ەكونميست مۇرات تەمىرحانوۆتىڭ ايتۋىنشا, جاڭا زاڭ جوباسىندا تۇبەگەيلى وزگەرىستەر جوق. قۇجاتتا كورسەتىلگەن كوپتەگەن «جاڭا تەتىكتەر» بۇعان دەيىن دە قولدانىستا بولعان. مىسالى, مەملەكەت تەك جۇيەلى ماڭىزى بار بانكتەرگە عانا كومەكتەسەدى نەمەسە شىعىن اكتسيونەر ەسەبىنەن جابىلادى دەگەن باپتار بۇرىننان بار نورمالاردى قايتالاپ وتىر.
«باستى قاۋىپ مەملەكەتكە تيەسىلى شىعىندى وزگە بانكتەر ەسەبىنەن جابۋ تۋرالى ۇسىنىس. بۇل ءتاسىل حالىقارالىق تاجىريبەگە تولىق ساي ەمەس جانە وتاندىق بانك سەكتورىنىڭ تۇراقتىلىعىنا كەرى اسەر ەتۋى مۇمكىن. حالىقارالىق قارجى كەڭەسى ۇسىنعان ستاندارتتار مۇنداي شارانى تەك ەرەكشە جاعدايدا, باسقا مۇمكىندىكتەر تاۋسىلعان كەزدە عانا قولدانۋعا بولاتىنىن كورسەتەدى. قازىرگى جۇيەنىڭ تاعى ءبىر ءالسىز تۇسى بانك داعدارىسىن باسقارۋداعى تاۋەلسىز ورگاننىڭ جوقتىعى», دەيدى ەكونوميست.
تاعى ءبىر ماڭىزدى ماسەلە – ۇلتتىق بانكتىڭ ءرولى. جوباعا سايكەس, ول تولەم قابىلەتتىلىگىن جوعالتقان بانككە سوڭعى ينستانتسيا رەتىندە نەسيە بەرە الادى. بۇل حالىقارالىق ەرەجەلەرگە قايشى كەلەدى, سەبەبى مۇنداي كومەك تەك تولەم قابىلەتى بار بانكتەرگە عانا كورسەتىلۋى ءتيىس.
م. تەمىرحانوۆ جاڭا زاڭ جوباسىندا اشىقتىق پەن نارىقتىق قاعيدالار جەتىسپەيتىنىن دە اتاپ ءوتتى. ونىڭ پىكىرىنشە, مەملەكەت پەن بانكتەر اراسىنداعى شەكارا ناقتى ءبولىنۋى كەرەك. ۇكىمەتتىڭ تومەن پايىزبەن نەسيە بەرۋى نارىقتاعى ءادىل باسەكەنى بۇزادى. جاڭا زاڭ جوباسى بانك جۇيەسىن جاڭعىرتپايدى, تەك بۇرىنعى سحەمالاردى زاڭداستىرادى. ەگەر مەملەكەت پەن نارىقتىڭ اراسى انىق اجىراتىلماسا, وندا بانك سەكتورى قايتادان سول ەسكى قاتەلىكتەردى قايتالايدى.
