ءبىر كەزدەرى دوستارىمەن بىرگە ىشىمدىك ىشكەن سوڭ اقشاسى تاۋسىلعان جاس جىگىت جەڭىل جولمەن پايدا تابۋعا بەل بۋىپ, دۇكەن توناۋعا بارعان. بۇل ارەكەتىنىڭ سالدارى اۋىر بولدى, سوت ۇكىمىمەن ول 4 جىلعا باس بوستاندىعىنان ايىرىلدى.
قازىر ەۆگەني قىلمىستىق-اتقارۋ جۇيەسى دەپارتامەنتىنىڭ قوستاناي وبلىسى بويىنشا مەكەمەسىندە جازاسىن وتەپ جاتىر. ول ءوزىنىڭ وتكەنىنە وكىنىپ, جاستارعا ويلانباي جاساعان ارەكەت ءومىردى تۇبەگەيلى وزگەرتىپ جىبەرەتىنىن ەسكەرتەدى.
«بوستاندىقتىڭ قادىرىن ونى جوعالتقاندا عانا تۇسىنەسىڭ. ءبىر ساتتىك شەشىم, ءبىر قاتە قادام – بۇكىل ءومىرىڭدى بۇزۋى مۇمكىن. ەركىندىكتى باعالاڭىزدار, جانىڭىزداعى جاقىندارىڭىزدى قادىرلەڭىزدەر», – دەيدى ەۆگەني.
ونىڭ ايتۋىنشا, تۇرمەدەگى ءومىر ءار ادامعا ۇلكەن ساباق بولۋى ءتيىس. قازىر ول قاتەلىگىن مويىنداپ, جازاسىن وتەۋ بارىسىندا ەڭبەككە جانە بىلىمگە دەن قويىپ ءجۇر.
قىلمىستىق-اتقارۋ جۇيەسى قىزمەتكەرلەرى مۇنداي كەزدەسۋلەر مەن اشىق اڭگىمەلەردىڭ جاستار اراسىندا قۇقىقتىق سانا مەن جاۋاپكەرشىلىكتى ارتتىرۋعا سەپ بولاتىنىن اتاپ وتەدى.
