قازاقستاندا اجىراسۋ كورسەتكىشى ازايىپ كەلەدى

ال 2023 جىلى وسال ساناتتاعى وتباسىلاردى قولداۋعا باعىتتالعان الەۋمەتتىك كودەكس قابىلدانعان ەدى. قۇجاتتا كوپبالالى جانە تابىسى تومەن وتباسىلارعا ارنالعان ناقتى الەۋمەتتىك قولداۋ شارالارى, سونداي-اق انا مەن بالا قۇقىعىن قورعاۋ تەتىكتەرى قاراستىرىلعان. ەل ومىرىندەگى ماڭىزدى كەزەڭدەردىڭ ءبىرى – ايەلدەردىڭ قۇقىعىن قامتاماسىز ەتۋ جانە بالالاردىڭ قاۋىپسىزدىگىن كۇشەيتۋ ماقساتىندا قابىلدانعان زاڭنامالىق وزگەرىستەر. وسى زاڭ اياسىندا قازاقستاندا تۇرمىستىق زورلىق-زومبىلىق قىلمىستىق جاۋاپكەرشىلىككە جاتقىزىلىپ, بالالارعا قاتىستى كەز كەلگەن زورلىق-زومبىلىق تۇرىنە قاتاڭ جازا ەنگىزىلدى.

وتباسى ينستيتۋتىن نىعايتۋ جانە كامەلەتكە تولماعانداردىڭ قاۋىپسىزدىگىن قامتاماسىز ەتۋگە باعىتتالعان جاڭا نورمالار قابىلداندى. وسى ماقساتتا بۇرىن قىزمەت ەتىپ كەلگەن وتباسىن قولداۋ ورتالىقتارىنىڭ جۇمىسى قايتا قۇرىلىپ, ولاردىڭ قىزمەتى بىرىڭعاي مودەل بويىنشا جۇيەلەندىرىلدى. ناتيجەسىندە مۇنداي ورتالىقتاردىڭ سانى ەل بويىنشا ءتورت ەسە, 33-تەن 131-گە دەيىن ارتقان.

مادەنيەت جانە اقپارات مينيسترلىگىنىڭ مالىمەتىنشە, وتباسى مەن نەكەنى ساقتاۋ جانە نىعايتۋعا ارنالعان 2025-2027 جىلدارعا ارنالعان ءىس-شارالار جوسپارى ازىرلەنىپ, بەكىتىلگەن. جوسپار وتباسى ومىرىنە سانالى دايىندىقتى ارتتىرۋعا جانە اجىراسۋدىڭ الدىن الۋعا باعىتتالىپ وتىر. 

ۇلتتىق ستاتيستيكا بيۋروسىنىڭ دەرەكتەرىنشە, كەيىنگى بەس جىلدا قازاقستاندا اجىراسۋ سانى 16%-عا تومەندەگەن. ەگەر 2020 جىلى تىركەلگەن اجىراسۋ سانى 48,2 مىڭ بولسا, 2024 جىلى بۇل كورسەتكىش 40,5 مىڭعا دەيىن ازايعان. 2024 جىلى نەكەگە تۇرۋعا ءوتىنىش بەرۋشىلەرگە ارنالعان تەگىن الدىن الا كەڭەس بەرۋ جانە وقىتۋ جوباسى ىسكە قوسىلعان. جوبا شىمكەنت جانە استانا قالالارىندا پيلوتتىق رەجيمدە جۇزەگە اسىرىلعان.