قازاقستان تاراپىنان فورۋمعا «Alatau City» دامىتۋ كەڭەسىنىڭ مۇشەلەرى – «Caspian Group» توراعاسى يۋري تسحاي جانە جوبانىڭ ينۆەستيتسيالىق سەرىكتەسى «Alatau City Bank»-ءتىڭ جالعىز اكتسيونەرى ۆياچەسلاۆ كيم قاتىستى.
«Alatau City» نەگىزگى كولىك دالىزدەرىنىڭ تورابىندا ورنالاسقان, جالپى اۋدانى 88 مىڭ گەكتاردى قۇرايدى. قالانىڭ بۇكىل اۋماعى ارنايى ەكونوميكالىق ايماقتىڭ قۇرامىنا ەنگىزىلگەن. مۇندا كورپوراتيۆتىك تابىس سالىعىنان, جەر جانە م ۇلىك سالىعىنان بوساتۋ, سونداي-اق الاتاۋ قالاسى اۋماعىندا ساتىلاتىن تاۋارلارعا نولدىك مولشەرلەمەسىمەن قوسىمشا قۇن سالىعىن قولدانۋ سياقتى جەڭىلدىكتەر قاراستىرىلعان.
قىركۇيەك ايىندا پرەزيدەنتتىڭ ارنايى جارلىعىمەن الاتاۋ قالاسىنا دامۋ قارقىنى وزىق قالا دەگەن ارناۋلى مارتەبە بەرىلدى. پرەمەر-ءمينيستردىڭ توراعالىعىمەن قۇرىلعان الاتاۋ قالاسىن دامىتۋ كەڭەسى ستراتەگيالىق شەشىمدەر قابىلدايتىن نەگىزگى ورگان بولىپ سانالادى. وسىلايشا, قالا ۇكىمەتتىڭ تىكەلەي قاراماعىندا بولادى.
«Alatau City» بولاشاقتا تەحنولوگيالىق كومپانيالار مەن ەكسپورتقا باعىتتالعان وندىرىستەردىڭ ورتالىعىنا اينالماق. قالا قالالىق اۋە موبيلدىگى مەن سۋتەك ەكونوميكاسى سياقتى ماقساتتى سالالار بويىنشا ىنتالاندىرۋ باعدارلامالارىن ۇسىنۋعا دايىن, بۇل باعىتتاردا قازاقستان مەن كورەيا تىعىز ارىپتەستىك ورناتا الادى.
فورۋمدا سويلەگەن سوزىندە قانات بوزىمباەۆ ەلەكترونيكا, جاڭارتىلاتىن ەنەرگيا, مەديتسينا, ءبىلىم جانە قالالىق سەرۆيستەردى تسيفرلاندىرۋ سالالارىندا كورەي كومپانيالارىمەن ارىپتەستىكتى دامىتۋدىڭ ۇلكەن الەۋەتى بار ەكەنىن اتاپ ءوتتى.
«بۇگىندە كورەيانىڭ 890-نان استام كومپانياسى قازاقستاننىڭ بارلىق وڭىرلەرىندە ەنەرگەتيكا, قۇرىلىس, قارجى, دەنساۋلىق ساقتاۋ, اۆتوكولىك جانە جوعارى تەحنولوگيالار سالالارىندا تابىستى جۇمىس ىستەۋدە. ءبىز بىرلەسكەن جوبالاردى كەڭەيتۋگە, كورەيانىڭ ونەركاسىپتىك جانە ەنەرگەتيكالىق كومپانيالارىن تارتۋعا مۇددەلىمىز. ءوزارا ءتيىمدى ىنتىماقتاستىققا اشىقپىز جانە سىزدەردى ۇلتتىق «Alatau City» جوباسىنا قاتىسۋعا شاقىرامىز», دەدى قانات بوزىمباەۆ.
Roadshow اياسىندا قازاقستان مەن كورەيا رەسپۋبليكاسىنىڭ مەملەكەتتىك جانە ىسكەر قۇرىلىمدارى اراسىندا ءوزارا تۇسىنىستىك تۋرالى بىرقاتار مەموراندۋمعا قول قويىلدى. مەموراندۋمدارعا كەلەسى تاراپتار: قر ەنەرگەتيكا مينيسترلىگى مەن GGGI (Global Green Growth Institute); قر كولىك مينيسترلىگى, Korea Airports Corporation (KAC) جانە AAAG; الماتى وبلىسىنىڭ اكىمدىگى مەن «RETD» كومپانياسى قول قويدى.
سونىمەن قاتار عىلىم جانە جوعارى ءبىلىم مينيسترلىگى, كورەيانىڭ عىلىم جانە تەحنولوگيالار ينستيتۋتى (KAIST) جانە «Alatau City Bank» اراسىندا قازاقستاندا جاڭا ۋنيۆەرسيتەت قۇرۋ جانە دامىتۋ سالاسىندا ىنتىماقتاستىق تۋرالى مەموراندۋمعا قول قويىلدى.
