فوتو: businessmir.kz
كەيىنگى ءۇش جىلدا تەلەكوممۋنيكاتسيا سالاسىنا 1 ترلن تەڭگەدەن استام ينۆەستيتسيا باعىتتالعان. بۇل ەلدەگى ينتەرنەتتىڭ ورتاشا جىلدامدىعىن 94 مبيت/س دەيىن ارتتىرۋعا مۇمكىندىك بەرگەن.
«سالانى دامىتۋ 2024–2027 جىلدارعا ارنالعان «قولجەتىمدى ينتەرنەت» ۇلتتىق جوباسى اياسىندا جۇزەگە اسىرىلۋدا. 2027 جىلدىڭ سوڭىنا دەيىن حالىقتىڭ 100%-ى ينتەرنەتپەن قامتىلادى. ينتەرنەت جىلدامدىعى 100 مبيت/س-تان اسىپ, وپتيكالىق بايلانىس جەلىلەرى اۋىلدىق ەلدى مەكەندەردىڭ 90%-ىنا دەيىن تارتىلادى», دەدى جاسلان ماديەۆ.ۆيتسە-پرەمەر 2026 جىلدىڭ سوڭىنا دەيىن تاعى 3000-نان استام اۋىلدى ماگيسترالدى تالشىقتى-وپتيكالىق بايلانىس جەلىسىنە قوسۋ كوزدەلگەنىن اتاپ ءوتتى. وسىلايشى اۋىلداردىڭ 90%-دان استامى سىمدى تەحنولوگيالار ارقىلى جوعارى جىلدامدىقتى ينتەرنەتكە قوسىلادى. وسى جوبالاردى جۇزەگە اسىرۋ ءۇشىن 2027 جىلدىڭ سوڭىنا دەيىن جالپى كولەمى 323 ملرد تەڭگەنى قۇرايتىن ينۆەستيتسيا قاراستىرىلعان. شاعىن اۋىلداردىڭ قالعان 10%-ى سپۋتنيكتىك تەحنولوگيالار ارقىلى ينتەرنەتپەن قامتاماسىز ەتىلەدى. سونىمەن قاتار جاسلان ماديەۆ ءموبيلدى جەلىلەرمەن قامتۋ كولەمى دە ارتاتىنىن تىلگە تيەك ەتتى. ماسەلەن, 4G جەلىسى بارلىق ەلدى مەكەندەردىڭ 92%-ىنا دەيىن جەتەدى. ال 5G جەلىسى وبلىستىق جانە رەسپۋبليكالىق ماڭىزى بار 20 قالاعا ەنگىزىلىپ, قالالاردىڭ 60-75% اۋماعىن قامتيتىن بولادى. 2027 جىلدىڭ سوڭىنا دەيىن 40 000 شاقىرىم اۆتوجول بويى 4G ءموبيلدى ينتەرنەتىمەن قامتاماسىز ەتىلەدى.
مينيستر ينتەرنەت جانە ءموبيلدى بايلانىس ارقىلى جاسالاتىن الاياقتىقپەن كۇرەسۋ جولىندا قابىلدانىپ جاتقان شارالار تۋرالى دا باياندادى.
«مينيسترلىك بايلانىس وپەراتورلارى ءۇشىن جاڭا تالاپتار ەنگىزدى. ونىڭ ىشىندە ابونەنتتەردى بيومەتريالىق يدەنتيفيكاتسيالاۋ, فرود ارەكەتتەرىن زاڭسىز ترافيككە تەڭەستىرۋ, وپەراتورلاردىڭ انتيفرود جۇيەلەرى مەن ۇلتتىق بانك اراسىنداعى ءوزارا ارەكەتتەسۋ ءتارتىبىن ناقتىلاۋ قاراستىرىلعان. قابىلدانعان شارالار 2024 جىلدىڭ باسىنان بەرى 30 ملن-نان استام كۇدىكتى قوڭىراۋلارعا توسقاۋىل قويۋعا مۇمكىندىك بەردى», دەپ اتاپ ءوتتى ۆيتسە-پرەمەر.
