اۋداندىق ءبىلىم ءبولىمى باس مامانى سۆەتلانا سۇلەيمەنوۆانىڭ ايتۋىنشا, بۇگىندە وقۋشىلاردى تاسىمالداۋ 12 مەكتەپتە ۇيىمداستىرىلعان. بۇل ماقساتتا 13 اۆتوبۋس جۇمىلدىرىلعان, ولارمەن كۇن سايىن 264 بالا مەكتەپكە بارىپ كەلەدى. مەكتەپ اۆتوبۋستارى وقۋشىلاردى تەك اۋىلدىق وكرۋگتەردەن عانا ەمەس, باۋ-باقشا اۋماقتارىنان دا تاسىمالدايدى. مىسالى, ۇلكەن اۋىلىنىڭ مەكتەبىنە كۇن سايىن «ەنەرگەتيك» باۋ-باقشا سەرىكتەستىگىنەن 9 وقۋشى كەلەدى, ال قاسىمبەك اۋىلىنداعى مەكتەپكە «تۇرار» اۋماعىنان 25 بالا قاتىنايدى. بۇدان بولەك, ءوز اۋىلىندا مەكتەپ جوق بالالار كۇتپانبەت ۇلى اتىنداعى مەكتەپكە (21 وقۋشى), قاراساي نەگىزگى مەكتەبىنە (30), تانبالىتاس (10) جانە سۇڭقار (41) اۋىلدارىنىڭ مەكتەپتەرىنە جەتكىزىلەدى. ۇمبەتالى اۋىلىنداعى مەكتەپكە شولاققارعالى اۋىلىنان 22 وقۋشى كەلەدى, وندا تەك نەگىزگى مەكتەپ جۇمىس ىستەيدى.
وقۋشىلاردى تاسىمالداۋعا قاۋىپسىزدىك تالاپتارىنا تولىق ساي كەلەتىن زاماناۋي Golden Dragon ماركالى اۆتوبۋستار پايدالانىلادى. بارلىق بالا اۆتوبۋستا تۇرماي, وتىرعىزىلادى, جول قاۋىپسىزدىگى مەن ءتارتىپتى سىنىپ جەتەكشىلەرى باقىلايدى.
اتا-انالار مەملەكەت تاراپىنان جاسالىپ وتىرعان مۇنداي قامقورلىققا ريزاشىلىقتارىن بىلدىرۋدە.
«بالالارىم ءۇشىن كوڭىلىم تىنىش. اۆتوبۋس تازا, جىلى, تەحنيكالىق جاعدايى جاقسى, جۇرگىزۋشى دە تاجىريبەلى ءارى مۇقيات», دەيدى شيەن اۋىلىنىڭ تۇرعىنى ايگەرىم ابدۋاحاتوۆا.
ال ايگەرىم كۇلشىنباەۆانى بالالاردى تاسىمالداۋ جۇمىسىنىڭ جوعارى دەڭگەيدە ۇيىمداستىرىلعانى قۋانتىپتى.
ء«بىز, اتا-انالار, بالالارىمىزدىڭ زاماناۋي اۆتوبۋستارمەن قاۋىپسىز ءجۇرىپ-تۇرعانىن كورىپ وتىرمىز. جۇرگىزۋشىلەر دە جول ەرەجەلەرىن قاتاڭ ساقتايدى. مەملەكەتكە ءوسىپ كەلە جاتقان ۇرپاققا دەگەن قامقورلىعى ءۇشىن العىس ايتامىز», دەپ اعىنان جارىلدى.
قازىر مەكتەپكە تاسىمالداۋ جۇيەسى – ساپالى بىلىمگە تەڭ قولجەتىمدىلىكتى قامتاماسىز ەتۋگە باعىتتالعان مەملەكەتتىك ساياساتتىڭ ماڭىزدى بولىگى. وسىنداي شارالاردىڭ ارقاسىندا ءار بالا, تۇرعىلىقتى جەرىنە قاراماستان, قاۋىپسىز ءارى جايلى جاعدايدا ءبىلىم الۋعا مۇمكىندىك الىپ وتىر. بۇل – ەل بولاشاعىنا مەملەكەت تاراپىنان كورسەتىلگەن ناقتى قامقورلىقتىڭ ايعاعى.
الماتى وبلىسى
