سۋرەتتى تۇسىرگەن – يۋري بەككەر
كورمەدە حاكىمنىڭ اۋلەتى, بالالىق شاعى, قورشاعان ورتاسى مەن ءومىربايانىن تانىستىراتىن ارنايى ستەندتەر, فوتوماتەريالدار مەن مۇراعات قۇجاتتارى قويىلعان. اتاپ ايتقاندا, ابايدىڭ ۇلى ماعاۋياعا 1896 جىلى جازعان حاتى, اقىننىڭ ءوز قولى قويىلعان قۇجاتتار, 1903 جىلى بەرىلگەن مىنەزدەمە, ءومىر دەرەكتەرىنە قاتىستى كوشىرمەلەر, كىتاپتار جانە اقىن ءداۋىرىنىڭ كەلبەتىن بەينەلەيتىن جادىگەرلەر ەرەكشە ورىن الادى.
كوڭىل اۋدارعان بىرەگەي جادىگەرلەردىڭ ىشىندە اقىننىڭ بايبىشەسى ءدىلدانىڭ دومبىراسى, بالداعى مەن توعىزقۇمالاعى, ءىنىسى ىسقاقتىڭ بورىگى, كىشى ءىنىسى وسپاننىڭ اسىراپ العان قىزى مانسۋرانىڭ كامزولى, سونداي-اق ۇرپاعى ازات ءارحام ۇلى ىسقاقوۆ, سەمەيدەگى ابايدىڭ مەملەكەتتىك قورىق-مۋزەيى مەن ءا.جيرەنشين تاراپتارىنان قۇراستىرىلعان اباي اۋلەتى مەن تۋىستارى جونىندەگى شەجىرەلەر جانە بىرنەشە تىڭ تاريحي فوتوسۋرەت – كورمەدەگى قۇندى ماتەريالدار.
سول سەكىلدى اباي قۇنانباي ۇلىنا قاتىستى قولجازبالار, كىتاپ باسىلىمدارى حاكىم مۇراسىنا ۇڭىلگەندەردى بەيجاي قالدىرمايدى. ەكسپوزيتسيادا عالىمدار تاراپىنان ابايدىڭ ءوز ەڭبەگى دەپ تانىلعان ء«بىراز ءسوز قازاقتىڭ ءتۇبى قايدان شىققاندىعى تۋرالى» اتتى بىرەگەي تۋىندىسى, اقىن شىعارمالارى جيناقتالعان مۇرسەيىت بىكە ۇلىنىڭ (1860–1917) قولجازباسى, تۇراعۇل اباي ۇلىنىڭ (1875–1934) «قازاقتىڭ اتاقتى اقىنى اباي قۇنانباي ۇلى» اتتى قولجازباسى, سونداي-اق كاكىتاي مەن تۇراعۇل 1909 جىلى سانكت-پەتەربۋرگتە باستىرىپ شىعارعان «قازاق اقىنى يبراھيم قۇنانباي وعلىنىڭ ولەڭى» اتتى ەرەكشە باسىلىم كوپشىلىك نازارىنا ۇسىنىلعان.
كورمەنى اشقان مۋزەي ديرەكتورىنىڭ مىندەتىن اتقارۋشى سەرجان ساروۆ, ءال-فارابي اتىنداعى قازاق ۇلتتىق ۋنيۆەرسيتەتى جانىنداعى اباي عىلىمي-زەرتتەۋ ينستيتۋتىنىڭ ديرەكتورى جانعارا دادەباي ۇلى, قازاق ۇلتتىق قىزدار پەداگوگيكالىق ۋنيۆەرسيتەتىنىڭ پروفەسسورى رۋدا زايكەنقىزى, فيلوسوفيا, ساياساتتانۋ جانە ءدىنتانۋ ينستيتۋتىنىڭ باس عىلىمي قىزمەتكەرى باقىتجان مەڭلىبەك ۇلى, اباي عىلىمي-زەرتتەۋ ينستيتۋتىنىڭ جەتەكشى عىلىمي قىزمەتكەرى ءلايلا مۇسالى, يران يسلام رەسپۋبليكاسى باس كونسۋلدىعىنىڭ مادەني اتتاشەسى حوسسەين اعازادە اقىن مۇراسىنىڭ ماڭىزىن تىلگە تيەك ەتتى. عالىمدار اباي شىعارمالارىن وقۋ, ءبىلۋ, تانۋ, جاڭعىرتۋ مەن ناسيحاتتاۋ تەك قازاق حالقىنىڭ عانا ەمەس, الەم عالىمدارىنىڭ بورىشى ەكەنىنە ەرەكشە توقتالدى.
الماتى
