«Qazaq Style» لاقاپ اتىن يەلەنگەن جانىبەك كۋبالىق 42 جاستاعى ەريسلاندي لارامەن كۇش سىناسادى. گۋانتانامو تۋماسى 2005 جىلى قىتايدىڭ مينيان قالاسىندا اۋەسقويلار اراسىندا الەم چەمپيونى اتانعان. سول جارىستىڭ جارتىلاي فينالىندا ءبىزدىڭ باقتيار ارتاەۆتان باسىم تۇسكەن. كەزىندە ءتۇرلى تۋرنيرلەردە باقىت سارسەكباەۆپەن ەكى رەت جولى قيىسىپ, ەكەۋىندە دە قانداسىمىز جەڭىسكە جەتتى. 2007 جىلى لارا برازيليادا وتكەن پانامەريكا ويىندارى بارىسىندا شەتەلگە قاشپاق بولدى. بىراق جەرگىلىكتى ساقشىلاردىڭ قولىنا تۇسكەن كۋبالىق قابىلان وتانىنا قايتارىلدى. 2008 جىلى سول ارەكەتىن ەكىنشى مارتە قايتالادى. بۇل جولى استىرتىن جوسپارى جۇزەگە اسىپ, گەرمانيادان ءبىر-اق شىقتى. ودان كەيىن امەريكاعا اتتاندى.
كاسىپقوي رينگتەگى تۇساۋكەسەر كەزدەسۋىن لارا 2008 جىلدىڭ جازىندا وتكىزدى. سول كەزدەن بەرى 36 مارتە شارشى الاڭعا كوتەرىلىپ, 30 باسەكەدە جەڭىسكە جەتتى. 18 قارسىلاسىن نوكاۋتقا جىبەردى. 2011 جىلى پول ۋيليامستەن, 2014 جىلى ساۋل الۆارەستەن, 2018 جىلى دجەررەتت حەرتدتان ۇپاي سانىمەن عانا ۇتىلدى. 2011 جىلى كارلوس امادو مولينا, 2012 جىلى ۆانەس مارتيروسيان, 2019 جىلى برايان كوستانوعا قارسى وتكەن جەكپە-جەكتەردە تەڭ ەسەپ تىركەلدى. قازىردە ەريسلاندي WBA نۇسقاسى بويىنشا چەمپيوندىق بەلبەۋگە يە.
جانىبەك ءالىمحان ۇلىنىڭ ءجۇرىپ وتكەن جولى جانكۇيەرلەردىڭ كوز الدىندا. 32 جاستاعى جانىبەك كاسىپقوي بوكستى سەرىك ەتكەن توعىز جىل ارالىعىندا 17 رەت رينگكە كوتەرىلىپ, بارلىق باسەكەدە جەڭىس تويىن تويلادى. 12 قارسىلاسىن ەسىنەن تاندىردى. قازىر «Qazaq Style» ەكى بىردەي بەدەلدى نۇسقا بويىنشا چەمپيوندىق اتاقتى يەلەنىپ وتىر. ەندى ءۇشىنشى نۇسقانى دا ەنشىلەسە دەگەن ىزگى تىلەگىمىز بار.
