نيۋ-يوركتە رەسپۋبليكا كۇنىنە وراي قازاقستاننىڭ تۋى كوتەرىلدى

سالتاناتتى شاراعا نيۋ-يورك مەرياسىنىڭ, ديپلوماتيالىق كورپۋس وكىلدەرىنىڭ, بۇۇ جانىنداعى قازاقستاننىڭ تۇراقتى وكىلدىگى مەن نيۋ-يورك قالاسىنداعى قر باس كونسۋلدىعىنىڭ قىزمەتكەرلەرى, سونداي-اق قازاقستاندىق دياسپورا مەن جاستار وكىلدەرى قاتىستى.

بيىلعى ءىس-شارانىڭ ايرىقشا ءساتى – نيۋ-يورك مەرى ەريك ادامس اتىنان قول قويىلعان جانە قر رەسپۋبليكا كۇنىنە وراي «قازاقستان مۇراسى كۇنى» (Kazakhstan Heritage Day) دەپ جاريالانعان رەسمي پروكلاماتسيانىڭ تابىستالۋى بولدى. بۇل قۇجات قازاقستانعا دەگەن قۇرمەت پەن قازاقستاندىق قاۋىمداستىقتىڭ قالانىڭ مادەني جانە قوعامدىق ومىرىنە قوسقان ۇلەسىن مويىنداۋدىڭ كورىنىسى رەتىندە قابىلداندى.

«پروكلاماتسيا قازاقستان مەن امەريكا قۇراما شتاتتارى اراسىنداعى دوستىق بايلانىستاردىڭ بەرىكتىگىن ايعاقتاپ, نيۋ-يورك قالاسىنىڭ ءوزارا قۇرمەت پەن حالىقارالىق سەرىكتەستىك قاعيداتتارىنا ادالدىعىن ءبىلدىردى. قالا اكىمشىلىگى اتىنان قۇتتىقتاۋ ءسوز سويلەگەن حالىقارالىق ىستەر جونىندەگى ارنايى كەڭەسشى چارلز دايموند دياسپورانىڭ مادەنيەتارالىق ديالوگتى دامىتۋعا قوسقان ۇلەسىن اتاپ ءوتىپ, نيۋ-يورك پەن قازاقستان اراسىنداعى ىنتىماقتاستىقتى ودان ءارى تەرەڭدەتۋگە قولداۋ ءبىلدىردى», دەپ حابارلادى  قازاقستان رەسپۋبليكاسىنىڭ نيۋ-يورك (اقش) قالاسىنداعى باس كونسۋلدىعى.

شارادا اقش-تا تۇراتىن قازاقستاندىقتاردىڭ ەلدىڭ حالىقارالىق ءيميدجىن قالىپتاستىرۋداعى رولىنە نازار اۋدارىلدى. «Sony» كومپانياسىنىڭ اعا ۆيتسە-پرەزيدەنتى گاليا تلەۋوۆا شەتەلدەگى جاس مامانداردىڭ جەتىستىكتەرى قازاقستاننىڭ جاڭعىرۋ باعىتىنىڭ جالعاسى ەكەنىن اتاپ ءوتتى.

نيۋ-يورك كينواكادەمياسىنىڭ اعا ۆيتسە-پرەزيدەنتى دەۆيد كلاين مادەني جانە ءبىلىم بەرۋ سالاسىنداعى سەرىكتەستىكتى دامىتۋعا نيەت ءبىلدىرىپ, الماتىداعى اكادەميانىڭ جاڭا كامپۋسى تۋرالى ايتىپ ءوتتى.

سالتاناتتى كەشتىڭ مادەني باعدارلاماسىندا امەريكالىق مۋزىكانت دجەفف گەرش قازاقتىڭ ۇلتتىق اسپابى – دومبىرامەن ءداستۇرلى تۋىندىلار ورىنداپ, ەرەكشە اسەر قالدىردى. سونداي-اق «Viva Music Carnegie Hall – 2022» بايقاۋىنىڭ جەڭىمپازى گۇلزار گابمان قازاق اندەرىن ورىنداپ, كەشتىڭ رۋحىن اسقاقتاتتى.

قر نيۋ-يورك قالاسىنداعى باس كونسۋلى راۋان تلەۋلين نيۋ-يورك مەرياسىنا ريزاشىلىعىن ءبىلدىرىپ, پروكلاماتسيانىڭ تابىستالۋى قازاقستان مەن اقش اراسىنداعى دوستىق پەن ءوزارا قۇرمەتتىڭ ماڭىزدى نىشانى ەكەنىن اتاپ ءوتتى.