2024 جىلى 4 قاڭتاردا التىن كەنىشىندە ىشىندە ادامدار بار اۆتوبۋس جەر استىنا ءتۇسىپ كەتكەن ەدى. اپات سالدارىنان ءتورت قۇتقارۋشى ەرلىكپەن قازا تاپتى. ولار – ايدوس شايمەردەن, ولەگ تىشكەۆيچ, سارقىت بەردىحان, ايىپ تىلەۋبەرگەنوۆ.
– تاۋكەن قۇتقارۋشىسى – ەڭ قاۋىپتى ءارى قۇرمەتتى ماماندىقتاردىڭ ءبىرى. ولار ءار ساپارعا ءوز ءومىرىن قاتەرگە تىگە وتىرىپ, وزگەلەردىڭ ءومىرىن قۇتقارۋعا اتتانادى. ولاردىڭ ەرلىگى ماڭگى ەستە ساقتاۋعا لايىق. وسىناۋ سىن ساتىندە بىرگە بولىپ, قيىندىقتى بىرگە ەڭسەرگەن كەنت تۇرعىندارىنا شەكسىز العىسىمىزدى بىلدىرەمىز. باتىرلارىمىزدىڭ ەرلىگى بولاشاق ۇرپاققا جانقيارلىقتىڭ ۇلگىسى بولىپ قالا بەرەدى, – دەدى مەموريالدىق ەسكەرتكىشتىڭ اشىلۋىندا پاۆلودار وبلىسى اكىمىنىڭ ءبىرىنشى ورىنباسارى سەرىك باتىرعۇجينوۆ.
ايدوس شايمەردەننىڭ جارى نۇرسۇلۋ شايمەردەن شەيىت بولعان باتىرلارىمىزدىڭ رۋحىنا كورسەتىلگەن قۇرمەت ءۇشىن كوپشىلىككە ريزاشىلىعىن جەتكىزدى. جينالعاندار مەموريالدىق كەشەنگە گۇل شوقتارىن قويىپ, تاعزىم ەتتى.
ايتا كەتەلىك, استانا سوتى قۇتقارۋشىلاردىڭ ولىمىنە جۇمىس بەرۋشى تاراپ كىنالى دەپ تانىعان ەدى. كەيىن كىنالى تۇلعالار رەتىندە التى ادام ۇستالدى. ولاردىڭ ءىسى قازىرگى ۋاقىتتا ەكىباستۇز قالالىق سوتىندا قارالىپ جاتىر.
پاۆلودار وبلىسى
