فوتو: gov.kz
مەملەكەتتىك كەڭەسشى پرەزيدەنت قاسىم-جومارت توقاەۆتىڭ وليمپيادا قاتىسۋشىلارىنا ارناعان قۇتتىقتاۋ ءسوزىن وقىپ بەردى. مەملەكەت باسشىسىنىڭ سوزىندە ەلىمىزدىڭ ينكليۋزيۆتىلىك قاعيداتى نەگىزىندە شاحماتتى جان-جاقتى دامىتۋعا بەلسەندى ۇلەس قوسىپ جاتقانى ايتىلعان. اتالعان وليمپيادا مەملەكەتىمىزدىڭ شاحماتقا ايرىقشا كوڭىل بولەتىنىن ءبىلدىرىپ قانا قويماي, سونداي-اق ادىلەتتى قازاقستان تۇجىرىمداماسىنا ساي بارشاعا تەڭ مۇمكىندىكتەر ۇسىنۋ قاعيداتىن ىلگەرىلەتۋگە بەيىل ەكەنىن كورسەتەدى.
ەرلان قارين ءوز سوزىندە مەملەكەتتىڭ جۇرگىزىپ وتىرعان الەۋمەتتىك ساياساتىندا ازاماتتاردىڭ بارلىعىنا تەڭ جاعداي جاساۋعا باسا ءمان بەرىلەتىنىن جەتكىزدى. مۇمكىندىگى شەكتەۋلى جانە ەرەكشە ءبىلىم الۋ قاجەتتىلىگى بار ادامدار ءۇشىن جۇيەلى ءارى كەشەندى شارالار قابىلدانىپ جاتىر.
شاحمات وليمپياداسىندا الەمنىڭ 32 ەلىنەن كەلگەن 35 كوماندا باق سىنايدى. ولاردىڭ قاتارىندا پولشا (2023 جىلعى شاحمات وليمپياداسىنىڭ جەڭىمپازى), ماجارستان, گەرمانيا, يزرايل, سولتۇستىك ماكەدونيا, سەربيا, ۋكراينا, حورۆاتيا, چەحيا, بانگلادەش, ءۇندىستان, ميانما, ءباا, وزبەكستان, فيدە-1, فيليپپين, ارگەنتينا, ۆەنەسۋەلا, كولۋمبيا, پاناما, اقش, چيلي, كۋبا, مىسىر, زامبيا, زيمبابۆە, كەنيا جانە ۋگاندا ەلدەرىنىڭ قۇرامالارى بار. ال جارىستى ۇيىمداستىرۋشى ەل رەتىندە قازاقستاننان ەكى قۇرام ونەر كورسەتىپ جاتىر.
ءىى شاحمات وليمپياداسى – «تورتكە ءتورت» فورماتىنداعى كوماندالىق جارىس. ارالاس كوماندالار ءۇش ساناتتاعى ويىنشىلاردان قۇرىلا الادى: ەستۋ قابىلەتى بۇزىلعاندار, كورۋ قابىلەتى بۇزىلعاندار جانە تىرەك-قيمىل اپپاراتى زاقىمدانعاندار (تقاز). ءار كوماندادا كەم دەگەندە ءبىر ايەل ويىنشى جانە قاجەت بولعان جاعدايدا, كەم دەگەندە ەكى حالىقارالىق شاحمات فەدەراتسياسى (فيدە) رەيتينگىندەگى ويىنشى بولۋعا ءتيىس.
شاحمات وليمپياداسى قازاننىڭ 20-26 كۇندەرى وتەدى.
