فوتو: سۋ رەسۋرستارى جانە يرريگاتسيا مينيسترلىگى
ۆەدومستۆو باسشىسى كوكسۋ اۋدانىندا يسلام دامۋ بانكىنىڭ قولداۋىمەن جۇزەگە اسىرىلىپ جاتقان يرريگاتسيالىق جانە درەناجدىق جۇيەلەردى رەكونسترۋكتسيالاۋ جوباسىن تەكسەردى, ءبىرىنشى كەزەڭ بويىنشا جوندەلىپ جاتقان 108,7 شاقىرىمدىق 9 كانال 2026 جىلى اياقتالادى.
اقسۋ اۋدانىندا كانالداردى بەتونداۋ جۇمىستارىنىڭ 75 پايىزى ورىندالعان تولىق اياقتاۋ كەلەسى جىلعا جوسپارلانعان, ناتيجەسىندە 11 مىڭ گەكتار جەرگە تۇراقتى سۋ جەتكىزىلەدى. بيىل قىركۇيەك ايىندا اقسۋ اۋدانىندا كۇردەلى رەكونسترۋكتسيادان كەيىن قىزىلاعاش سۋ قويماسى پايدالانۋعا بەرىلدى. قازىرگى ۋاقىتتا مينيسترلىكتىڭ سۋ شارۋاشىلىعى كوميتەتى قىزىلاعاش ءماسسيۆىن سالۋ جوباسىن جۇزەگە اسىرىپ جاتىر. بۇل جوبا اقسۋ اۋدانىنداعى سۋارمالى جەر كولەمىن 4 500 گەكتارعا ارتتىرۋعا مۇمكىندىك بەرەدى.
ن.نۇرجىگىتوۆ جۇمىستاردى بەلگىلەنگەن مەرزىمدە اياقتاۋدى تاپسىرىپ, جوبالاردىڭ سۋارمالى جەرلەردىڭ كولەمىن كوبەيتۋگە باعىتتالعانىن اتاپ ءوتتى.
«بارلىق جۇمىس كەستەگە ساي ءجۇرىپ جاتىر جانە ۋاقىتىندا اياقتالۋى كەرەك. ءبىزدىڭ مينيسترلىك اۋقىمدى جوبالاردى جۇزەگە اسىرۋ ءۇشىن ينۆەستيتسيالار مەن گرانتتىق قاراجاتتى بەلسەندى تارتىپ وتىر. ەندى وسى باستامالاردى سوڭىنا دەيىن جەتكىزۋ قاجەت. اگرارلىق سەكتوردى ساپالى ءارى ۋاقىتىلى سۋمەن قامتاماسىز ەتۋ – ءبىزدىڭ باستى مىندەتتەرىمىزدىڭ ءبىرى», دەدى مينيستر.
