تۇركسوي حالىقارالىق ۇيىمىنىڭ باس حاتشىلىعىندا وتكەن سالتاناتتى ءىس-شارا تۇركسوي مەن تۇركىتىلدەس ەلدەر اراسىنداعى مادەني ىنتىماقتاستىق پەن باۋىرلاستىقتى نىعايتۋعا باعىتتالدى.
ءىس-شاراعا ماڭعىستاۋ وبلىسى اكىمىنىڭ ورىنباسارى تىلەگەن ابىشەۆ, اقتاۋ قالاسىنىڭ اكىمى ابىلقايىر بايپاقوۆ, قازاقستان رەسپۋبليكاسىنىڭ تۇركياداعى توتەنشە جانە وكىلەتتى ەلشىسى ەركەبۇلان ساپيەۆ, ماڭعىستاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى نۇرتاس سالي, تۇركسوي باس حاتشىسى سۇلتان راەۆ, تۇركيا رەسپۋبليكاسىنىڭ مادەنيەت جانە تۋريزم ۆيتسە-ءمينيسترى دوكتور سەردار چام, سونداي-اق اك پارتياسى توراعاسىنىڭ ورىنباسارى پروفەسسور دوكتور كۇرشاد زورلۋ مەن انكارا قالاسىنىڭ گۋبەرناتورى ۆاسيپ شاحين باستاعان مارتەبەلى مەيماندار قاتىستى.
تۇركسوي باس حاتشىسى سۇلتان راەۆ ءوز سوزىندە سىيعا تارتىلعان اعاش ءۇي بىرلىك پەن ىنتىماقتىقتىڭ نىشانىنا اينالاتىنىن اتاپ ءوتتى.
-اقتاۋ — تۇركى دۇنيەسىنىڭ مادەنيەت استاناسى مارتەبەسىن ۇلكەن ابىرويمەن الىپ ءجۇرىپ, كاسپي تەڭىزىنىڭ ءىنجۋ-مارجانىنا, تۇركى مادەنيەتىنىڭ توعىسقان نۇكتەسىنە اينالدى. سىيعا تارتىلعان بۇل اعاش ءۇي – بىرلىك پەن ىنتىماقتىڭ كونە نىشانىنا اينالادى. وسى ورايدا ماڭعىستاۋ وبلىسىنىڭ اكىمى نۇرداۋلەت يگىلىك ۇلىنا تارتۋ ءۇشىن العىسىمىزدى بىلدىرەمىز, - دەدى سۇلتان راەۆ.
اقتاۋ قالاسىنىڭ اكىمى ابىلقايىر بايپاقوۆ اقتاۋدىڭ تۇركى الەمىنىڭ مادەني استاناسى بولۋى مارتەبە مەن ۇلكەن جاۋاپكەرشىلىك ەكەنىن ايتتى.
-اعاش ءۇي – اتا-بابالارىمىزدىڭ ءومىر ءسۇرۋ كەڭىستىگى ءارى رۋحاني مادەنيەتىمىزدىڭ اجىراماس بولىگى. تۇركسوي مەن تۇركى باۋىرلارىمىزعا تارتۋ ەتكەن بۇل سىي – باۋىرلاستىعىمىزدىڭ جانە ورتاق مادەنيەتىمىزدىڭ كورىنىسى. اقتاۋدىڭ تۇركى الەمىنىڭ مادەنيەت استاناسى بولۋ – زور مارتەبە ءارى جاۋاپكەرشىلىك. وسى مارتەبە اياسىندا وتكەن بارلىق ءىس-شارالاردا باۋىرلارىمىزدى قۋانا قارسى الدىق. بارشاڭىزعا شىنايى العىسىمىزدى بىلدىرەمىز, - دەدى ابىلقايىر بايپاقوۆ.
سالتاناتتى ءىس-شارا ماڭعىستاۋلىق ونەرپازداردىڭ مەرەكەلىك باعدارلاماسىنا ۇلاستى.
