قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعى ۇيىمداستىرعان بۇل جوبانىڭ ەرەكشەلىگى – ۇلتتىق ونەر مەن زاماناۋي تەحنولوگيالاردىڭ ۇيلەسىمىندە بولدى. كونتسەرت تاريحىندا العاش رەت جۇرگىزۋشى ءرولىن جاساندى ينتەللەكت اتقاردى.
جوبانىڭ اۆتورى ۇلتتىق اسكەري-پاتريوتتىق ورتالىعىنىڭ باستىعى, قازاقستاننىڭ ەڭبەك سىڭىرگەن قايراتكەرى ارمان اسەنوۆتىڭ ايتۋىنشا, كونتسەرت قويىلىمىندا جاساندى ينتەللەكتتى قولدانۋ تەحنولوگيا مەن ونەردى بىرىكتىرەتىن جاڭا رۋحاني قابىلداۋ فورماتىن قالىپتاستىرۋ جولىنداعى العاشقى قادام بولىپ تابىلادى.
ءىس-شاراعا قورعانىس مينيسترلىگىنىڭ باسشىلىعى, اقمولا گارنيزونىنىڭ اسكەري قىزمەتشىلەرى جانە ولاردىڭ وتباسىلارى, «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى, سونداي-اق ەلوردا تۇرعىندارى مەن قوناقتارى قاتىستى.
ۇلتتىق بىرەگەيلىكتى نىعايتۋعا جانە وتان قورعاۋشى بەينەسىن دارىپتەۋگە باعىتتالعان كونتسەرتتىك باعدارلاماعا ورتالىق اسكەري وركەستر, ورتالىق انسامبل جانە «جاس سارباز» بالالار ستۋدياسى قاتىستى.
مەرەكەلىك كەشتىڭ «تاريحپەن ۇندەس تاعدىر» اتتى العاشقى ءبولىمى قازاق حالقىنىڭ تاريحي جادى مەن رۋحاني تامىرىنا ارنالدى. كورەرمەندەر ەسترادالىق-سيمفونيالىق وركەستر مەن «ساعىم» بي ۇجىمىنىڭ ونەرىن جىلى قابىلدادى.
ال «بىرلىك پەن بەيبىتشىلىك» ءبولىمى دوستىق پەن ۇلتارالىق كەلىسىم تاقىرىبىنا ارنالدى. ساحنادا ورتالىق ءانسامبلدىڭ فولكلورلىق-ەتنوگرافيالىق وركەسترى, سونداي-اق ەركەبەك قابدراحمانوۆ, اعىباي ۇدەشوۆ, ءاليا اۋكەنوۆا, ءمادينا قابدوللا, ءمادينا سىبانقۇلوۆا جانە «جاس سارباز» ستۋدياسىنىڭ جاس ۆوكاليستەرى ونەر كورسەتتى.
«مەنىڭ قازاقستانىم – مەنىڭ رەسپۋبليكام» اتتى بولىمدە «قارۋلى كۇشتەر», «باتىر جۇرەك ساربازدار», «قازاق ۇلدارى», «مەن قازاق», «ۇزىلمەس ءۇمىت» جانە «حالىقتار دوستاستىعى» سەكىلدى وتانعا دەگەن سۇيىسپەنشىلىك پەن ازاماتتىق جاۋاپكەرشىلىكتى دارىپتەيتىن اندەر شىرقالدى.
كونتسەرتتىڭ فينالدىق ءبولىمى «تسيفرلىق بولاشاق» — قازاقستاننىڭ دامۋ مەن پروگرەسكە ۇمتىلىسىن بەينەلەدى. ارتىستەر «قازاقستان», «قىران» جانە «ەگەمەن قازاقستان» اندەرىن ورىندادى.
كورەرمەندەر كونتسەرتتىڭ جاڭاشىلدىعىن جانە تەحنولوگيالىق ەرەكشەلىگىن جوعارى باعالاپ, ءار ءنومىردى ىستىق ىقىلاسپەن قارسى الدى. بۇل كونتسەرت ونەر, پاتريوتيزم جانە يننوۆاتسيانىڭ ۇيلەسكەن جارقىن ۇلگىسىنە اينالدى.
