ماڭعىستاۋ وبلىسى اكىمى ءبىرىنشى ورىنباسارىنىڭ بەكىتۋىمەن «ماڭعىستاۋ وبلىسىندا 25 قازان - رەسپۋبليكا كۇنىن اتاپ ءوتۋدى ۇيىمداستىرۋ جانە وتكىزۋ جونىندەگى ءىس-شارالار جوسپارى» جاساقتالدى.
- اتالعان جوسپار ءتورت نەگىزگى باعىتتى قامتيدى. ولاردىڭ قاتارىندا ۇيىمداستىرۋ-دايىندىق ءىس-شارالارى, اقپاراتتىق-يميدجدىك جۇمىس, سالتاناتتى ءىس-شارالار جانە جالپى رەسپۋبليكالىق ءىس-شارالار بار. اتاپ ايتقاندا, 24 قازان كۇنى قالا جانە اۋدان اكىمدەرىنىڭ قاتىسۋىمەن سالتاناتتى جيىندار وتەدى. 25 قازان كۇنى - قر مەملەكەتتىك تۋ كوتەرۋ ءراسىمى ۇيىمداستىرىلادى. وسى كۇنى «بەرەكە Fest» اكتسياسى اياسىندا وتاندىق ونىمدەر جارمەڭكەسى ءوتىپ, تاۋارلار حالىققا قولجەتىمدى باعامەن ۇسىنىلادى. جاستاردىڭ پاتريوتتىق رۋحىن كوتەرۋ ماقساتىندا 100 وقۋشى ءبىر مەزەتتە مەملەكەتتىك ءانۇراندى ورىنداۋ فلەشموبى ءتۇسىرىلدى. بۇل بەينەروليك مەرەكە قارساڭىندا الەۋمەتتىك جەلىلەردە جاريالانادى, دەدى وڭىرلىك اقپارات جانە قوعامدىق دامۋ باسقارماسىنىڭ ءبولىم باسشىسى ءىنجۋ تۇراروۆا.
سونىمەن قاتار, 23 قازان كۇنى مەملەكەتتىك مەكەمە قىزمەتكەرلەرى اراسىندا «ادال قوعام – Quiz» زياتكەرلىك سايىسى وتەدى.
25 قازان كۇنى ساعات 14:00-دە اقتاۋ قالاسى «دوستىق» ۇيىندە «وتباسى – باقىتتىڭ باستاۋى» اتتى «وتباسى Fest» فەستيۆالى جانە ساعات 13:00-دە «Renaissance by Sulo» قوناق ۇيىندە شىعارماشىلىق پەن تابيعاتتى ۇندەستىرەتىن «GREEN BEAT» ەكولوگيالىق فەستيۆالى ۇيىمداستىرىلادى.
ماڭعىستاۋ وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ ءبولىم باسشىسى اسەم ءاشىروۆا ۇلتتىق مەرەكە كۇنىنە وراي ۇيىمداستىرىلاتىن مادەني ءىس-شارالارعا توقتالدى.
- 22 قازان كۇنى ساعات 21:00-دە «ابىل تاراق ۇلى اتىنداعى ۇلت اسپاپتار وركەسترى» ۇجىمىنىڭ قر رەسپۋبليكا كۇنىنە وراي «اقتاۋ ءتۇنى» اتتى كونتسەرتى وتەدى. 23 قازان كۇنى ساعات 19:00-دە «اباي» مادەني-دەمالىس كەشەنىندە «ەڭسەسى بيىك - ەگەمەن ەل» اتتى مەرەكەلىك كونتسەرت وتەدى. 24 قازان كۇنى ساعات 15:00-دە «دوستىق» ۇيىندە وبلىس اكىمىنىڭ قاتىسۋىمەن سالتاناتتى مەرەكەلىك ءىس-شارا وتەدى. ءىس-شاراعا ەلىمىزگە تانىمال جۇلدىزدار قۋاندىق راحىم جانە «IL Canto» كۆارتەتى قاتىسادى. 23 قازان ساعات 19:00-دە ن.ءجانتورين اتىنداعى وبلىستىق مۋزىكالىق-دراما تەاترىندا ء«بىز دە عاشىق بولعانبىز» قويىلىمى, 24 قازان ساعات 19:00-دە «ماحاببات قىزىق مول جىلدار» قويىلىمى جانە 26 قازان كۇنى ساعات 19:00-دە ن.ساۋدانبەك ۇلى ء«اليحاننىڭ اماناتى» سپەكتاكلى ساحنالانادى. وبلىستىق مۋزەي جانە كىتاپحانالاردا «ەركىن ەلدىڭ ەرتەڭى» مەرەكەلىك ءىس-شارالار, ادەبي-سازدى كەشتەر, كىتاپ كورمەلەرى, مادەنيەت ۇيلەرىندە مەرەكەلىك كونتسەرتتەر ۇيىمداستىرىلماق. سونداي-اق, 25 قازان كۇنى ساعات 19:00-دە بەينەۋ اۋدانى بەينەۋ اۋىلىندا «تەكتى جىردىڭ سازىمەن, بابالار رۋحىن وياتام» اتتى قازاقستاننىڭ ەڭبەك سىڭىرگەن قايراتكەرى, دارىن مەملەكەتتىك جاستار سىيلىعىنىڭ يەگەرى ايگۇل ەلشىباەۆانىڭ شىعارماشىلىق كونتسەرتى ۇيىمداستىرىلادى, دەدى اسەم ءاشىروۆا.
ماڭعىستاۋ وبلىسى
