سولتۇستىك قازاقستان وبلىسىنىڭ ءار اۋدانىنان كەلگەن 18 كوماندا ءورت ءسوندىرۋ ىسىندەگى شاپشاڭدىق پەن بىرلىكتىڭ, فيزيكالىق دايىندىق پەن رۋحتىڭ سىنعا تۇسەر ساتىندە باق سىنادى. ءبىرىنشى كەزەڭنىڭ قورىتىندىسى بويىنشا «ەڭ ۇزدىك گازتۇتىننەن قورعاۋشى» اتاعىن سميرنوۆو اۋىلىنىڭ №9 ءورت ءسوندىرۋ ءبولىمىنىڭ قاراۋىل باستىعى, ازاماتتىق قورعاۋ كاپيتانى ەلامان بايتۋحانوۆ جەڭىپ الدى. ول 18 قاباتتى بار بولعانى 2 مينۋت 11 سەكۋندتا باعىندىرىپ, ەرىك-جىگەرى مەن كاسىبي دايىندىقتىڭ جوعارى دەڭگەيىن كورسەتتى. ال «قاۋىپسىزدىك بەكەتىندەگى ەڭ ۇزدىك بەكەتشى» بولىپ پەتروپاۆل قالاسىنىڭ №5 ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى, ازاماتتىق قورعاۋدىڭ كىشى سەرجانتى كاميل مانسۋروۆ تانىلدى.
كوماندالىق ەسەپ بويىنشا:
1-ورىن – اقجار اۋدانىنىڭ №8 ءورت ءسوندىرۋ ءبولىمى,
2-ورىن – پەتروپاۆل قالاسىنىڭ №3 ءورت ءسوندىرۋ ءبولىمى,
3-ورىن – پەتروپاۆل قالاسىنىڭ №2 مامانداندىرىلعان ءورت ءسوندىرۋ ءبولىمى يەلەندى.
جارىس سوڭىندا جەڭىمپازدارعا گراموتالار مەن باعالى سىيلىقتار تابىس ەتىلدى.
ايتا كەتەيىك, بيىل قازاقستان رەسپۋبليكاسىنىڭ توتەنشە جاعدايلار مينيسترلىگىنە 30 جىل تولىپ وتىر. ءۇش ونجىلدىق ىشىندە ازاماتتىق قورعاۋ سالاسىنىڭ ماماندارى سان رەت ادام ءومىرىن اراشالاپ, ءوز ىستەرىنە دەگەن ادالدىقتىڭ ايقىن ۇلگىسىن كورسەتتى. بۇگىنگى جەڭىمپازدار — سول ءداستۇردىڭ لايىقتى جالعاسى. ولار ءۇشىن بۇل تەك جارىس ەمەس, ماماندىققا دەگەن سۇيىسپەنشىلىكتىڭ, ەل الدىنداعى بورىشتىڭ كورىنىسى.
سەۆارا زياحان
