حالىقارالىق مادەني ىنتىماقتاستىق اياسىندا سالتانات قۇرعان تاعىلىمدى شارانىڭ اشىلۋ سالتاناتىنا باۋىرلاس ەلدە تۇراتىن قانداستار مەن قىرعىز حالقىنىڭ زيالى قاۋىم وكىلدەرى قاتىستى. كورمەگە قويىلعان تۇپنۇسقالىق فوتوقۇجاتتاردا قازاق حالقىنىڭ ءداستۇرلى ءومىر سالتىنىڭ ەرەكشەلىكتەرى, اكىمشىلىك جانە الەۋمەتتىك رەفورمالار, يندۋستريالاندىرۋ, ۇجىمداستىرۋ, ونەركاسىپ پەن باسقا دا سالالاردىڭ دامۋ كەزەڭدەرى جان-جاقتى كورىنىس تابادى. قۇجاتتار قازاق بىرەگەيلىگىنىڭ قالىپتاسۋ جولدارىن, الەۋمەتتىك قۇرىلىم مەن مادەني تاجىريبەلەردەگى وزگەرىستەردى جانە ءار داۋىردەگى كۇندەلىكتى تۇرمىستى ايقىن بەينەلەيدى. مۋزەي عالىمدارى, ۇلتتىق ورتالىق مۋزەي قورىنان اكەلىنگەن فوتوماتەريالدار ەلدىڭ تاريحى مەن مادەني دامۋىنا جاڭا كوزقاراسپەن قاراۋعا جول اشاتىنىن ايتادى.
«مۇنداي حالىقارالىق مازمۇنى باي جوبالار تاريحى تامىرلاسىپ جاتقان تۋىسقان ەلدەردىڭ مادەنيەتى مەن ونەرىنە بايىپتى كوزقاراسپەن قاراۋعا مۇمكىندىك بەرمەك. كورمەدە ۇسىنىلعان فوتوقۇجاتتار قوعامداعى اۋقىمدى وزگەرىستەردى, مادەني سەرپىلىستەردى كورسەتەدى. قىرعىز اعايىنداردىڭ ىستىق ىقىلاسىنا ءتانتى بولدىق. جاۋاپتى ۆەدومستۆا وكىلدەرى كورمەنىڭ اشىلۋىنا ارنايى كەلىپ, ەكى ەل دوستىعى حاقىندا پايىمدى پىكىر ايتتى. جوبانىڭ جوعارى دەڭگەيدە وتۋىنە قوس تاراپتاعى ەلشىلىكتەر دە ەلەۋلى ۇلەس قوستى. كۇنى بۇگىن قىرعىزستاندا 37 مىڭعا جۋىق قانداسىمىز تۇراتىن بولسا, كورمەنى تاماشالاۋعا ەلدىڭ تۇكپىر-تۇكپىرىنەن جۇزدەگەن باۋىرلارىمىز ارنايى كەلدى. ۇسىنىلىپ وتىرعان ماتەريالدار قازاقستاننىڭ تاريحي تاجىريبەسىن تەرەڭىرەك تۇسىنۋگە, ءداستۇر ساباقتاستىعىن جانە ونىڭ ۇلتتىق بىرەگەيلىكتى قالىپتاستىرۋداعى ىقپالىن عىلىمي تۇرعىدا ايقىنداۋعا مۇمكىندىك بەرەدى», دەيدى قر ۇلتتىق ورتالىق مۋزەيى ديرەكتورىنىڭ ورىنباسارى اراي باقىتقىزى.
ەكسپوزيتسيانىڭ ەلەۋلى بولىگى قازاق مادەنيەتىنىڭ كورنەكتى تۇلعالارى – اباي قۇنانباي ۇلى, جامبىل جاباەۆ, دينا نۇرپەيىسوۆا, كەنەن ازىرباەۆ پايدالانعان مۋزىكالىق اسپاپتاردىڭ كوشىرمەلەرىن قامتىعان. بۇل بىرەگەي جادىگەرلەر تاريحي-مادەني قۇندىلىق رەتىندە دارىپتەلىپ, قازاقتىڭ مۋزىكالىق مۇراسىنىڭ بايلىعىن پاش ەتەدى. سونداي-اق كورمەدە قازاقتىڭ ءداستۇرلى ورىنداۋشىلىق ونەرىنىڭ ەرەكشە ءتۇرى – «ورتەكە» ۇسىنىلدى. ول مۋزىكالىق, تەاترلىق جانە بي ەلەمەنتتەرىن ۇشتاستىرعان سينكرەتتى ونەر ءتۇرى. بۇل ونەردە اعاشتان جاسالعان تەكە بەينەسى دومبىرا ۇنىمەن ۇندەسىپ, قيمىل-قوزعالىس ارقىلى ادام مەن تابيعاتتىڭ ۇيلەسىمىن كوركەم جەتكىزەدى.
