وڭىردە 2 مىڭنان استام الەۋمەتتىك قورعاۋ جۇيەسى مامانى جۇمىس ىستەيدى. ولار ءۇي جاعدايىنداعى 308 مۇمكىندىگى شەكتەۋلى بالاعا, 1 776 جالعىزباستى قارت پەن مۇگەدەككە قامقورلىق جاسايدى. ودان بولەك, 6 اتاۋلى الەۋمەتتىك قىزمەت كورسەتۋ, 27 بەلسەندى ۇزاق ءومىر ءسۇرۋ, 13 وتباسىنى قولداۋ ورتالىقتارى جۇمىس ىستەيدى. بيىل وسى ورتالىقتارعا كەلگەن 12 مىڭنان استام ادامعا قۇقىقتىق, الەۋمەتتىك, پسيحولوگيالىق كومەك كورسەتىلگەن.
حالىقتىڭ الەۋمەتتىك وسال توپتارىن قورعاۋ سالاسىندا جىلدان-جىلعا ىلگەرى باسۋشىلىق سەزىلەدى. سونىڭ ءبىر دالەلى, تەمىر اۋدانىندا سالىنىپ جاتقان تىرەك-قيمىل جۇيەسىندە مۇگەدەكتىگى بار بالالارعا ارنالعان 130 ورىندىق وڭالتۋ ورتالىعى مەن اقتوبە قالاسىنداعى ەسەت باتىر تۇرعىن ءۇي الابىندا سالىنىپ جاتقان 150 ورىندىق ەرەسەك مۇگەدەكتەردى ساۋىقتىرۋ ورتالىعى.
سالتاناتتى شارادا ءوڭىر باسشىسى اسحات شاحاروۆ حالىقتى جۇمىسپەن قامتۋ, جۇمىسسىز ازاماتتاردى قايتا مامانداندىرۋ, جاڭا بيزنەس-يدەيالاردى قولداۋداعى الەۋمەتتىك قىزمەتكەرلەردىڭ ەڭبەگىنە ەركشە توقتالدى.
– جۇمىسشى ماماندىقتارى جىلى اياسىندا 40 مىڭنان استام ادام, سونىڭ ىشىندە 1 131 مۇگەدەكتىگى بار ازامات جۇمىسقا ورنالاستىرىلدى, 567 ادام جاڭا بيزنەس-يدەيالارعا مەملەكەتتىك گرانت الدى, 519 ادام جاڭادان كاسىپتىك ءبىلىم الدى. مەملەكەتتىك ينسپەكتورلار كومەگىمەن 6 184 ەڭبەككەردىڭ قۇقىعى قورعالدى, – دەگەن وبلىس اكىمى پرەزيدەنت جولداۋىندا كورسەتىلگەن الەۋمەتتىك ساياساتتى بىرىزدەندىرۋ, تسيفرلاندىرۋعا بايلانىستى قولعا الىنىپ جاتقان شارالاردى اتاپ ءوتتى. – وسىعان بايلانىستى اقتوبە وبلىسىندا الەۋمەتتىك قورعاۋ سالاسىندا بىرقاتار دايىندىق جۇمىسى جۇرگىزىلىپ جاتىر. FSM «Social» موبيلدىك قوسىمشاسى ارقىلى ومىرلىك قيىن جاعدايعا تاپ بولعان وتباسىلاردى ەرتە انىقتاپ, ولارعا ۋاقتىلى, ناقتى كومەك كورسەتۋ جۇيەسى ەنگىزىلدى. بۇگىندە وسى قوسىمشانىڭ كومەگىمەن 12 764 ادامعا قۇقىقتىق, الەۋمەتتىك, پسيحولوگيالىق قولداۋ كورسەتىلدى.
سالتاناتتى راسىمدە وسى سالادا ۇزاق جىل ابىرويلى قىزمەت ەتىپ جۇرگەن ەڭبەككەرلەرگە مەملەكەتتىك ناگرادا تابىس ەتىلدى. «الەۋمەتتىك قورعاۋ جۇيەسىنىڭ ۇزدىك قىزمەتكەرى جانە ۇزدىك الەۋمەتتىك جوبا», «ەڭبەك جولى» كونكۋرسى وبلىستىق كەزەڭىنىڭ جەڭىمپازدارىنا قۇرمەت كورسەتىلدى. شارا سوڭىندا اقتوبە وبلىسى اكىمىنىڭ اتىنان 6 الەۋمەتتىك قىزمەت كورسەتۋ ورتالىعىنىڭ ارقايسىسىنا 3 ميلليون تەڭگە كولەمىندە سەرتيفيكات تابىستالدى. ولاردىڭ اراسىندا قالاداعى قارتتار مەن مۇگەدەكتەر ءۇيى, 18 جاستان جوعارى جۇيكە اۋرۋلارىنا شالدىققان ناۋقاستارعا ارنالعان ينتەرنات, 18 جاسقا دەيىنگى جۇيكە اۋرلارى بار بالالارعا ارنالعان ينتەرنات ۇيلەرى بار.
– جۇيكە سىرقاتىنا شالدىققان 3–18 جاس اراسىنداعى بالالارعا ينتەرنات ءۇيى وتكەن جىلدىڭ قاڭتارىندا اشىلدى. قازىردە 53 بالا تاربيەلەنىپ جاتىر. بىزدە اۋتيزمگە شالدىققان, داۋن سىرقاتىمەن دۇنيەگە كەلگەن بالا كوپ. ينتەرنات تاربيەلەنۋشىلەرىنىڭ باسىم كوپشىلىگى – 2010, 2011 جىلى دۇنيەگە كەلگەن. تاربيەشىلەر بالانى الەۋمەتتەندىرۋگە داعدىلاندىرادى. ماسەلەن ءوز توسەگىن, ويىنشىقتارىن, ىدىستارىن جيناپ, جۋىنۋعا ۇيرەتەدى. اتا-انالارى ءار جۇما سايىن كەشكىلىك ساعات 16.00–18.00 ارالىعىندا كەلىپ, بالالارىنا جولىعىپ كەتە الادى, – دەيدى №3 الەۋمەتتىك قىزمەت كورسەتۋ ورتالىعىنىڭ ديرەكتورى قارلىعاش شالاەۆا.
«الەۋمەتتىك ەڭبەك سالاسىنىڭ ۇزدىگى» توسبەلگىسىمەن ماراپاتتالعان قارعالى اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى ايگۇل بيجانوۆا وسى سالادا 30 جىلدان بەرى ەڭبەك ەتىپ كەلەدى. تاجىريبەلى مامان از قامتىلعان وتباسى, مۇگەدەك, جۇمىسسىزدار مەن D, E ساناتىنداعى ومىرلىك قيىن جاعدايدا قالعان وتباسىلارعا كومەك كورسەتەدى. اۋداندا 506 مۇگەدەك بار, سونىڭ ىشىندە 18 جاسقا دەيىنگى 661 بالا تىركەلگەن. 30 وتباسى اتاۋلى الەۋمەتتىك كومەك الادى.
– اۋداندا جالعىزباستى, وزدىگىنەن ءجۇرىپ-تۇرۋى قيىن ەرەسەك 89 مۇگەدەك, كومەككە مۇقتاج 7 بالا بار. قىزمەتكەرلەرىمىز اپتاسىنا ەكى-ءۇش رەت مۇگەدەك بالالاردىڭ ۇيلەرىنە بارىپ, بىرگە ۋاقىت وتكىزەدى. جازۋعا ۇيرەتەدى, بىرگە سۋرەت سالادى, سىرتقا شىعارىپ سەرۋەندەتەدى. وڭىردەگى كومەككە مۇقتاج, جالعىزباستى مۇگەدەكتىگى بار 89 جاننىڭ 35-ءى اۋدان ورتالىعىندا تۇرادى. الەۋمەتتىك قىزمەتكەر ولاردىڭ ءۇيىن تازالايدى, ازىق-ت ۇلىك ساتىپ اكەلەدى, كومىر كىرگىزىپ, كۇل شىعارادى. اۋىلدارداعى كومەككە مۇقتاج جاندار دا نازاردان تىس قالمايدى, – دەيدى ا.بيجانوۆا.
الەۋمەتتىك قىزمەتكەر بولۋ وڭاي ەمەس. بۇل بويىندا ەڭبەكقورلىق پەن ادالدىق, قايىرىمدىلىق, شىدامدىلىق, مەيىرىمدىلىك سەكىلدى قاسيەتتەر ۇشتاساتىن ادامداردىڭ عانا قولىنان كەلەدى. سول سەبەپتى وسى سالادا كوبىنەسە ايەلدەر ەڭبەك ەتەدى. ايتا كەتۋ كەرەك, قامقورلىققا مۇقتاج جاندارعا ەڭ ءبىرىنشى بولىپ قول ۇشىن سوزاتىن الەۋمەتتىك قىزمەتكەرلەر كۇنى تۇڭعىش رەت بيىل ەرەكشە اتاپ ءوتىلدى. ەندى جىل سايىن قازاننىڭ سوڭعى اپتاسىندا مەرەكەلەنەتىن بولادى.
اقتوبە وبلىسى
