فوتو: ۇكىمەتتىڭ ءباسپاسوز قىزمەتى
بيىلعى جىلدان باستاپ ەلىمىزدە ءبىلىم بەرۋ سالاسىندا ايتارلىقتاي سەرپىلىس بايقالادى. مەكتەپكە دەيىنگى تاربيە باعىتىندا 26,6 مىڭ ورىنعا ارنالعان 303 جاڭا بالاباقشا اشىلىپ, بۇلدىرشىندەرگە قولايلى جاعداي جاسالدى. الەۋمەتتىك تۇرعىدان از قامتىلعان وتباسىلاردىڭ بالالارى تەگىن تاماقپەن قامتاماسىز ەتىلىپ وتىر. سونداي-اق, اتا-انالارعا ارنالعان 5,5 مىڭنان استام كەڭەس بەرۋ ورتالىعى جۇمىس ىستەيدى.
جاڭاشىل تەتىكتەردىڭ ءبىرى – «اقشا بالانىڭ سوڭىنان جۇرەدى» قاعيداتىنا نەگىزدەلگەن ۆاۋچەرلىك قارجىلاندىرۋ جۇيەسى. قازىرگى تاڭدا بۇل جوبا 20 قالا مەن 7 اۋداندا سىناقتان ءوتىپ, 4,8 مىڭعا جۋىق بالاباقشا قاتىسىپ وتىر. 671 مىڭنان استام ۆاۋچەر بەرىلىپ, سونىڭ ناتيجەسىندە بالاباقشاعا كەزەك ەكى ەسەگە جۋىق قىسقارعان.
ورتا ءبىلىم سالاسىندا دا تىڭ جوبالار جۇزەگە اسىپ جاتىر. 2024–2025 جىلدارى رەسپۋبليكا بويىنشا 359 جاڭا مەكتەپ پايدالانۋعا بەرىلدى. ونىڭ ىشىندە «كەلەشەك مەكتەپتەرى» جوباسى اياسىندا 173 ءبىلىم ورداسى اشىلدى. بيىلدىڭ وزىندە 102 مەكتەپ سالىنىپ, جىل سوڭىنا دەيىن تاعى 92 نىساننىڭ قۇرىلىسى اياقتالادى دەپ جوسپارلانعان. سونىمەن قاتار, 245 مەكتەپتە كۇردەلى جوندەۋ جۇرگىزىلىپ, 95 مىڭنان استام وقۋشىنىڭ وقۋىنا قولايلى ورتا قالىپتاسادى.
سونىمەن قاتار 2025 جىلدىڭ العاشقى توعىز ايىندا بالالاردى قوسىمشا بىلىممەن قامتۋ كورسەتكىشى 87,2 %-عا جەتكەن. وقۋشىلاردىڭ 62 %-ى تەگىن ۇيىرمەلەر مەن سەكتسيالارعا قاتىسقان, بۇل وتكەن جىلمەن سالىستىرعاندا 10 %-عا جوعارى. قوسىمشا ءبىلىم بەرۋ ۇيىمدارىنىڭ سانى دا ارتىپ, قازىرگى تاڭدا ولاردىڭ جالپى سانى ەكى مىڭنان استى.
سونىمەن قاتار, بىرنەشە قالادا ۇيىرمەلەر مەن سەكتسيالارعا جازىلۋدى جەڭىلدەتەتىن پيلوتتىق تسيفرلىق جوبا جۇزەگە اسىرىلىپ جاتىر.
