يلليۋستراتسيا: Qandastar.kz
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بيىل ەلگە قونىس اۋدارعانداردىڭ 45,7 پايىزى – وزبەكستاننان, 42,1 پايىزى – قىتايدان, 4,5 پايىزى – تۇرىكمەنستاننان, 2,6 پايىزى – رەسەيدەن, 2,6 پايىزى – موڭعوليادان, ال قالعان 2,5 پايىزى باسقا ەلدەردەن كەلگەن.
«وسى جىلعى 1 قازانداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 58,4%-دى, ەڭبەككە قابىلەتتى جاستان كىشى 32,8%-دى جانە زەينەتكەرلەر 8,8%-دى قۇرايدى.ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 15,3%-ى جوعارى ءبىلىمدى, 28,4%-ى ورتا كاسىبي ءبىلىمدى, 50,6%-ى جالپى ورتا ءبىلىمدى, جانە 5,7% ءبىلىم جوق», دەلىنگەن حابارلامادا.
قانداستار ەلدىڭ بارلىق وڭىرلەرىنە قونىستانعانىمەن, ەڭبەك كۇشى تاپشى ايماقتارعا ەرەكشە نازار اۋدارىلعان. بۇل قاتاردا اقمولا, اباي, قوستاناي, پاۆلودار, اتىراۋ, باتىس, شىعىس جانە سولتۇستىك قازاقستان وبلىستارى بار.
2025 جىلعا ارنالعان كۆوتا بويىنشا وسى وڭىرلەرگە 2 309 قانداستى قابىلداۋ جوسپارلانعان, ال قازان ايىنىڭ باسىنا دەيىن 1 725 ادام سولتۇستىك جانە شىعىس وبلىستارعا قونىس اۋدارعان.
ايتا كەتەيىك, مەملەكەت تاراپىنان قانداستارعا بىرقاتار الەۋمەتتىك قولداۋ شارالارى ۇسىنىلادى. وتاعاسىنا جانە وتباسى مۇشەلەرىنىڭ ارقايسىسىنا ءبىر رەتتىك 70 اەك (شامامەن 275 مىڭ تەڭگە) كوشۋ جاردەماقىسى بەرىلەدى. سونداي-اق تۇرعىن ءۇي جالداۋ مەن كوممۋنالدىق تولەمدەردى وتەۋ ءۇشىن ءبىر جىل ىشىندە 15-تەن 30 اەك-كە دەيىن (59 مىڭنان 118 مىڭ تەڭگەگە دەيىن) بەرىلەدى.
جىل باسىنان بەرى 916 قانداسقا ءتۇرلى قولداۋ كورسەتىلىپ, ونىڭ ىشىندە 277 ادام تۇراقتى جۇمىسقا ورنالاسقان.
بۇدان بولەك, ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ, سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%-ى نەمەسە ءبىر وتباسىنا 4,56 ملن تەڭگەگە دەيىن مولشەرىندە بىرجولعى وتەۋسىز جانە قايتارىمسىز نەگىزدە ەنگىزىلدى.
