2018 جىلى قازاق ۇلتتىق قىزدار پەداگوگيكالىق ۋنيۆەرسيتەتىنىڭ باستاماسىمەن قۇرىلعان جاس پەداگوگ-عالىمدار قاۋىمداستىعىنىڭ توراعاسى رەتىندە ءمولدىر راشيدقىزى ەلىمىزدەگى جاس زەرتتەۋشىلەردى ورتاق مۇددە توڭىرەگىنە توپتاستىردى. سونداي-اق ول بىلتىر پرەزيدەنت جانىنداعى ۇلتتىق عىلىم اكادەمياسى جانىنان قۇرىلعان جاس عالىمدار كەڭەسىنىڭ پرەزيديۋم مۇشەسى بولىپ سايلاندى.
بۇگىندە جاس عالىمنىڭ 50-گە جۋىق عىلىمي ماقالالارى وتاندىق جانە حالىقارالىق بەدەلدى باسىلىمداردا جارىق كوردى. ونىڭ ىشىندە «SCOPUS», «Thomson Reuters» بازالارىنداعى ماقالالار جانە عىلىم جانە جوعارى ءبىلىم مينيسترلىگى ۇسىنعان جۋرنالداردا جاريالانعان ەڭبەكتەرى دە بار. وسىعان دەيىن ءتورت بىردەي يننوۆاتسيالىق پاتەنتتىڭ يەگەرى, 4 ادىستەمەلىك قۇرال مەن 3 مونوگرافيانىڭ اۆتورى اتاندى. تالانتتى زەرتتەۋشىنىڭ جۇمىستارى حالىقارالىق عىلىمي قاۋىمداستىقتا مويىندالىپ, «SCOPUS» بازاسى بويىنشا h-يندەكسى – 4-كە كوتەرىلدى.
م.راشيدقىزى ەلىمىزدەگى بىرقاتار ماڭىزدى عىلىمي جوبالاردى ىسكە اسىرۋعا ۇلەس قوستى. ونىڭ قاتىسۋىمەن كوپفۋنكتسيونالدى ماگنيتتىك ماتەريالدار سينتەزدەلىپ, مۋلتيفەررويكتەر كلاستارىنا قاتىستى جاڭا زەرتتەۋلەر جۇرگىزىلدى. ۋران ءوندىرۋ سالاسىنداعى تەحنولوگيالىق شەشىمدەرگە ارنالعان بىرنەشە جوبا ونىڭ جەتەكشىلىگىمەن جۇزەگە استى.
جاس زەرتتەۋشىنىڭ حالىقارالىق دەڭگەيدەگى تاجىريبەسى دە باي. تۇركياداعى يىلدىز تەحنيكالىق ۋنيۆەرسيتەتىنىڭ بازاسىندا «ULAP» حالىقارالىق عىلىمي جوباسىنا قاتىسىپ, 3d-مەتالل كەشەندى وكسيدتىك ماگنيتتىك نانوبولشەكتەردى سينتەزدەۋ باعىتىندا زەرتتەۋ جۇرگىزدى. بۇعان دەيىن ۇلىبريتانياداعى كەمبريدج ۋنيۆەرسيتەتىندە, رەسەيدەگى ءسىبىر فەدەرالدى ۋنيۆەرسيتەتىندە, وزبەكستان مەن رەسەيدىڭ الدىڭعى قاتارلى زەرتحانالارىندا تاعىلىمدامادان ءوتتى.
«بولاشاق» باعدارلاماسى اياسىندا تۇركياداعى يىلدىز تەحنيكالىق ۋنيۆەرسيتەتىنىڭ نانوماتەريال جانە نانوتەحنولوگيا زەرتحاناسىندا عىلىمي زەرتتەۋلەر جۇرگىزدى. ونىڭ عىلىمداعى باعىتى – جاڭا يننوۆاتسيالىق نانوماتەريالداردى سينتەزدەۋ جانە فيزيكا – حيميالىق تالداما جۇرگىزۋ, ولاردىڭ ماگنيتتىك قاسيەتتەرىن زەرتتەۋگە ارنالعان. سونىمەن قاتار كۇردەلى وكسيدتى قوسىلىستار مەن كومىرتەكتى نانوتۇتىكشەلەر نەگىزىندە سۋتەكتى سينتتارىمەن اينالىسادى.
ءار ادامدا الۋان ءتۇرلى ارمان بولاتىنى راس. ال عالىمداردىڭ ارمانى تىپتەن باسقاشا. ءبىز كەيىپكەرىمىزدەن ءوز ارمانى تۋرالى سۇراعانىمىزدا, مىناداي جاۋاپ الدىق: «2016 جىلى ۇلىبريتانيا, كەمبريدج قالاسى, كەمبريدج ۋنيۆەرسيتەتى, كاۆەنديش زەرتحاناسىندا (Quantum Matter Group) پروفەسسور سيدحارت شانحەر (مونتۋ) ساكسەنانىڭ جەتەكشىلىگىمەن عىلىمي تاعىلىمدامادان ءوتتىم. وسىندا كاۆەنديش زەرتحاناسىنىڭ بازاسىنداعى عىلىمي قۇرىلعىلاردى كورىپ, قاتتى اسەرلەندىم. سوندا قازاق ۇلتتىق قىزدار پەداگوگيكالىق ۋنيۆەرسيتەتىندە دە وسىنداي عىلىمي بازا بولسا, وندا عالىمدارىمىز جۇمىس ىستەپ, وزدەرىنىڭ عىلىمي-زەرتتەۋلەرىن الەمگە ايگىلەسە دەپ ارماندادىم. ۋنيۆەرسيتەت باسشىلىعىنىڭ قولداۋىمەن وسى ارمانىمدى ىسكە اسىرۋ ماقساتىندا ءوزىمنىڭ عىلىمي جۇمىسىمدى ەكى جىلعا توقتاتىپ, بار كۇشىمدى عىلىمي ورتالىق اشۋعا ارنادىم. بىلتىر ءبىزدىڭ وقۋ ورنىندا بىرنەشە باعىتتى قامتيتىن پانارالىق زەرتتەۋلەر ورتالىعى اشىلدى», دەدى ول.
عالىم ايتىپ وتىرعان پانارالىق زەرتتەۋلەر ورتالىعى – ءارتۇرلى سالالار مەن عىلىمي باعىتتاردى بىرىكتىرەتىن تەرەڭ زەرتتەۋ جۇرگىزۋگە باعىتتالعان. قازىر ورتالىقتا «حيميا-بيولوگيا-فيزيكا» باعىتىنداعى ىرگەلى جانە قولدانبالى عىلىمي زەرتتەۋلەر جۇرگىزۋگە نەگىزدەلگەن, بولاشاقتا باسقا دا باعىتتار قامتىلادى. وسى ورتالىقتا الداعى تاڭدا سپەكترلىك تالداۋ زەرتحاناسى, رەنتگەندىك فازالىق تالداۋ زەرتحاناسى, جاڭا ماتەريالداردى سينتەزدەۋ زەرتحاناسى, جاڭا ماتەريالداردى سينتەزدەۋ زەرتحاناسى, كۆانتتىق ماگنيتومەتريالىق زەرتتەۋلەر زەرتحاناسى سياقتى 9 عىلىمي زەرتحانا جۇمىس ىستەمەك.
ءبىر سوزبەن ايتقاندا, ءمولدىر راشيدقىزى – عىلىمعا جان-تانىمەن بەرىلگەن زەرتتەۋشى عانا ەمەس, جاس عالىمدارعا جول نۇسقاپ جۇرگەن تاجىريبەلى ۇستاز. ونىڭ تاباندىلىعى, حالىقارالىق تاجىريبەسى عىلىمعا ادالدىعى ەلىمىزدەگى جاس بۋىنعا ۇلگى بولادى.
