فوتو: ۆيدەودان الىنعان كادر
بيىل قىركۇيەك ايىندا ءتۇسىرىلىم توبى ەلىمىزدىڭ ءار ءوڭىرىن ارالاپ, 22 كۇن ىشىندە 7436 شاقىرىمنان استام جول جۇرگەن. توپ مۇشەلەرى قازاقستاننىڭ تابيعي جانە مادەني مۇرالارىمەن تانىسىپ, ۇلى جىبەك جولىنىڭ بويىنداعى كونە تۇركىستاندى, ماڭعىستاۋداعى بوزجىرا شاتقالىن, كاسپي جاعالاۋىن, الماتى وبلىسىنىڭ قايىڭدى كولى مەن ساتى اۋىلىن, قاپشاعاي سۋ قويماسىن, سونداي-اق اقمولا وڭىرىندەگى كوبەيتۇز كولى مەن بۋراباي كۋرورتتىق ايماعىن ارالاپ شىقتى.
جوباعا قازاقستانمەن قاتار قىتاي, قىرعىزستان, يتاليا, مالايزيا جانە سەربيا ەلدەرىنىڭ تانىمال ارتىستەرى قاتىسقان. حالىقارالىق شىعارماشىلىق ەكسپەديتسيانىڭ ماقساتى – تابيعات پەن ونەر ۇندەستىگى ارقىلى دوستىق پەن مادەني بايلانىستاردى نىعايتۋ.
«Voice Beyond Horizon» تەلەجوباسى 2026 جىلى Hunan TV تەلەارناسىنىڭ ەفيرىنەن كورسەتىلەدى. جوبانى جۇزەگە اسىرۋعا Kazakh Tourism ۇلتتىق كومپانياسى, تۋريزم جانە سپورت مينيسترلىگى, «جولاۋشىلار تاسىمالى» اق جانە ءوڭىر اكىمدىكتەرى قولداۋ ءبىلدىردى.
