اتاقتى سۋرەتشىنىڭ ايگىلى تۋىندىلارىن ەلگە جەتكىزۋ وڭايعا سوقپاعان. بۇل جۇمىستاردى مۋزەي ءبىر جىلعا جۋىق كۇتىپ, جالعا الۋ ارقىلى اكەلىپتى.
«پيكاسسو كوزى تىرىسىندە وتە تانىمال بولدى, كەزىندە ونىڭ ەڭبەكتەرىنە «قۇدا تۇسپەگەن» كىسى كەمدە-كەم. سۋرەتشى مايلى بوياۋمەن ءبارىن ۇلگەرىپ جازا المايتىن ەدى. سول سەبەپتى ليتوگرافيا – ارنايى ستانوك ارقىلى جاسالاتىن باسىلىم, قازىرگى تىلمەن ايتقاندا پرينت, ەرەكشە ماڭىزعا يە. ويتكەنى بۇلار شەكتەۋلى سەريامەن شىعادى, سۋرەتشىنىڭ قولتاڭباسىمەن راسىمدەلەدى, ال الەمدە مۇندايدى جاسايتىن بىرنەشە عانا كومپانيا بار», دەيدى «Lumiere-Hall» مۋزەيىنىڭ تەڭ قۇرىلتايشىسى ماكسيم ەگارمين.
كوللەكتسيانىڭ قۇندىلىعى – پيكاسسو شىعارماشىلىعىنىڭ ءارتۇرلى كەزەڭدەرىن قامتيتىنىندا. وندا كلاسسيكالىق مەكتەپتەن باستاپ مينيماليزم مەن كۋبيزمگە دەيىنگى ىزدەنىستەر كورىنىس تاپقان.
كورمەدە «بارسەلونانىڭ كوگىلدىر ءتۇسى» اتتى كۇندەلىكتى ءومىر كورىنىستەرىنە ارنالعان سەريا, سونداي-اق اتاقتى «گەرنيكا» كارتيناسىن جاساۋ بارىسىن سيپاتتايتىن ماتەريالدار ۇسىنىلعان. «پاپە-كوللە» ءبولىمى سۋرەتشىنىڭ كۋبيزمگە كوزقاراسىن اشادى, ال جەكە ءبولىم پيكاسسونىڭ سوعىستان كەيىنگى كەزەڭدەگى كورريدا تاقىرىبىنا قىزىعۋشىلىعىنا ارنالعان. ەكسپوزيتسيا «سوعىس جانە بەيبىتشىلىك» سەرياسىمەن تۇيىندەلەدى.
بۇعان دەيىن كورمە الماتىدا وتكەن. ەگارميننىڭ ايتۋىنشا, وندا كورەرمەندەر اراسىندا ەڭ كوپ قىزىعۋشىلىق تۋدىرعانى – پيكاسسو ايەلدەرىنىڭ پورترەتتەرى.
استاناداعى كورمەنى 9 قاراشاعا دەيىن «Kulanshi Art» گالەرەياسىنان تاماشالاۋعا بولادى.
