىندا 25 نىساننىڭ قۇرىلىسى ءجۇرىپ جاتىر», دەدى مينيستر.
جاڭا كولىكتەر وسى اپتانىڭ سوڭىنا دەيىن وبلىسقا قاراستى قالالار مەن اۋداندارعا جەتكىزىلەدى.
دەنساۋلىق ساقتاۋ سالاسىن دامىتۋعا مەملەكەت تاراپىنان ەرەكشە كوڭىل ءبولىنىپ وتىرعانىن ايماق باسشىسى دا اتاپ ءوتتى.
«مەملەكەت باسشىسى دەنساۋلىق ساقتاۋ سالاسىن دامىتۋعا, ونىڭ ىشىندە ماتەريالدىق-تەحنيكالىق بازانى نىعايتۋعا ەرەكشە نازار اۋدارىپ وتىر. وسى تاپسىرمالاردى ورىنداۋ ءۇشىن وڭىردە اۋقىمدى جۇمىستار اتقارىلىپ جاتىر. اۋىلدىق جەرلەردە مەديتسينالىق نىسانداردىڭ قۇرىلىسى بەلسەندى ءجۇرىپ جاتىر. بىلتىر 28 نىسان سالىنسا, جىل سوڭىنا دەيىن تاعى 4 مەديتسينالىق ورتالىق پايدالانۋعا بەرىلەدى. ناتيجەسىندە اۋىلداردا 32 جاڭا مەديتسينالىق مەكەمە جۇمىس ىستەيدى. بۇل نىساندار زاماناۋي جابدىقتارمەن قامتاماسىز ەتىلگەن. مۇنىڭ ءبارى اۋىل تۇرعىندارى ءۇشىن ۇلكەن كومەك», دەدى قۇمار اقساقالوۆ.
وبلىس اكىمىنىڭ ايتۋىنشا, بۇعان دەيىن جەدەل جاردەم قىزمەتىنە تيەسىلى ءجۇز ماشينانىڭ 76 پايىزى ەسكى بولعان. جاڭا كولىكتەر بەرىلگەن سوڭ, اتالعان قىزمەت پايدالاناتىن اۆتوكولىكتەردىڭ 90 پايىزى جاڭارىپ وتىر.
