رەسمي مالىمەتتەرگە سۇيەنسەك, بيىلعى ءبىرىنشى جارتىجىلدىقتىڭ قورىتىندىسى بويىنشا ىشكى تۋريستەر سانى 31,3%-عا ارتتى. ياعني دەمالۋشىلاردىڭ قاتارى 185,7 مىڭ ادامعا جەتكەن. تۋريستىك قىزمەتتەر كولەمى 8,7%-عا ءوسىپ, 4 ملرد تەڭگەنى قۇرادى. تۋريزم سالاسىنا تارتىلعان ينۆەستيتسيالار 13,8 ملرد تەڭگەدەن اسىپ تۇسكەن.
– قاراعاندى وبلىسى بەلسەندى دەمالىستى ۇناتاتىن جانداردىڭ ورتالىعى عانا ەمەس, ينۆەستورلار ءۇشىن دە بولاشاعى زور ءوڭىر. ايماقتىڭ تۋريستىك ينفراقۇرىلىمدى دامىتۋعا الەۋەتى وراسان. كەمپينگتەر, ەكو-قوناقۇيلەر, رەكرەاتسيالىق ايماق پەن ەتنوپارك سەكىلدى وزگە دە نىسانداردى سالۋ مۇمكىندىگى بار. بۇگىنگى فەستيۆالعا 10-نان استام كاسىپورىن مەن 20-دان استام تۋريزم ورتالىعى قاتىسىپ وتىر. قالا تۇرعىندارى تۋريزم ورتالىقتارىمەن كەڭىنەن تانىسا الادى. جالپى, ءبىزدىڭ ماقسات – ەلدى ساياحاتتاۋعا شاقىرۋ, – دەدى وبلىستىق تۋريزم باسقارماسىنىڭ باسشىسى يرينا ليۋبارسكايا.
فەستيۆالدى وبلىستىق تۋريزم باسقارماسى ۇيىمداستىردى. ساياحاتقا, تابيعات اياسىنداعى دەمالىسقا, بەلسەندى ءومىر سالتىنا قىزىعۋشىلىق تانىتقان تۇرعىندار مەن قوناقتار وسىلايشا ءبىر الاڭدا توعىستى. قاتىسۋشىلار وڭىردەگى ىشكى تۋريزم باعىتتارىمەن جاقىن تانىسىپ, تۋريستىك مارشرۋتتار مەن دەمالىس ورىندارى جونىندە جان-جاقتى اقپاراتقا قانىقتى.
فەستيۆال اياسىندا ساياباققا كيىز ۇيلەر تىگىلىپ, ەتنواۋىل, شەبەرلىك ساعاتتارى, ارقان وتكەلدەرى ۇيىمداستىرىلدى. سونىمەن قوسا, كەلۋشىلەر ء«تۋريستىڭ ىزىمەن» اتتى كەدەرگىلەردەن تۇراتىن ەستافەتاعا قاتىسىپ, دالا جاعدايىندا ءومىر ءسۇرۋدىڭ نەگىزگى داعدىلارىن, تابيعاتتاعى قاۋىپسىزدىك ەرەجەلەرىن ۇيرەندى. ءارى بايداركامەن ءجۇزۋ جونىندەگى كورسەتىلىمدى تاماشالادى. كول جاعاسىنداعى قايىقتارمەن سەرۋەندەدى.
تۋريزم سپورتى بويىنشا سپورت شەبەرى, نۇسقاۋشى سەرگەي كيستانوۆ وسى فەستيۆالعا ءوزىنىڭ جەكە قايىقتارىن الىپ كەلىپتى. وسى سالادا جۇرگەنىمە 15 جىلدان استى.
ساياحات – مەنىڭ ءومىرىم. ساياحات ارقىلى ءومىرىمدى ۇزارتامىن. بىزگە كەلەتىن ساياحاتشىلاردىڭ جاس ەرەكشەلىكتەرى ارقيلى. ءوز باسىم تۋريزم باسقارماسىنا ۇسىنىس ءبىلدىرىپ, ساياحات مارشرۋتىنىڭ سانىن كوبەيتۋ قاجەتتىگىن كوتەردىم. كەيىنگى جىلدارى تۋريزمگە قىزىعۋشىلىق بىلدىرەتىن جانداردىڭ قاتارى ارتىپ كەلەدى. سوندىقتان وڭىرىمىزدە تۋريستىك مارشرۋتتاردىڭ سانىن كوبەيتۋ ماڭىزدى. اسىرەسە قايىقپەن سەرۋەندەۋ سىندى باعىتتاردىڭ الەۋەتى زور. قايىقپەن سەرۋەندەۋ تەك دەمالىس ەمەس, جان تىنىشتىعى. جالپى, فەستيۆالدىڭ بەرەرى مول. وسى ارقىلى ءبىز كوپشىلىكتى ىشكى تۋريزمگە قىزىقتىرىپ, تۋعان ولكەنى جاڭاشا تانۋعا جول اشامىز, – دەدى س.كيستانوۆ.
ىشكى تۋريزمگە سەرپىلىس سىيلاپ جۇرگەن ازاماتتاردىڭ ءبىرى – ايان نۇرماعانبەتوۆ. ول وسىدان ون شاقتى جىل بۇرىن «Nomads Club» اتتى تۋريستىك كلۋب اشقان. ايان دا اۋەلى دوستارىمەن بىرگە تابيعات اياسىندا دەمالىپ, ەل ىشىندەگى ساياحاتتارعا شىعىپ جۇرگەن. سونداي سەرۋەن بارىسىندا تۋريستىك مارشرۋت اشۋ يدەياسى كەلەدى. كەيىن پاندەميا كەزىندە بارلىق وڭىرگە شەكتەۋ قويىلعان سوڭ ساياحاتتان قول ءۇزىپ قالادى. الايدا, شەكتەۋ ازايعان سوڭ ايان ءوز ارمانىنا قول جەتكىزەدى. بۇگىنگى كۇنى كلۋبتىڭ رەسمي ليتسەنزياسى بار. ءارى ول ىشكى ءتۋريزمدى عانا ەمەس, سىرتقى تۋريزم باعىتىندا دا اۋقىمدى جۇمىستار اتقارىپ وتىر.
– تۋريستەرىمىزدى دەڭگەيىنە قاراي ءبولىپ تاستايمىز. سەبەبى ولاردىڭ ىشىندە ءبىرىنشى رەت ساپارعا شىققالى تۇرعاندارى بولادى. ساياحاتشىلارمەن بىرگە تۋر كەستەسىن بىرلەسە قۇرامىز. بىزگە كەلەتىن ساياحاتشىلاردىڭ باسىم بولىگى تاۋلى جەرگە ساياحاتقا شىققىسى كەلەتىندەر. ايتا كەتەيىك, ءبىز – ەركىن اگەنتتىك ورتالىقپىز. جاز مەزگىلىندە تابيعات اياسىندا شاتىردا تۇنەيمىز. باستى ەرەكشەلىگىمىز سول. كۇن سالقىنداعاندا قوناقۇيلەر مەن ءتۇرلى جالعا بەرەتىن جەردەن ورىن الامىز. كولىك جاعىنا كەلەتىن بولساق, وزىمىزگە تيەسىلى جەڭىل كولىك, شاعىن اۆتوبۋس, سپرينتەرلەر بار. ەگەر باراتىن ادام سانى ءبىز ويلاعاننان دا كوپ بولسا, قوسىمشا كولىك جالعا الامىز, – دەيدى ايان سەكسەن ۇلى.
پرەزيدەنت ءوز جولداۋىندا «تۋريزم سالاسىندا ءبىراز تۇيتكىلدى ماسەلە بار. شىنىن ايتۋ كەرەك, كاسىبي كادرلار تاپشى. وسى سالاداعى باسەكەگە قابىلەتىمىز ءالى دە شامالى» دەگەن بولاتىن.
وڭىردە تۋريزم باعىتىندا كەشەندى ءىس-شارالار قولعا الىندى. سولاردىڭ ءبىرى – تۋريزم فەستيۆالى. تاڭنان كەشكە دەيىن جالعاسقان فەستيۆال كەلۋشىلەرگە تەك كوتەرىڭكى كوڭىل-كۇي سىيلاپ قانا قويماي, جاڭا مارشۋرتتارعا جول اشتى. ءىس-شارانى ۇيىمداستىرۋشىلار قاراعاندى ءوڭىرى ەلىمىزدىڭ تۋريزم كارتاسىنداعى جەتەكشى باعىتتاردىڭ بىرىنە اينالارىنا سەنىمدى.
قاراعاندى وبلىسى
