فوتو: istockphoto.com
ۇكىمەتتىڭ ءباسپاسوز قىزمەتىنىڭ مالىمەتىنشە, قازىرگى تاڭدا قازاقستان بويىنشا 6 179 ەلدى مەكەننىڭ باسىم بولىگى بايلانىسپەن قامتىلعان. ولاردىڭ ىشىندە 119 قالا مەن 4 906 اۋىلدا ينتەرنەت جەلىسى بار. اۋىلدىق ەلدى مەكەندەردىڭ 2 724-ءى 3G, ال 2 182-ءسى 4G تەحنولوگياسى ارقىلى قوسىلعان. سونىمەن قاتار 1 902 اۋىل ADSL جەلىسى ارقىلى, ال 2 654 اۋىل تالشىقتى-وپتيكالىق بايلانىس جۇيەسىمەن (توبج) ينتەرنەتكە تىركەلگەن.
«2027 جىلدىڭ سوڭىنا قاراي تاعى 3 مىڭ اۋىلدى جوعارى جىلدامدىقتى ينتەرنەتكە قوسۋ جوسپارلانۋدا. قوسىمشا 504 شالعاي ەلدى مەكەندى سپۋتنيكتىك تەحنولوگيالاردى پايدالانا وتىرىپ جەلىگە قوسۋ جوسپارلانۋدا. ونىڭ 176-سى KazSat ارقىلى بايلانىسپەن قامتاماسىز ەتىلگەن, ال 2025 جىلدىڭ سوڭىنا دەيىن تاعى 328 اۋىل OneWeb ارقىلى قوسىلاتىن بولادى», دەلىنگەن حابارلامادا.
ماڭىزدى جاڭالىقتاردىڭ ءبىرى — 2025 جىلعى ماۋسىمدا Starlink كومپانياسىمەن جاسالعان كەلىسىم. وسى كەلىسىمنىڭ ارقاسىندا 13 تامىزدان باستاپ Starlink قازاقستان اۋماعىندا رەسمي تۇردە قىزمەت كورسەتە باستادى. قازىردىڭ وزىندە بۇل سپۋتنيكتىك ينتەرنەت جۇيەسى 1,7 مىڭنان استام اۋىل مەكتەبىن ينتەرنەتپەن قامتاماسىز ەتىپ وتىر.
جالپى العاندا, 2025–2027 جىلدار ارالىعىندا ءۇش مىڭنان استام اۋىلدىق ەلدى مەكەن جوعارى جىلدامدىقتى ينتەرنەتكە قوسىلىپ, اۋىل تۇرعىندارىنىڭ تسيفرلىق مۇمكىندىكتەرى ايتارلىقتاي كەڭەيمەك.
