سۋرەتتى تۇسىرگەن – يگور بۋرگاندينوۆ
الدىمەن انسامبل ارداگەرلەرىنىڭ قاتىسۋىمەن دوڭگەلەك ۇستەل ۇيىمداستىرىلىپ, ۇجىمنىڭ تاريحى باياندالدى, ەستەلىكتەر ايتىلدى. «توقىراۋىن تولقىندارىنىڭ» مەرەيتويىنا ارنالعان كىتاپ شىققانى حابارلاندى.
ادەتكى انسامبلدەر سەكىلدى ەمەس, «توقىراۋىن تولقىندارى» – قازاق ونەرىنە سونى لەپ اكەلگەن شىعارماشىلىق ۇجىم. اتاپ ايتساق, حح عاسىرعا دەيىن قازاقتا توپ بولىپ ءان شىرقاۋ قالىپتاسا قويماعان. شىرقاعان كۇننىڭ وزىندە بارلىعى ءبىر داۋىستا (ۋنيسون) ايتىپ, ءاننىڭ بوياۋىنان گورى دىبىستىق قۋاتىن ارتتىرۋعا كۇش جۇمساعان. كەيىن مادەني ىقپالداستىق ناتيجەسىندە قازاق انشىلەرى ەكى داۋىستا ءان شىرقاۋدى مەڭگەرىپ الدى. بۇل دومبىراداعى ەكى ءتۇرلى تارتىلعان ىشەكتىڭ ءوزارا ۇندەسە شىققان دىبىسى سەكىلدى. مۋزىكا تىلىندە مۇنى «پوليفونيا» دەپ اتايدى.
بۇل تۋرالى ءانسامبلدىڭ حورمەيستەرى, قازاقستاننىڭ ەڭبەك سىڭىرگەن قايراتكەرى امانتاي جۇماشەۆ ايتىپ بەردى. «اقتوعايلىق ۇستازىم, «توقىراۋىن تولقىندارىنىڭ» نەگىزىن قالاۋشىلاردىڭ ءبىرى ءدارتاي سادۋاقاسوۆ انگە رەجيسسەرلىك كوزقاراسپەن قارايتىن حورمەيستەر ەدى. قۇلاعى ۋنيسونعا ۇيرەنگەن حالىققا ءدارتاي اعامنىڭ ەكى داۋىستى ءانسامبلى ەرەكشە اسەر ەتتى. كەيىن مۋزىكالىق ءبىلىمىمدى جەتىلدىرىپ كەلگەننەن كەيىن «توقىراۋىن تولقىندارىن» ەكى داۋىستا عانا ەمەس, كوپ داۋىستا شىرقايتىن انسامبلگە اينالدىردىم», دەدى امانتاي جۇماشەۆ. راسىندا, باس حورمەيستەردىڭ بۇل ءسوزى «ادام داۋىسىنان اساتىن اسپاپ جوق» دەيتىن ءال-فارابي پىكىرىن قۋاتتاي تۇسكەندەي.
زامانىندا بەلگىلى ونەر مايتالماندارى حالىقتىق ءانسامبلدىڭ ءوسىپ-وركەندەۋىنە زور ۇلەس قوستى. ماسەلەن, 1977 جىلى «گۇلدەر» ءانسامبلىنىڭ نەگىزىن قالاعان ەسترادا جانرىنىڭ تۇڭعىش رەجيسسەرى سەرىك ەلەۋسىزوۆ پەن بالەتمەيستەر, قاز كسر ەڭبەك سىڭىرگەن ءارتىسى زاۋىربەك رايباەۆ ارنايى شاقىرىلىپ, جاڭا باعدارلاما دايىندادى. 1981 جىلى بەلگىلى ونەر زەرتتەۋشىسى بولات سارىباەۆ ءانسامبلدىڭ نەگىزگى قۇرامىنان فولكلورلىق اسپاپتار وركەسترىن قۇرىپ, باعدارلاماسىن جۇيەلەپ بەردى.
«توقىراۋىن تولقىندارىنىڭ» ونەرىنە حالىقتىڭ سۋساپ قالعانى, تولاسسىز سوعىلعان شاپالاقتان اڭعارىلدى. كونتسەرتتە حالىق جانە حالىق كومپوزيتورلارىنىڭ اندەرى شىرقالىپ, كۇمبىرلەپ كۇي توگىلدى, اسەم بي دە بولدى. كەشتىڭ جاڭالىعى رەتىندە نۇرلان كۇلشىكەنوۆتىڭ ولەڭىنە جازىلعان امانتاي جۇماشەۆتىڭ «تولقي بەر, توقىراۋىن» ءانىنىڭ تۇساۋى كەسىلدى.
سالتاناتتى ءىس-شارادا ايەلدەر ىستەرى جانە وتباسى-دەموگرافيا ساياساتى جونىندەگى ۇلتتىق كوميسسيا حاتشىسى گاۋھار نۇراحمەتوۆا وسى كوميسسيانىڭ توراعاسى, مادەنيەت جانە اقپارات ءمينيسترى ايدا بالاەۆانىڭ قۇتتىقتاۋىن وقىپ بەردى.
