اكىم تارازي سانالى عۇمىرىن ءسوز ونەرىنە ارناپ, ءتول ادەبيەتىمىز بەن مادەنيەتىمىزدى دامىتۋعا زور ۇلەس قوستى. دارىندى قالامگەر ادەبيەتتەگى شىعارماشىلىعىن «قۇيرىقتى جۇلدىز» پوۆەسىنەن باستاپ, «تاسجارعان», «كەن», «جازا», «شەر», «ماحاببات جىرى», «قيانات» سىندى قالىڭ وقىرمان ىزدەپ ءجۇرىپ وقيتىن بىرنەشە روماندى دۇنيەگە اكەلدى.
دراماتۋرگيا مەن قازاق كينو ونەرىنە دە وشپەس ءىز قالدىرىپ, «كۇلمەيتىن كومەديا», «جاقسى كىسى», «جولى بولعىش جىگىت», «قوس بوزداق» سەكىلدى پەسالاردى, «تۇلپاردىڭ ءىزى», «ارمان اتامان», «قاراش-قاراش وقيعاسى», «قىزجىلاعان», «مۇستافا شوقاي» سىندى قازاق كينو ونەرىنىڭ التىن قورىنا ەنگەن فيلمدەردىڭ ستسەناريلەرىن جازدى.
وسىنداي تىنىمسىز ىزدەنىسى ارقىلى قازاق پروزاسىنىڭ تىنىسىن كەڭەيتىپ, «ادەبيەت الەمىنىڭ اكىمى» دەگەن ارداقتى اتتى يەلەنگەن قالامگەر ءومىرىنىڭ سوڭعى جىلدارى استانا قالاسىنىڭ رۋحاني كەمەلدەنۋىنە دە ايانباي تەر توكتى.
اكىم تارازي تۇرعان ءۇيدىڭ قابىرعاسىنا ورناتىلعان ەسكەرتكىش تاقتانىڭ اشىلۋ سالتاناتىندا قازاق ادەبيەتىنىڭ كورنەكتى وكىلى, جازۋشى تولەن ابدىك جازۋشىنىڭ ەكىنشى ءومىرى باستالعانىن تىلگە تيەك ەتتى.
«دۇنيەدەن وتكەن تۇلعالاردى ەسكە الۋ حالقىمىزدىڭ داستۇرىندە بار. ۇلتىمىزدىڭ دارىندى جازۋشىلارى از ەمەس, دەسە دە اكىم اعانىڭ ورنى ءبىز ءۇشىن ەرەكشە. ءبىز ادەبيەتتىڭ تابالدىرىعىن ەندى اتتاعان كەزدە اكىم ءاشىموۆ دەگەن اتپەن ەل-جۇرتقا بەلگىلى جازۋشى بولاتىن. بىراق ول كىسىنىڭ ءوزىن زور ساناپ, كەيىنگى ىنىلەرىنە جوعارىدان قاراعان كەزىن كورمەدىك. قاتارىنداي كورىپ, ءبارىمىزدى باۋىرىنا باستى. تاعى ءبىر ايتاتىنىم, اعامىزدىڭ اكەسى ۇرتاي عابيت مۇسىرەپوۆتىڭ دوسى بولعان زيالى ادام ەدى. سول كىسىلەردەن اكىم اعامىزدىڭ بويىنا كىسىلىك قاسيەت, قاراپايىمدىلىق پەن مەيىرىمدىلىك دارىعان دەپ ويلايمىن. مىنە, ەسكەرتكىش تاقتا اشۋ ارقىلى اعامىزدىڭ ەكىنشى, ياعني ماڭگىلىك ءومىرىنىڭ باستالعانىنا كۋا بولىپ وتىرمىز», دەدى جازۋشى.
ەسكەرتكىش تاقتانىڭ اشىلۋىندا سەنات دەپۋتاتى دارحان قىدىرالى سەنات توراعاسى ماۋلەن اشىمباەۆتىڭ جۇرەكجاردى سالەمىن جەتكىزىپ, اكىم تارازي ەسىمىن ەل ەسىندە ماڭگىلىككە قالدىرۋ ماقساتىنداعى جۇمىستىڭ باستالعانىنا ريزاشىلىعىن ءبىلدىردى. بولاشاقتا قالامگەر تۇرعان ءۇيدىڭ ماڭىنا جاڭادان سالىنعان مەكتەپكە اكىم تارازي اتىن بەرۋ تۋرالى باستاما كوتەرۋگە بولاتىنىن دا تىلگە تيەك ەتتى. ال ءماجىلىس دەپۋتاتى امانجول التاەۆ بۇگىنگى كۇننىڭ ەرەكشە ك ۇلىمدەپ تۇرۋىن اكىم تارازيدىڭ جايدارى مىنەزىمەن بايلانىستىرا كەلىپ: «كەيىنگى ۇرپاققا اتالى جىلى ءسوزىن ايتاتىن اقساقالدارى جوق زاماندا اكىم اعانىڭ «اينالايىن» دەگەن ءسوزىن ساعىنامىز. سول ءسوزىن ەستىگەندە ات مىنگەندەي ارقالانىپ قالۋشى ەدىك», دەدى.
ەسكەرتكىش تاقتا اشىلعاننان كەيىن ءىس-شارا كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە جالعاستى. جۇرتشىلىق «شابىت» اتاپ كەتكەن ونەر ورداسىنداعى ەڭ ۇلكەن ءماجىلىس زالى اكىم تارازي اتىنا بەرىلدى.
ۋنيۆەرسيتەت رەكتورى عالىم احمەدياروۆ: «اعامىزدىڭ جارى روزا مۇقانوۆا بىزگە كەلىپ, قالامگەردىڭ ەسىمىن ۇلىقتاۋ ماقساتىندا ءبىر اۋديتوريانىڭ اتاۋىن اكىم تارازي اتىنا بەرۋگە ۇسىنىس جاسادى. ءبىز وقۋ ورداسىنىڭ دامۋىنا ەرەن ەڭبەگى سىڭگەن جازۋشىنىڭ ەسىمى شاعىن اۋديتوريادان گورى ۋنيۆەرسيتەت عيماراتىنداعى ەڭ ۇلكەن ءماجىلىس زالىنا لايىق دەپ تاپتىق», دەدى. ال ءماجىلىس دەپۋتاتى جاناربەك ءاشىمجان اكىم تارازي باستاعان قالامگەرلەردىڭ ەلىمىزدىڭ ازاتتىق الۋ جولىنداعى ەڭبەگىنە تالداۋ جاسادى. «ەسكەرتكىش تاقتانىڭ اشىلۋى مەن ءماجىلىس زالىنا اكىم تارازيدىڭ ەسىمىنىڭ بەرىلۋى ۇلتتىڭ ونەرىنە جاسالعان قۇرمەت دەپ باعالاۋىمىز كەرەك. قازاق ەلىنىڭ تاۋەلسىزدىك الۋ جولىندا قانشاما قالامگەرلەرىمىز كۇرەستى. سونىڭ بىرەگەيى اكىم تارازي ەكەنىنە كۇمان جوق», دەدى.
قازاقستاننىڭ حالىق ءارتىسى, قازاقستاننىڭ ەڭبەك ەرى ايمان مۇساقوجاەۆا اكىم تارازيدى كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنە قىزمەتكە شاقىرعانىن, «ەڭبەك ەرى» اتاعىن العاندا ۇجىم بولىپ قۋانعانىن ايتىپ, ماعىنالى ەستەلىگىن جەتكىزدى.
