رەسپۋبليكا كۇنى قارساڭىندا وتكەن ءفيلمنىڭ تۇساۋكەسەرىنە مادەنيەت جانە اقپارات ءمينيسترى ايدا بالاەۆا, پارلامەنت دەپۋتاتتارى, قۇقىق قورعاۋ ورگاندارىنىڭ وكىلدەرى, مادەنيەت قايراتكەرلەرى, اكتەرلەر مەن تۋىندىنىڭ شىعارماشىلىق توبى, سونداي-اق باتىردىڭ وتباسى – جۇبايى گۇلجامال تاجيەۆا مەن ۇلى ارمانجان قاتىستى.
كينونىڭ كورسەتىلىمى الدىندا پارلامەنت سەناتىنىڭ دەپۋتاتى نۇرتورە ءجۇسىپ سەنات توراعاسى ماۋلەن اشىمباەۆتىڭ قۇتتىقتاۋ حاتىن وقىپ بەردى.
«مەملەكەت باسشىسى قاسىم-جومارت توقاەۆ بيىل قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ەرجۇرەك ساقشىلاردىڭ ەرلىگى حالىققا جانقيارلىقپەن قىزمەت ەتۋدىڭ ۇلگىسى رەتىندە جۇرتىمىزدىڭ جادىندا ساقتالۋعا ءتيىس ەكەنىن ايتتى. وسى تۇرعىدان كەلگەندە, قالىڭ كورەرمەنگە جول تارتقان جاڭا ءفيلمدى بۇل باعىتتاعى ىرگەلى ىستەردىڭ جارقىن كورىنىسى دەپ قابىلدايمىز. عازيز بايتاسوۆ – قىسقا عۇمىرىندا قىلمىسقا قارسى كۇرەستى قاستەرلى پارىز ساناپ, وتانعا ادال قىزمەت ەتۋدىڭ وزىق ۇلگىسىن كورسەتتى», دەلىنگەن قۇتتىقتاۋ حاتتا.
مادەنيەت جانە اقپارات ءمينيسترى ايدا بالاەۆا تۇساۋكەسەردە ەلىمىز ءۇشىن ەڭ ماڭىزدى مەرەكە اياسىندا وسىنداي يگى شارا ءوتۋىنىڭ وزىندىك سيمۆولدىق ءمانى بار ەكەنىنە توقتالىپ, بارشا حالقىمىز ءۇشىن ەگەمەندىگىمىز بەن تاۋەلسىزدىگىمىزدەن اسقان قۇندىلىق جوق ەكەنىن تىلگە تيەك ەتتى. سونداي-اق تاۋەلسىزدىگىمىزدى نىعايتۋ, ەلدىگىمىزدى ساقتاۋ بارىمىزگە ورتاق قاستەرلى پارىز ەكەنىنە توقتالدى.
«مەملەكەتىمىزدىڭ دامۋى – ەل ازاماتتارىنىڭ جىگەرلى ەڭبەگىنىڭ, ادالدىعى مەن وتانسۇيگىشتىگىنىڭ جەمىسى دەپ بىلەمىز. وسى تۇرعىدا ەل قاۋىپسىزدىگىن قامتاماسىز ەتىپ, قوعامدىق ءتارتىپ پەن ازاماتتاردىڭ تىنىشتىعىن ساقتاپ جۇرگەن قۇقىق قورعاۋ سالاسى وكىلدەرىنىڭ قىزمەتى ايرىقشا قۇرمەتكە لايىق. ولار ەلىمىزدىڭ تۇراقتىلىعى مەن تىنىشتىعى جولىندا جاۋاپتى مىندەتتەردى ابىرويمەن اتقارىپ كەلەدى», دەدى سوزىندە.
سونداي-اق مينيستر مۇنداي جوبالاردى قولداۋ – ۇلتتىق كينونى دامىتۋ عانا ەمەس, سونىمەن بىرگە جاس ۇرپاقتىڭ بويىنا ەرلىك, ادىلدىك, ادالدىق سياقتى قۇندىلىقتاردى دارىتۋدىڭ ماڭىزدى قۇرالى ەكەنىن اتاپ ءوتتى.
«كاپيتان بايتاسوۆتىڭ جانقيارلىق قىزمەتى – ناعىز ءپاتريوتيزمنىڭ ۇلگىسى. فيلم تەك ەرلىك تۋرالى ەمەس, ار-نامىس پەن بورىش الدىنداعى ادالدىق جايىندا دا تەرەڭ ويعا جەتەلەيدى. مەملەكەتىمىزدىڭ تىنىشتىعى مەن قاۋىپسىزدىگى – ەلدەگى ءار ازاماتتىڭ ورتاق جاۋاپكەرشىلىگى.
پرەزيدەنتىمىز اتاپ وتكەن «زاڭ مەن ءتارتىپ», «ادال ازامات» قاعيداتتارى وسى فيلمدە كورىنىس تاپقان ەرلىك پەن ەلگە ادالدىق سىندى قۇندىلىقتارمەن ۇندەسىپ جاتىر. ويتكەنى مەملەكەتتىڭ قۋاتى – زاڭ مەن تارتىپتە, ال ۇلتتىڭ بەرىكتىگى – ازاماتتارىمىزدىڭ ادالدىعى مەن جاۋاپكەرشىلىگىندە ەكەنى ءسوزسىز», دەدى مينيستر.
ايدا بالاەۆا ءفيلمدى تۇسىرۋگە اتسالىسقان بارلىق شىعارماشىلىق ۇجىمعا, اتاپ ايتقاندا فيلم رەجيسسەرى ءارى ستسەناري اۆتورى داۋرەن قامشىباەۆقا, جانە باستى رولدەردى سومداعان ازامات ساتىبالدى, ەركەبۇلان دايىروۆ, اسان ءماجيت, دارحان سۇلەيمەنوۆ, قوبىلاندى بولات جانە سامال ەسلياموۆاعا زور ريزاشىلىعىن ءبىلدىردى.
ء«بىز وسىنداي تۋىندىلار ارقىلى وتكەنىمىزدى ۇمىتپاي, بولاشاعىمىزعا سەنىممەن قارايمىز. بۇل فيلم ارقايسىمىزعا وي سالىپ, ۇلتجاندىلىق پەن ازاماتتىق جاۋاپكەرشىلىكتىڭ ماڭىزىن ۇعىنۋعا شاقىرادى. تۋىندى ءار جۇرەككە ءۇمىت پەن جىگەر سىيلاپ, جاس ۇرپاققا شابىت بەرەدى دەپ سەنەمىن! », دەپ تۇيىندەدى ءسوزىن.
«كاپيتان بايتاسوۆ» ءفيلمىنىڭ سيۋجەتى 2011 جىلدىڭ 12 قاراشاسىندا تاراز قالاسىندا بولعان شىنايى وقيعاعا نەگىزدەلگەن. سول كۇنى پوليتسيا كاپيتانى عازيز بايتاسوۆ ءوز ءومىرىن قيىپ, تەرروريستى توقتاتىپ, بەيبىت تۇرعىنداردىڭ ءومىرىن ساقتاپ قالعان ەدى. پوليتسەيدىڭ بۇل ەرلىگى باتىرلىقتىڭ, پاتريوتيزم مەن ادالدىقتىڭ سيمۆولىنا اينالدى. اتالعان تۋىندىنى كورەرمەندەر 23 قازاننان باستاپ ەلىمىزدىڭ بارلىق كينوتەاترىندا كورە الادى.
