جاڭاشىل جوبانىڭ اۆتورى, ۇلتتىق سپورت جاناشىرى, بەلگىلى پروديۋسەر قايسار سەيپىشوۆ بۇل يگى يدەيانى ءبىراز ۋاقىت ويىندا ءپىسىرىپ, جوباسىن جاساپ, جاڭاارقا اۋدانىنىڭ قۇرمەتتى ازاماتى قايرات كوپباەۆقا ۇسىنادى. «ەگەر ەلگە تيەر پايداسى بولسا, ايانبايمىن», دەگەن ءبىراۋىز سوزىنەن سوڭ, اۋقىمدى ءىس-شاراعا قايسار امانگەلدى ۇلى بىلەگىن سىبانا كىرىسەدى.
قايرات سوۆەت ۇلىنىڭ بۇعان دەيىن دە ەلىنە قارايلاسىپ, اۋىلىنا جاعداي جاساپ وتىرعانىن ەل-جۇرت جاقسى بىلەدى. تۋعان اۋىلىنا زاماناۋي سپورت سارايىن سالدىرىپ بەرگەن. قازىر سونىڭ ارقاسىندا اياداي عانا اۋىلدان بىرنەشە ازيا چەمپيونى شىقتى. تۋعان ەلىنە قۇرمەتى مەن قىزمەتىن ءتىزىپ جاتپايمىز. وسى جولى دا قايىرىمدىلىق جوباسىنا 22 تۋ بيە سويىپ بەردى. مۇنىمەن قوسا, كۇزگى وردا فەستيۆالىنىڭ شىعىنىن كوتەردى.
وسىلايشا, «قايراتپەن 50 قادام 100 مەكتەپ» جوباسى ەل-ەلگە, جەر-جەرگە ساۋىن ايتتى. امانگەلدىنىڭ ورداسىندا وتكەن كۇزگى وردا فەستيۆالى ءدۇبىرلى تويعا ۇلاستى.
اشىلۋ سالتاناتىندا جاڭاارقا اۋدانىنىڭ باس يمامى اسقار قۋاتبەك قۇران وقىپ, وبلىستىڭ باس يمامى بەيبىت باقىتجان ۇلى ەل مەن جەردىڭ اماندىعىنا دۇعا باعىشتادى.
كۇزگى فەستيۆال الاشتىڭ ارداكۇرەڭ اقىنى عالىم جايلىباي ەلدىڭ تويىنا تارتۋ رەتىندە جولداعان جومارت جۇرەك يەسى قايرات كوپباەۆقا ارناعان جىرىمەن اشىلدى.
يگى ءىس-شاراعا اۋدان باسشىسى قانات قوجىقاەۆ, اۋداندىق ءماسليحات توراعاسى يۋرجان بەكقوجين, «Amanat» پارتياسى ۇلىتاۋ وبلىستىق فيليالىنىڭ اتقارۋشى حاتشىسى ەرلان مىرزابەكوۆ, ۇلىتاۋ وبلىسى مادەنيەت باسقارماسىنىڭ باسشىسى ماعجان تابىلدين, تۇگىسكەن اۋىلىنىڭ قادىرلى اقساقالى راحىمباي ۇمبەتوۆ ىزگى تىلەكتەرىن جولداپ, ۇيىمداستىرۋشى قايسار سەيپىشوۆ پەن دەمەۋشى قايرات كوپباەۆتىڭ ونەگەلى ىسىنە ريزاشىلىقتارىن ءبىلدىردى.
سالتاناتتى اشىلۋ راسىمىندە استانادان ارنايى كەلگەن اقىن ايشولپان تىلەۋتاي تويعا جىرىمەن شاشۋ شاشتى. جاڭاشىل باستامانى, ەل ازاماتتارىنىڭ ايرىقشا ءىسىن ارناۋىنا ارقاۋ ەتتى. ارقانى ءان مەن كۇيگە بولەپ جۇرگەن جاڭاارقا حالىقتىق «نازقوڭىر» ءانسامبلىنىڭ ونەرىنە ەل-جۇرتتىڭ ىقىلاسى ەرەكشە بولدى.
اۋەلى جاقسى-جايساڭداردىڭ يىعىنا جابىلعان جاڭاارقا شاپانىنىڭ رەكوردتار كىتابىنا ەنۋ ءراسىمى ءوتتى. جاڭاارقالىق 17 ىسمەر-تىگىنشىنىڭ ءبىر ۇلگىدەگى كوك شاپانىن كيگەن 600-گە تارتا ەل-جۇرت كوپشىلىكتىڭ كوزايىمىنا اينالىپ شىعا كەلدى.
قازاقستاننىڭ كينەس رەكورد كىتابىنىڭ رەداكتسياسىنان ارنايى كەلگەن وكىل باقىتجان ءسابيت ۇلى بارلىق اسپان تۇستەس شاپاندى باقىلاپ, ساناپ, ارنايى تىركەلگەنى جونىندە رەسمي مالىمدەدى.
رەكوردقا ەسىمدەرى ەنگەنىن راستايتىن سەرتيفيكات رىمكەش دۇيسەنبايقىزىنا, قالامقاس اشتاەۆاعا, ەلميرا ەرجانوۆاعا, ايمان جاقىپوۆاعا, جانسايا توكەنقىزىنا, مايرا ماۋلەنقىزىنا, ايگەرىم ەركەشقىزىنا, نۇربالا تولەگەنقىزىنا, گۇلسىم قۇرمانعاليقىزىنا, اسەم جاحيناعا, اسەم ساقتاپبەرگەنقىزىنا, ماريامگۇل مەرەكەقىزىنا, اينۇر سۇگىروۆاعا, ءۇمىت توكەنقىزىنا, جانسايا ولجابايقىزىنا, راۋشان عابدۋللاقىزىنا, گۇلجانار سەرىكقىزىنا, جانبوتا اسانوۆاعا تابىستالدى.
ءدال وسى ءبىر مەرەيلى مەزەتتەن سوڭ ارقانىڭ سەرىسى اتانعان قايسار سەيپىشوۆ تۋعان جەرىنە تارتۋ جاساپ, بەلگىلى سازگەر دانيار ساعىنتاەۆتىڭ انىنە جازعان «تۇگىسكەنىم» تۋىندىسىن ورىندادى.
ىرگەلى شارۋا قوجالىعىن باسقارىپ وتىرعان قايرات سوۆەت ۇلى ءبىر ءۇيىر جىلقى سويىپ, جاريا زەكەت بەردى. قايىرىمدىلىق ءىس-شاراسى باسقا كاسىپكەرلەرگە ۇلگى رەتىندە ۇيىمداستىرىلدى. ويتكەنى 500 تاباق ەت مۇشەلەپ تارتىلدى. 4,5 توننا ەت. ءتىپتى جوسپارلانعان مەجەدەن اسىپ, 510 تاباق ەت سانالدى. ارنايى باقىلاۋشى كوميسسيامەن بىرگە حالىق تا ساناققا بەلسەنە قاتىستى. بۇل مول ەت جەزقازعان قالاسىنىڭ وبلىستىق بالالار ۇيىنە, مارۋا ق ۇلىشەۆا اتىنداعى ارناۋلى الەۋمەتتىك قىزمەتتەرگە مۇقتاج بالالاردى قولداۋ ورتالىعىنا, ۇلىتاۋ وبلىستىق انا ۇيىنە, ۇلىتاۋ وبلىسىنىڭ ارناۋلى الەۋمەتتىك قىزمەتتەر قولداۋ ورتالىعىنا, تۇرمىستىق زورلىق قۇرباندارىن الەۋمەتتىك پسيحولوگيالىق قولداۋ ورتالىعىنا, قاراعاندىداعى مەدرەسەلەر مەن جاڭاارقا اۋدانىنداعى كوللەدج ستۋدەنتتەرىنە ۇلەستىرىلدى. مۇنىمەن قوسا, اۋدانداعى 300-گە جۋىق الەۋمەتتىك تىزىمدەگى وتباسىلارعا دا بەرىلدى.
رەكوردقا 500 تاباق ەتتىڭ ەنگەنىن مالىمدەگەن رەسمي وكىل باقىتجان ءسابيت ۇلى جوبا دەمەۋشىسى قايرات كوپباەۆ پەن قايسار امانگەلدى ۇلىنا سەرتيفيكات پەن ارنايى سىيلىق تابىستادى. مۇنىمەن قوسا, الەۋمەتتىك ورتالىقتىڭ باسشىلارى جوبانىڭ دەمەۋشىسىنە, ۇيىمداستىرۋشىسىنا العىسحاتتارىن تارتۋ ەتتى.
«بۇرىن-سوڭدى قازاق دالاسىندا مۇنداي كولەمدە تاباق تارتىلىپ, قايىرىمدىلىققا تارتۋ ەتىلمەگەن ەدى. جاڭاشىل جاڭاارقا ازاماتتارى تاعى دا رەكورد جاڭارتتى. مۇنداي كولەمدە بىرەگەي ۇلگىدەگى شاپان كيىپ جۇرگەن ەلدى دە ەستىمەپپىز, سوعان كوزىمىز ناقتى جەتتى. دارقاندىقتىڭ دارا ۇلگىسىن كوردىك», دەيدى باقىتجان ءسابيت ۇلى.
مۇنىمەن قوسا, فەستيۆال اياسىندا اۋدارىسپاق پەن ءداستۇرلى ساداق اتۋدان رەسپۋبليكالىق سايىس وتكەن ەدى. بۇل دا دۋماندى دۇبىرگە بولەدى. جەڭىمپازدارعا قوماقتى قارجىلاي سىيلىقتار تابىستالدى.
«قايراتپەن 50 قادام, 100 مەكتەپ» جوباسىنىڭ تاعى ءبىر ونەگەلى شارۋاسى – مەكتەپ وقۋشىلارى اراسىندا اۋىلدى دامىتاتىن ۇزدىك جوبالارعا جاريالانعان بايقاۋ. بۇل بايقاۋ ايماقتىق دەڭگەيدە ۇيىمداستىرىلدى. ۇزدىك دەپ تانىلعان بيزنەس جوبا يەلەرىنە اقشالاي سەرتيفيكات بەرىلىپ, باسقا دا وقۋشىلاردى ىنتالاندىردى.
وسىلايشا, فەستيۆال سوڭى قازاق ەستراداسىنىڭ جۇلدىزدارى ونەر كورسەتكەن گالا-كونتسەرتپەن تۇيىندەلدى.
قىسقاسى, اسپان تۇستەس 600-گە جۋىق شاپان مەن بەل قايىستىرار 510 تاباق ەت رەكورد رەتىندە تىركەلىپ, ۇلتتىڭ رۋحىن كوتەرگەندەي. الىس-جاقىننان كەلگەن مەيماندار مەرەيلى مەتسەنات قايرات كوپباەۆ پەن جوبا جەتەكشىسى قايسار امانگەلدى ۇلىنا عالامات فەستيۆال مەن عاجاپ جوبا ءۇشىن قايىرا-قايىرا ريزاشىلىعىن ءبىلدىردى.
ۇلىتاۋ وبلىسى,
جاڭاارقا اۋدانى
