كەزدەسۋدە ساۋدا مەن ينۆەستيتسيالىق ىنتىماقتاستىققا باسا نازار اۋدارىلدى. سونىمەن قاتار ونەركاسىپ, ەنەرگەتيكا, تسيفرلىق دامۋ, كولىك پەن لوگيستيكا, سۋ رەسۋرستارى, قارجى, اگروونەركاسىپ سالالارىنداعى ءوزارا ءىس-قيمىل ماسەلەلەرى قارالدى. ولجاس بەكتەنوۆ ۇكىمەت ەكى ەل اراسىنداعى بارلىق كەلىسىمنىڭ ورىندالۋىن باقىلاۋدا ۇستايتىنىن ايتتى. فينليانديا ەلىمىز ءۇشىن ەۋروپالىق وداقتاعى ماڭىزدى سەرىكتەس ەكەنى اتاپ ءوتىلدى.
كەلىسسوزدەر بارىسىندا ساۋدا كولەمىن ۇلعايتۋ, ونىڭ قۇرىلىمىن ءارتاراپتاندىرۋ مەن ەكونوميكانىڭ نەگىزگى سالالارىنا جاڭا تەحنولوگيالار ەنگىزۋ باعىتىندا ۇلكەن مۇمكىندىك بار ەكەنى ايتىلدى. تاراپتار ەلىمىزدە بىرلەسكەن ينۆەستيتسيالىق جوبالاردى ىسكە اسىرۋ ماسەلەسىن تالقىلادى. اڭگىمە كولىك سالاسىنا ارنالعان لوگيستيكالىق ورتالىقتار مەن ەكسپورتقا باعىتتالعان وندىرىستىك الاڭدار سالۋ تۋرالى ءوربىدى.
تسيفرلىق ترانسفورماتسيا سالاسىنداعى ىنتىماقتاستىق تا باستى نازاردا بولدى. ەلىمىز سۋپەركومپيۋتەردى ىسكە قوسقانىن ايتىپ, ەۋروپاداعى ەڭ قۋاتتى ەسەپتەۋ جۇيەلەرىنىڭ ءبىرى LUMI-مەن جۇمىس ىستەيتىن فينليانديامەن تاجىريبە الماسۋعا دايىن ەكەنىن مالىمدەدى.
«مەملەكەت باسشىسى اتاپ وتكەندەي, قازاقستان فينليانديامەن ىنتىماقتاستىقتىڭ جاڭا باعىتتارىن دامىتۋعا دايىن. ءبىز ەكونوميكانىڭ باسىم سەكتورلارىندا بىرلەسكەن جوبالاردى جۇزەگە اسىرۋعا مۇددەلىمىز. ۇكىمەت ەلىمىزگە كەلگەن ينۆەستورلارعا جان-جاقتى قولداۋ كورسەتەدى», دەدى و.بەكتەنوۆ.
فينليانديا پرەزيدەنتى الەكساندر ستۋبب قازاقستاننىڭ ينۆەستورلارعا قولايلى جاعداي جاساۋ بويىنشا جۇرگىزىپ جاتقان جۇمىستارىنا وڭ باعا بەرىپ, ەكى ەل اراسىنداعى ىنتىماقتاستىقتى تەرەڭدەتۋگە مۇددەلى ەكەنىن ءبىلدىردى.
