كوللاجدى جاساعان – امانگەلدى قياس, «EQ»
ءمينيستردىڭ ايتۋىنشا, پرەزيدەنتتىڭ تاپسىرماسى بويىنشا ۇكىمەت اعىمداعى ەكونوميكالىق رەفورمالار اياسىندا بىرقاتار شارالار ازىرلەدى. سونىڭ ىشىندە سالىقتىق اكىمشىلەندىرۋ بويىنشا وڭايلاتىلعان دەكلاراتسيا نەگىزىندەگى ارنايى سالىق رەجيمىن قولداۋ ءۇشىن تەك 44 قىزمەت ءتۇرى عانا تىيىم سالىنعان تىزىمدە قالدىرىلدى.
سونداي-اق 2026 جىلعى 1 قاڭتاردان باستاپ سالىقتىق اكىمشىلەندىرۋ «تازا پاراقتان» جۇرگىزىلەدى. بۇل ميكرو جانە شاعىن بيزنەسكە قاتىستى كەلەسى جايتتاردى كوزدەيدى: كامەرالدىق باقىلاۋ الىنىپ تاستالادى, سالىقتىق تەكسەرۋلەر جۇرگىزىلمەيدى, سوت ورگاندارىنا تىركەۋدى, قايتا تىركەۋدى جارامسىز دەپ تانۋ تۋرالى تالاپ-ارىز بەرۋ توقتاتىلادى.
«سالىقتار مەن تولەمدەر بويىنشا سالىنعان ءوسىمپۇلدار مەن ايىپپۇلدار 2026 جىلدىڭ 1 ساۋىرىنە دەيىن نەگىزگى قارىز وتەلگەن جاعدايدا جويىلادى. ققس بويىنشا ەسەپكە قويۋ شەگىنەن اسىپ كەتكەن سالىق تولەۋشىلەر اكىمشىلىك جاۋاپكەرشىلىككە تارتىلمايدى. سونداي-اق سالىق تولەۋشىلەر ءۇشىن سالىق جانە ادىلەت ورگاندارىندا كامەرالدىق جانە سالىقتىق تەكسەرۋلەر جۇرگىزبەي-اق, وڭايلاتىلعان تارتىپپەن ەسەپتەن شىعارۋ ناۋقانى وتكىزىلەدى», دەدى قر قارجى ءمينيسترى.
ونىڭ سوزىنشە, بۇل جاڭا سالىق كودەكسىن كەزەڭ-كەزەڭىمەن ەنگىزۋگە جانە سالىق تولەۋشىلەر ءۇشىن سالىقتىق اكىمشىلەندىرۋدى جەڭىلدەتۋگە مۇمكىندىك بەرەدى.
