فوتو: قىرمىزى جۇماعاليقىزى
ۇكىمەتتىڭ ءباسپاسوز قىزمەتىنىڭ حابارلاۋىنشا, بيىلعى جىلدىڭ سوڭىنا دەيىن شىعىس قازاقستان وبلىسىنىڭ ريددەر قالاسىندا كوپبەيىندى اۋرۋحانا, وسكەمەندە گەماتولوگيا ورتالىعىنىڭ جانە ماڭعىستاۋ وبلىسىنىڭ اقتاۋ قالاسىندا جەدەل جاردەم ستانساسىنىڭ قۇرىلىسىن اياقتاۋ جوسپارلانعان.
سونىمەن قاتار «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 601 مەديتسينالىق-سانيتاريالىق العاشقى كومەك نىسانى بوي كوتەردى. جىل سوڭىنا دەيىن تاعى 54 جاڭا نىساننىڭ قۇرىلىسى اياقتالماق.
«سونىمەن قاتار 32 اۋداندىق اۋرۋحانانى كوپبەيىندى ورتالىق اۋداندىق اۋرۋحانا دەڭگەيىنە دەيىن جاڭعىرتۋ جۇمىستارى جالعاسۋدا. سونىڭ ىشىندە ۇلتتىق جوبا باستالعالى قاراعاندى وبلىسىنىڭ تەمىرتاۋ جانە بالقاش قالالارىنداعى, ۇلىتاۋ وبلىسىنىڭ جاڭاارقا اۋدانىنداعى ورتالىق اۋرۋحانالار, اباي وبلىسىنىڭ ءۇرجار اۋداندىق ورتالىق اۋرۋحاناسى, سونداي-اق جامبىل وبلىسىنداعى شۋ, مەركى جانە تالاس اۋداندىق ورتالىق اۋرۋحانالارى مەن ماڭعىستاۋ وبلىسىنداعى بەينەۋ اۋداندىق ورتالىق اۋرۋحاناسى – بارلىعى سەگىز اۋرۋحانا كوپبەيىندى ەتىپ قايتا ۇيىمداستىرىلدى», دەلىنگەن حابارلامادا.
ايتا كەتەيىك, قاڭتار-قازان ايلارى ارالىعىندا دەنساۋلىق ساقتاۋ سالاسىنا سالىنعان ينۆەستيتسيا كولەمى دە ايتارلىقتاي بولعان. نەگىزگى كاپيتالعا باعىتتالعان قاراجات 214,8 ملرد تەڭگەنى قۇراپ, جوسپاردىڭ 89 پايىزىن قۇراعان.
