ءىس-شارادا قازاقستان جانە تۇركيا ەلىنىڭ ءانۇراندارى ورىندالدى. تۇركيا رەسپۋبليكاسىنىڭ اقتاۋ قالاسىنداعى باس كونسۋلدىعى ۇيىمداستىرعان ءىس-شاراعا ماڭعىستاۋ وبلىستىق ءماسليحات توراعاسى جاڭبىرباي ماتاەۆ, ماڭعىستاۋ وبلىسى اكىمىنىڭ ورىنباسارى اببات ورىسباەۆ, تۇركيا رەسپۋبليكاسىنىڭ اقتاۋ قالاسىنداعى باس كونسۋلى سابري الپتەكين, حالىقارالىق بوچچا ءتۋرنيرىنىڭ قاتىسۋشىلارى جانە وزگە دە قوناقتار قاتىستى.
ءىس-شارا بارىسىندا وبلىس اكىمىنىڭ ورىنباسارى اببات ورىسباەۆ ءسوز سويلەپ, قوس ەل اراسىنداعى ىنتىماقتاستىڭ دامىپ كەلە جاتقانىن اتاپ ءوتتى.
«قازاقستان مەملەكەتىنىڭ تاۋەلسىزدىگىن العاش رەت مويىنداعان تۇركيا مەملەكەتى. سودان بەرى ەكى ەل اراسىنداعى قارىم-قاتىناس ودان ءارى دامىپ كەلە جاتىر. تۇركيانىڭ دارىگەرلەرى اقتاۋلىقتارعا تەگىن مەديتسينالىق كەڭەس بەرۋ بويىنشا جوبالارىن ىسكە اسىرۋ قاراستىرىلدى. ماڭعىستاۋدىڭ مەديتسينا ماماندارى تۇركياعا بارىپ كاسىبي بىلىكتىلىگىن جەتىلدىردى. بۇل جۇمىستار قوس ەل اراسىنداعى ىنتىماقتاستىقتىڭ دامىپ كەلە جاتقاندىعىن كورسەتەدى. تۇركيا رەسپۋبليكاسىنىڭ قۇرىلۋىنا 102 تولۋىمەن قۇتتىقتايمىن», دەدى اببات ورىسباەۆ.
ءىس-شارا بارىسىندا تۇركيا رەسپۋبليكاسىنىڭ اقتاۋ قالاسىنداعى باس كونسۋلى سابري الپتەكين تۇركيا حالقى ءۇشىن ايتۋلى كۇننىڭ ماڭىزىن اتاپ ءوتتى.
«1919 جىلى 19 مامىردا ۇلى كوسەمىمىز مۇستافا كەمالدىڭ تۇرىك ۇلتىنا سەنىم ارتىپ, سامسۋن قالاسىندا بوستاندىق پەن تاۋەلسىزدىك ءۇشىن كۇرەستى باستاعانىنا 105 جىل تولدى. تۇركيانىڭ باعىنا بىتكەن الەمگە ايگىلى بىرەگەي تۇلعا مۇستافا كەمال اتاتۇرىكتىڭ ەرەن ەرلىگىمەن 1923 جىلى 29 قازاندا تۇركيا رەسپۋبليكاسى قۇرىلدى. وتان ءۇشىن جانىن پيدا ەتكەن بارلىق شەيىتتەر مەن ارداگەرلەردى, گازي مۇستافا كەمال اتاتۇرىك پەن ونىڭ قارۋلاس جولداستارىن العىسپەن ەسكە الامىن. بۇگىنگى تاڭدا تۇركيا رەسپۋبليكاسىنىڭ پرەزيدەنتى رەجەپ تايىپ ەردوعان مىرزانىڭ جەتەكشىلىگىمەن تۇركيا مەملەكەتى الەمدە بەيبىتشىلىكتى ورناتۋعا ۇمتىلاتىن, ايماقتىق جانە الەمدىك ماسەلەلەردى شەشۋگە باسىمدىق بەرەتىن, ادامزاتتىڭ يگىلىگى ءۇشىن بارىنشا كۇش سالاتىن جەتەكشى ەلدەردىڭ بىرىنە اينالدى», دەدى سابري الپتەكين.
ماڭعىستاۋ وبلىسى
