مەملەكەت باسشىسى قاسىم-جومارت توقاەۆ بيىلعى جولداۋىندا ەلىمىز الداعى ءۇش جىل ىشىندە مىندەتتى تۇردە جاپپاي تسيفرلىق ەل بولۋى كەرەك دەگەن مىندەت قويعانى ءمالىم. اتالعان تاپسىرما اياسىندا ەرتىس-بايان ءوڭىرىنىڭ قوعامدىق قاۋىپسىزدىكتى قامتاماسىز ەتۋ سالاسىندا بىرقاتار يگى جوبا قولعا الىندى. سونىڭ ءبىرى – «قاۋىپسىز قالا» جوباسى.
پاۆلودار وبلىسىندا كوشەلەردى اقىلدى بەينەباقىلاۋ كامەرالارىمەن قامتاماسىز ەتۋ جۇيەسى تامىز ايىنان باستالدى. قوعامدىق قاۋىپسىزدىك تۇجىرىمداماسى شەڭبەرىندە «قاۋىپسىز قالا» ءۇش جىلدىق جوباسى ىسكە اسىرىلادى. ءبىر عانا پاۆلودار قالاسىندا 3 مىڭ كامەرا قويىلماقشى.
– جوبا اياسىندا وڭىردە 5 مىڭعا جۋىق كامەرا ورناتۋ جوسپارلانعان. ونىڭ ىشىندە پاۆلودار قالاسىندا 3 مىڭ جالپى بەينەباقىلاۋ كامەراسى, پاۆلودار, اقسۋ, ەكىباستۇز قالالارىنداعى جەلىلىك ۋچاسكەلەردە 250 اپپاراتتىق-باعدارلامالىق كەشەن, 150 قيىلىستا اپپاراتتىق-باعدارلامالىق كەشەن, سونداي-اق رەسپۋبليكالىق جولداردىڭ جول اپاتى ءجيى قايتالاناتىن تۇستارىندا 20 اپپاراتتىق-باعدارلامالىق كەشەن قويىلادى. بەينەباقىلاۋ جۇيەسى بويىنشا جوبانى «Antarium Group» جشس ۇتىپ الدى. كومپانيامەن 3 جىلعا سەرۆيستىك مودەل بويىنشا جالپى سوماسى 8,5 ملرد تەڭگەگە شارت جاسالدى, – دەپ حابارلادى وڭىرلىك تسيفرلىق تەحنولوگيالار باسقارماسىنىڭ باسشىسى اعىباي ءامىرين.
كوشە قيىلىستارى مەن جاياۋ جۇرگىنشىلەر جولدارىنا قويىلاتىن «مەرگەن» اپپاراتىق-باعدارلامالىق كامەرالارى تانۋ نۇسقاسىنا يە. ياعني جىلدامدىعىن شەكتەن تىس ارتتىرعان جانە باعدارشامنىڭ تىيىم سالىنعان تۇسىنە وتكەن كولىك قۇرالدارىن تىركەپ, ادامنىڭ بەت-الپەتىن تاني الادى, سونداي-اق كوشەدە قالدىرىلعان زاتتاردى, ءتۇتىننىڭ شىعۋىن انىقتايدى. ءتىپتى كولىك ىشىندە قاۋىپسىزدىك بەلبەۋىن تاقپاعان, رۋلدە تەلەفونمەن سويلەسىپ وتىرعان ادام تۋرالى دا حابارلاي الادى.
– كامەرالار ەڭ اۋەلى شاھارلارداعى جول قاۋىپسىزدىگىن قامتاماسىز ەتۋ ماقساتىندا قويىلىپ جاتىر. جاياۋ جۇرگىنشىلەردى وتكىزبەگەن جۇرگىزۋشىلەردى انىقتاپ, ءارى قاراي جول پوليتسياسىنىڭ ءتيىستى مەكەمەلەرىنە مالىمەت جىبەرەدى. جەتكىزۋشى كومپانيا پاراللەل ەلەكتر قۋاتىنا قوسىلۋ ءۇشىن رۇقسات قۇجاتتارىن الادى. بارلىق كامەرا پوليتسيا دەپارتامەنتىنىڭ جەدەل باسقارۋ ورتالىعىنا جالعانادى, – دەپ ءتۇسىندىردى باسقارما باسشىسى.
پاۆلودار وبلىسى جەرگىلىكتى پوليتسيا قىزمەتى باسقارماسى باستىعىنىڭ مىندەتىن اتقارۋشى ازامات كۇركەباەۆ وبلىس ورتالىعىندا كولىك اپاتتارى ءجيى بولاتىن 7 جول قيىلىسىنا دا «مەرگەن» كەشەندەرى قويىلعانىن جەتكىزدى. بۇلاردىڭ بارلىعى 1 قاراشادان جۇمىس ىستەي باستايدى.
پاۆلودار وبلىسى
