ەكونوميكادا ءوسىم اسەرى بايقالا باستادى

كەيىنگى  جىلدارى ەل ىشىندە قوزعالىس كۇشەيدى. ادامدار ءجيى ساپارلايدى. كوبىرەك دەمالىپ, قىزمەت كورسەتۋگە ءجيى جۇگىنەدى. بۇرىن 6 ميلليون 600 مىڭ ادام ساياحاتتاسا, قازىر 10 ميلليون 500 مىڭ ادام ەل ىشىندە دەمالعان. شەتەلگە شى­عاتىندار دا ءۇش ەسە ءوسىپ, 1 ميلليون 190 مىڭ ادامعا جەتتى. اۋە تاسىمالى دا ارتتى. قازىر جىلىنا 14 ميلليوننان استام ادام ۇشاقپەن جۇرەدى. تاكسي قىزمەتىن قولداناتىندار سانى دا ايتارلىقتاي ءوستى. 2018 جىلى 54 ميلليوننان استام ادام تاكسي قولدانسا, بىلتىر بۇل كورسەتكىش 73 ميلليون ادام بولدى.

«ەكونوميكا سان ءۇشىن ەمەس, ادام ءۇشىن جۇمىس ىستەۋى كەرەك. ەگەر حالىق ەركىن جۇرسە, دەمالسا, تابىسىن ەركىن جۇمساسا, مىنە, وسى ناعىز ءوسىم. كەيىنگى جىلدارى وتان­داستارىمىز ءدال وسىنداي مۇمكىندىككە يە بولا باستادى. بۇل ەلدىڭ دامۋى دۇرىس باعىتتا ەكەنىن كورسەتەدى. اسىرەسە ادامداردىڭ دەمالىسقا ءجيى شىعىپ, ساپالى قىزمەتتەرگە جۇگىنۋى سەنىمنىڭ ارتقانىن بىلدىرەدى», دەپ جازىلعان زەرتتەۋدە.

تۇرعىن ءۇي الۋشىلار قاتارى دا كوبەيگەن. 2020 جىلى 3 ميلليون 854 مىڭ ادامنىڭ جەكە باسپاناسى بولسا, 2024 جىلى بۇل كورسەتكىش 4 ميلليون 983 مىڭ ادامعا جەتتى. ياعني 5 جىلدا 1 ميلليوننان استام ادام ءۇي العان. سونىمەن قاتار ەلدە تۇتىنۋ مادەنيەتى دە وزگەرىپ جاتىر. ادامدار ساپالى تاعامعا كوبىرەك كوڭىل بولەدى. ەت پەن جەمىستى ءجيى تۇتىنادى. الەۋمەتتىك توپتارعا ارنالعان ازىق سەبەتىنە دە 20 تاۋاردىڭ ورنىنا 43 اتاۋ ەنگىزىلدى.

ينفوگرافيكانى جاساعان – زاۋرەش سماعۇل, «ەQ»

قالا مەن اۋىلدا ينفراقۇ­رىلىم جاڭارىپ كەلەدى. گاز تارتۋ, جارىق ورناتۋ, جول جون­دەۋ, اۋلالاردى جاقسارتۋ سياق­تى جۇمىستار جۇيەلى ءجۇرىپ جاتىر. اسىرەسە وڭىرلەر­دەگى وزگەرىس ايقىن سەزىلەدى. كوپ جىل كۇتكەن الەۋمەتتىك جاق­سارتۋلار ىسكە اسا باستادى. بۇل ءومىر ساپاسىنا ىقپال ەتىپ وتىر. ەكونوميكانىڭ كولەمى ارتقانىمەن, باستى نازار ەندى ونىڭ ساپاسىنا اۋىپ كەلەدى. قازىرگى مىندەت تەك ءوسۋ ەمەس, سول ءوسىمنىڭ ءار ادامعا اسەرىن كۇشەيتۋ.

«ينفراقۇرىلىم جاقسار­سا, قوعامدىق كوڭىل كۇي دە وزگەرەدى. جارىعى بار كوشە, تازا اۋلا, تەگىس جول, جىلى ءۇي, مىنە, ادامعا ەڭ كەرەگى – وسى. ەكونوميكالىق ءوسىم دەگەنىمىز تەك ءوندىرىس ەمەس, ەڭ الدىمەن تۇرمىس ساپاسىنىڭ ارتۋى. قازىر وسىنى كورىپ وتىرمىز. جۇرت ەركىن قوزعالادى. قىزمەت قولجەتىمدى. بولاشاقتا ەڭ ماڭىزدىسى ءوسىمنىڭ ءوزىن ەمەس, ونىڭ قايدا جۇمسالعانىن باقىلاۋ بولادى. ەل دامۋى جۇرتتىڭ ومىرىندە كورىنسە, ەڭبەكتىڭ ناتيجەسى سونىسىمەن باعالانادى. ءبىز بۇگىن وسى كەزەڭگە ءوتىپ كەلەمىز. قارا­پايىم ادامنىڭ مۇمكىندىگى كەڭەيىپ, ءومىر ساپاسى ارتىپ جاتىر», دەپ تۇيىندەدى ارنا ساراپشىلارى.