ەكىجاقتى تاۋار اينالىمىن ۇلعايتۋ, ينۆەستيتسيا, ونەركاسىپ, اۋىل شارۋاشىلىعى, تسيفرلىق يندۋستريا, جي سالاسىنداعى, سونداي-اق كولىك پەن لوگيستيكا, دەنساۋلىق ساقتاۋ, تۋريزم سياقتى تاعى دا باسقا سالالارداعى ىنتىماقتاستىقتى تەرەڭدەتۋ تۋرالى جوسپار قارالدى.
«ەلدەرىمىزدىڭ كوشباسشىلارى پرەزيدەنت قاسىم-جومارت توقاەۆ پەن بەلارۋس رەسپۋبليكاسىنىڭ پرەزيدەنتى الەكساندر گريگورەۆيچ لۋكاشەنكونىڭ ساياسي ەرىك-جىگەرى مەن تۇراقتى بايلانىسىنىڭ ارقاسىندا ەكى ەل اراسىنداعى قارىم-قاتىناس قارقىندى دامىپ كەلەدى. بارلىق دەڭگەيدەگى سەنىمدى ديالوگ پەن ستراتەگيالىق سيپاتقا يە. ۇكىمەت ساۋدا-ەكونوميكالىق جانە باسقا دا قارىم-قاتىناستارىمىزدىڭ قارقىندى ءارى ءوزارا ءتيىمدى نەگىزدە دامۋى ءۇشىن بار كۇش-جىگەرىن سالۋعا دايىن», دەدى و. بەكتەنوۆ.
تاراپتار ونەركاسىپ كووپەراتسياسىن ودان ءارى دامىتۋ مەن بىرلەسكەن جوبالاردى جۇزەگە اسىرۋ ماسەلەلەرىن تالقىلادى. تسيفرلىق سالادا جي ەلەمەنتتەرىن ەنگىزۋ بويىنشا تاجىريبە الماسۋعا باسىمدىق بەرىلىپ وتىر.
ء«بىز ءۇشىن قازاقستان ساۋدا-ەكونوميكالىق قارىم-قاتىناستارداعى باسىم سەرىكتەسىمىز. سوندىقتان بۇل بايلانىستاردى بارلىق جاعىنان دا دامىتۋعا دايىنبىز. ءبىزدىڭ كەزدەسۋىمىز ەكى ەل اراسىنداعى بىرلىكتى نىعايتا تۇسەدى», دەدى ا.تۋرچين.
اۋىل شارۋاشىلىعىندا اوك ونىمدەرىن قايتا وڭدەۋ, ءوندىرۋ جوبالارىنا باسا نازار اۋدارىلادى. سالانىڭ تيىمدىلىگىن ارتتىرۋ ءۇشىن اگرارلىق عىلىمداعى ىنتىماقتاستىققا اسا ءمان بەرىلەدى. وتاندىق ديقاندار بيىل اۋىل شارۋاشىلىعى داقىلدارىنان مول ءونىم جينادى, مۇنداي كورسەتكىشكە ولار ءبىر جاعى اگروتەحنولوگيالاردى قولدانۋ ناتيجەسىندە قول جەتكىزە الدى.
كەزدەسۋگە قاتىسۋشىلار كولىك جانە لوگيستيكا سالاسىنداعى ءوزارا ءىس-قيمىلدىڭ ماڭىزدىلىعىن اتاپ ءوتتى. سالالىق ۆەدومستۆولاردىڭ ۇيلەسىمدى جۇمىسى ەكى مەملەكەت اراسىنداعى تەمىرجول جانە اۆتوموبيل ۇدەرىسىن جاڭعىرتىپ وتىر. سونىمەن قاتار جاڭا ەكسپورتتىق نارىققا شىعۋ ءۇشىن كولىك دالىزدەرىن دامىتۋدا زور الەۋەت بار.
سونداي-اق وڭىرارالىق ىنتىماقتاستىق پەن مادەني-گۋمانيتارلىق سالاداعى ءوزارا ءىس-قيمىل ماسەلەلەرى دە تالقىلاندى. كەزدەسۋ قورىتىندىسىندا قازاقستان مەن بەلارۋس پرەمەر-مينيسترلەرىنىڭ قاتىسۋىمەن ەكىجاقتى بىرقاتار قۇجاتقا قول قويىلدى. ونىڭ ىشىندە ونەركاسىپ جانە قۇرىلىس مينيسترلىگى مەن بەلارۋس رەسپۋبليكاسىنىڭ ونەركاسىپ مينيسترلىگى اراسىنداعى ونەركاسىپتىك كووپەراتسيا سالاسىنداعى ىنتىماقتاستىقتى دامىتۋدىڭ 2026–2028 جىلدارعا ارنالعان جول كارتاسى بار. استانا قالاسىنىڭ اكىمدىگى مەن مينسك قالالىق اتقارۋ كوميتەتى اراسىنداعى 2026–2028 جىلدارعا ارنالعان ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق تۋرالى جول كارتاسى دا نازاردان تىس قالمادى. الماتى وبلىسىنىڭ اكىمدىگى مەن ۆيتەبسك وبلىستىق اتقارۋ كوميتەتى اراسىنداعى ساۋدا-ەكونوميكالىق, عىلىمي-تەحنيكالىق, مادەني-گۋمانيتارلىق سالالارداعى ىنتىماقتاستىق تۋرالى مەموراندۋمىنىڭ دا ماڭىزى ارتا ءتۇستى.
