پلاتفورما ادامنىڭ جۇرەك-قان تامىرلارى جۇيەسىندەگى اۋىتقۋلاردى دەر كەزىندە انىقتاپ, قاۋىپ دەڭگەيىن اۆتوماتتى تۇردە باعالايدى. عالىمداردىڭ بۇل ازىرلەمەسى مەديتسينا قىزمەتكەرلەرىنىڭ جۇمىسىن جەڭىلدەتەدى.
پلاتفورمانى قولدانۋ ءۇشىن PDF فورماتىنداعى قان تالداۋىنىڭ ناتيجەسىن جۇكتەۋ قاجەت. مۇنىمەن قوسا ارنايى ساۋالنامادان وتەدى. كەيىن جۇيە بارلىق اقپاراتتى جىلدام وڭدەپ, قاۋىپتىڭ بار-جوعىن انىقتاپ بەرەدى. ال ادام ومىرىنە قاۋىپ بولسا, ناۋقاسقا بىردەن دارىگەرگە جۇگىنۋدى ۇسىنادى.
«اتالعان جوبانىڭ باستى ارتىقشىلىعى – جىلدامدىعىندا. ەكىنشىدەن – دالدىك. «Zhurek AI» مىڭداعان ناقتى مەديتسينالىق دەرەككە سۇيەنىپ وقىتىلعان, سوندىقتان كەيدە دارىگەرلەر بايقاماي قالاتىن جاسىرىن اۋىتقۋلاردى دا كورە الادى. بۇل ەرتە دياگنوستيكا ءۇشىن وتە ماڭىزدى. پلاتفورما جۇمىسى كۇردەلى الگوريتمنەن تۇرادى. ونىڭ ىشىندە تەرەڭ نەيروندىق جەلىلەر (DNNs) جانە ۇلكەن مارجالى وپورلىق ۆەكتورلار ءادىسى (Large-margin SVMs) تۇر, ولار دياگنوستيكانىڭ جانە قاۋىپتەردى جىكتەۋدىڭ جوعارى دالدىگىن قامتاماسىز ەتەدى», دەيدى جاساندى ينتەللەكت جانە ينتەرنەت زاتتار زەرتحاناسىنىڭ عىلىمي قىزمەتكەرى ءاسيا بالتاباەۆا.
جوبانى عىلىم جانە جوعارى ءبىلىم مينيسترلىگى قارجىلاندىرعان. زەرتتەۋشى-عالىمدار پلاتفورما جونىندە عىلىمي جۋرنالداردا ماقالا جاريالاپ, ءتۇرلى كونكۋرسقا قاتىسقان.
يننوۆاتسيالىق پلاتفورمانى ازىرلەۋدە قازۇۋ-دىڭ 15 عالىمى بىرلەسىپ جۇمىس ىستەدى. بولاشاقتا ماماندار پلاتفورمانى ءساتتى ىسكە قوسىپ, كوممەرتسيالاندىرۋدى جوسپارلاپ وتىر.
الماتى
