فوتو: gov.kz
دجۋزەپپە ۆەردي اتىنداعى ميلان كونسەرۆاتورياسىنىڭ تۇلەگى ماريا مۋدرياك بۇگىندە الەمنىڭ جەتەكشى وپەرا ساحنالارىندا ونەر كورسەتىپ ءجۇر. ول حالىقارالىق مامانداردىڭ باعالاۋى بويىنشا, الەمنىڭ ۇزدىك ون سوپرانوسىنىڭ قاتارىنا ەنگەن.
«مەن ءۇشىن ءوز وتانىم – قازاقستاننىڭ ماراپاتقا لايىق ساناعانى – ۇلكەن قۇرمەت. پرەزيدەنتىمىزگە شەكسىز العىس ايتامىن. بۇل – مەنىڭ ومىرىمدەگى ماڭىزدى وقيعالاردىڭ ءبىرى. مەن نەبارى 9 جاسىمدا, يتالياعا وقۋعا اتتاناردا بەلگىلى قيىندىقتار بولدى. سول كەزدە قاسىم-جومارت كەمەل ۇلى سىرتقى ىستەر ءمينيسترى قىزمەتىن اتقارىپ ءجۇرىپ, بۇل ماسەلەنىڭ شەشىمىن تاۋىپ بەرگەن ەدى», دەدى ماريا ماراپاتتاۋ راسىمىندە.
بيىل وپەرا ءانشىسىنىڭ شىعارماشىلىعى مەن كاسىبي مانسابىنا 28 جىل تولىپ وتىر. ماريا قازاقستاندى الەمنىڭ ەڭ ءىرى وپەرا ساحنالارىندا زور ماقتانىشپەن تانىستىرىپ جۇرگەنىن جانە الداعى ۋاقىتتا دا ەل يگىلىگى ءۇشىن ايانباي قىزمەت ەتەتىنىن ايتتى.
مادەنيەت جانە اقپارات ءمينيسترى ايدا بالاەۆا ريمگە ساپارى بارىسىندا يتاليالىق مادەني ۇيىمداردىڭ وكىلدەرىمەن دە كەزدەستى. مينيستر قازاقستان مەن يتاليا اراسىنداعى بايلانىس بارلىق باعىتتا دامىپ كەلە جاتقانىن جانە مادەني ىنتىماقتاستىق ەكى ەل اراسىنداعى قارىم-قاتىناستىڭ ماڭىزدى بولىگىنە اينالعانىن اتاپ ءوتتى.
«قازىر ەكى ەل اراسىنداعى مادەني بايلانىستاردىڭ قارقىندى دامىپ كەلە جاتقانى بايقالادى. بۇل ءۇردىس ءوزارا قۇرمەتتى كۇشەيتىپ, ۇلتتىق داستۇرلەرگە دەگەن قىزىعۋشىلىقتى ارتتىرادى. مەملەكەتتەرىمىزدىڭ پرەزيدەنتتەرى اتاپ وتكەندەي, ءبىزدىڭ ورتاق مىندەتىمىز – مادەنيەت سالاسىنداعى بايلانىستى ءتۇرلى باعىتتا تەرەڭدەتۋ. ءبىز يتاليالىقتارعا قازاق مادەنيەتىن جاقىن تانىستىرۋ ماقساتىندا بىرنەشە ءىس-شارا وتكىزۋدى جوسپارلاپ وتىرمىز. مەن مينيستر رەتىندە ءوزارا ىنتىماقتاستىقتىڭ ءارى قاراي جەمىستى جالعاسۋىنا ەرەكشە ءمان بەرەمىن», دەدى ايدا بالاەۆا.
ءمينيستردىڭ ايتۋىنشا, 24–26 قاراشا ارالىعىندا يتاليادا «قازاق كينوسىنىڭ كۇندەرى» وتەدى. وندا وتاندىق كينوگەرلەردىڭ جاڭا تۋىندىلارى مەن كلاسسيكالىق فيلمدەرى كورسەتىلەدى.
يتاليالىق ارىپتەستەرمەن وتكەن كەزدەسۋ بارىسىندا كرەاتيۆتى يندۋستريا, زەرگەرلىك ونەر, كينو جانە انيماتسيا سالالارىنداعى ىنتىماقتاستىق پەرسپەكتيۆالارى تالقىلاندى. بىرلەسكەن جۇمىستىڭ ماڭىزدى باعىتتارىنىڭ ءبىرى رەتىندە ساۋلەت ونەرىنە دە ەرەكشە نازار اۋدارىلدى.
سونىمەن قاتار ايدا بالاەۆا 1939 قۇرىلعان ەۋروپاداعى كونە مەكەمەلەردىڭ ءبىرى – ورتالىق رەستاۆراتسيا ينستيتۋتىنا باردى. بۇل ينستيتۋت – يتالياداعى مادەني مۇرانى ساقتاۋ جانە قالپىنا كەلتىرۋ سالاسىنداعى جەتەكشى عىلىمي-زەرتتەۋ ورتالىقتارىنىڭ ءبىرى. مۇندا ونەر تۋىندىلارىن, ساۋلەت ەسكەرتكىشتەرى مەن ارحەولوگيالىق نىسانداردى قايتا قالپىنا كەلتىرۋدىڭ زاماناۋي ادىستەمەلەرى ازىرلەنەدى. ايتا كەتەيىك, بيىل يتاليانىڭ رەستاۆراتسيا ينستيتۋتى مەن قازاقستان رەسپۋبليكاسىنىڭ ۇلتتىق مۋزەيى اراسىندا ءوزارا تۇسىنىستىك تۋرالى مەموراندۋمعا قول قويىلدى.
